Матеј 24 - Свето Евангелие 2008

ГЛАВА 24 (Зачало 97)

¹ И откако излезе Исус од храмот и си одеше, се приближија до Него учениците, за да Му ги покажат зградите на храмот.

² А Исус им рече: – Го гледате ли сето тоа? Вистина ви велам: нема да остане тука ни камен на камен, а да не биде урнат.

(Зачало 98)

³ И кога седеше во Маслиновата Гора, дојдоа при Него учениците Негови насамо и рекоа: – Кажи ни, кога ќе биде тоа, и каков ќе биде знакот за Твоето доаѓање и за крајот на светот?

⁴ А Исус им одговори и рече: – Пазете се, да не ве излаже некој;

⁵ зашто мнозина ќе дојдат во Мое име, говорејќи: јас сум Христос; и ќе прелажат мнозина.

⁶ Ќе слушате за војни и гласови за војни. Гледајте да не се уплашите, оти сето тоа треба да биде; ама тоа уште не е крајот.

⁷ Зашто, ќе се дигне народ против народ, и царство против царство; и наместа ќе има глад, помор и потреси;

⁸ а сето тоа е почеток на болките.

⁹ Тогаш ќе ве предадат на маки и ќе ве убијат; и ќе бидете мразени од сите народи, заради Моето име.

¹⁰ Тогаш мнозина ќе се соблазнат и еден со друг ќе се предаваат, и еден со друг ќе се мразат;

¹¹ многу лажни пророци ќе се појават и ќе прелажат мнозина;

¹² и бидејќи беззаконијата ќе се умножат, кај мнозина љубовта ќе олади.

(Зачало 99)

¹³ Акој претрпи до крај, тој ќе биде спасен. Крај на саботата

¹⁴ И ќе биде проповедано ова Евангелие на царството по целиот свет, за сведоштво на сите народи; и тогаш ќе дојде крајот.

¹⁵ Па така, штом ќе ја види те „мерзоста на запустението“ да стои на свето место, за која е зборувано преку пророкот Даниил – кој чита, нека разбере, –

¹⁶ тогаш оние, што се наоѓаат во Јудеја, да бегаат по планините;

¹⁷ кој е на покривот, нека не слегува да земе нешто од куќата своја;

¹⁸ и кој е на нива, нека не се враќа дома, за да ги земе алиштата свои.

¹⁹ Но, тешко на бремените и на оние што дојат во тие дни.

²⁰ Затоа, молете се, да не биде бегањето ваше зиме, или во сабота;

²¹ оти тогаш ќе биде мака, каква што не била од почетокот на светот па досега, а и нема да биде.

²² И, ако не се скратеа оние дни, никој не би се спасил; но, заради избраните ќе се скратат тие дни.

²³ Тогаш, ако ви каже некој: – еве, овде е Христос, или таму е, не верувајте;

²⁴ оти, ќе се појават лажни христоси и лажни пророци, и ќе покажат големи знаци и чуда, за да ги прелажат, ако е можно, избраните.

²⁵ Ете, претходно ви кажав.

²⁶ И така, ако ви речат: – ете, во пустината е Он, – не излегувајте; ете, во тајна соба е, – не верувајте.

(Зачало 100)

²⁷ Зашто, како молњата што излегува од исток и се гледа дури до запад, така ќе биде доаѓањето на Синот Човечки.

²⁸ Оти, каде што е трупот, таму се собираат и орлите. Крај на четвртокот

²⁹ И веднаш, по маките во тие дни, сонцето ќе потемни и месечината нема да ја дава својата светлина, и ѕвездите ќе попаѓаат од небото, и силите небески ќе се разнишаат.

³⁰ Тогаш ќе се јави на небото знакот на Синот Човечки и ќе се расплачат сите земни племиња, и ќе Го видат Синот Човечки како доаѓа на небеските облаци, со голема слава и сила;

³¹ и ќе ги испрати Своите ангели со голем трубен глас, и ќе ги соберат Неговите избраници од четирите ветра, од едниот до другиот крај на небесата.

³² Со смоквата направете споредба: штом ќе се подмладат нејзините гранки и ќе пуштат лисја, знаете, дека е близу летото;

³³ така и вие, кога ќе го видите сето тоа, знајте, дека е близу пред врата. Крај на петокот

(Зачало 101)

³⁴ Вистина ви велам: нема да премине овој род, додека сето тоа не се исполни.

³⁵ Небото и земјата ќе преминат, ама зборовите Мои нема да преминат. Крај на Велики Понеделник, на литургијата

(Зачало 102)

³⁶ Аза тој ден и час никој не знае, ниту ангелите небесни, а само Мојот Отец;

³⁷ но, како што беше во деновите на Ное, така ќе биде и при доаѓањето на Синот Човечки;

³⁸ оти, како што во деновите пред потопот јадеа и пиеја, се женеа и се мажеа до оној ден, кога Ное влезе во ковчегот,

³⁹ и не узнаа додека не дојде потопот и истреби сѐ, – така ќе биде и доаѓањето на Синот Човечки;

⁴⁰ тогаш ќе бидат двајца на нива: еден ќе се земе, а другиот ќе се остави;

⁴¹ две жени ќе мелат на мелница: едната ќе се земе, а другата ќе се остави. Читај во петокот

(Зачало 103)

⁴² Па така, бидете будни, зашто не знаете во кој час ќе дојде вашиот Господ.

⁴³ Знајте го и ова, дека, ако домаќинот на куќата знаеше во кој час ќе дојде крадецот, тој ќе стоеше буден и немаше да дозволи да му ја поткопаат куќата.

⁴⁴ Затоа, бидете и вие готови, зашто во кој час и не мислите, ќе дојде Синот Човечки. Крај на саботата

⁴⁵ Кој е, пак, тој верен и благоразумен слуга, кого што ќе го постави господарот негов над слугите свои, да им дава навреме храна?

⁴⁶ Блазе на тој слуга, кого што, кога ќе дојде господарот негов, ќе го најде да постапува така;

⁴⁷ вистина ви велам, дека над целиот свој имот ќе го постави него. Крај на светителот

⁴⁸ Ако, пак, тој слуга, бидејќи лош, рече во срцето свое: господарот мој уште за долго време нема да дојде,

⁴⁹ па почне да ги бие другарите свои и да јаде и пие со пијаниците,

⁵⁰ господарот на тој слуга ќе дојде во ден, кога не го очекувал, и во час, што не го знаел;

⁵¹ и ќе го исече на половина, и ќе му даде еднаква награда со лицемерите; таму ќе биде плач и крцкање со заби. Крај на петокот