Матеј 20 - Свето Евангелие 2008

ГЛАВА 20 (Зачало 80)

¹ Зашто царството небесно прилега на домаќин, кој излезе рано наутро да најми работници за своето лозје,

² па, штом се погоди со работниците по пенез на ден, ги прати во лозјето свое.

³ Потоа, кога излезе околу третиот час и виде други како стојат на пазариштето без работа,

⁴ им рече: – Одете и вие во моето лозје, па што е право, ќе ви дадам; и тие отидоа.

⁵ Повторно излезе околу шестиот и деветтиот час и направи исто.

⁶ А околу единаесеттиот час одново излезе и најде други, како стојат без работа, и им рече: – Зошто стоите тука цел ден без работа?

⁷ Тие му одговорија: – Никој не нѐ повика. А тој им рече: – Одете во моето лозје, и што е право, ќе добиете.

⁸ А кога се стемни, господарот на лозјето му рече на својот настојник: – Повикај ги работниците и плати им, почнувајќи од последните, па до првите.

⁹ И дојдените околу единаесеттиот час добија по пенез.

¹⁰ А кога дојдоа првите, помислија оти ќе примат повеќе, но и тие добија по пенез;

¹¹ и штом добија, негодуваа против господарот

¹² и велеа: – Оние последните работеа еден час, а ти ги изедначи со нас, што ја претрпевме тешкотијата на денот и жегата.

¹³ А тој одговори и рече: – Пријателе, не те онеправдувам: нели се погоди со мене за пенез?

¹⁴ Земи си го своето и оди си; и на овој, последниов, сакам да му дадам колку и тебе;

¹⁵ зар немам право да правам со своето што сакам? Или ти е окото завидливо, што сум добар?

¹⁶ Така ќе бидат последните први, а првите – последни; зашто мнозина се повикани, а малцина избрани. Крај на средата

(Зачало 81)

¹⁷ И кога се искачуваше Исус кон Ерусалим, ги зеде насамо дванаесетте ученици и по патот им рече:

¹⁸ – Ете, се искачуваме кон Ерусалим и Синот Човечки ќе биде предаден на првосвештениците и книжниците, и ќе Го осудат на смрт;

¹⁹ и ќе Го предадат на незнабошците за да биде исмеан и биен, и распнат; и на третиот ден, ќе воскресне.

²⁰ Тогаш пристапи до Него мајката на Заведеевите синови, заедно со своите синови и, клањајќи се, Го молеше нешто.

²¹ А Он ѝ рече: – Што бараш? Таа Му одговори: – Заповедај овие мои два сина да седнат при Тебе, едниот оддесно, а другиот одлево, во Твоето царство.

²² Исус им одговори и рече: – Не знаете што барате. Можете ли да ја пиете чашата што ќе ја пијам Јас; или да се крстите со крштението, со кое се крштевам Јас? Тие Му одговорија: – Можеме!

²³ И им рече: – Чашата Моја ќе ја пиете, и со крштението, со кое се крштевам Јас, ќе се крстите; ама да се седи од Мојата десна и лева страна, тоа не зависи од Мене; таму ќе седнат оние за кои е подготвено од Мојот Отец.

²⁴ И десетте, кога чуја, негодуваа против двајцата браќа.

²⁵ Но Исус, кога ги повика, им рече: – Знаете дека кнезовите народни владеат над народите, и управниците господарат над нив;

²⁶ меѓу вас, пак, нема да биде така; но, кој меѓу вас сака да биде поголем, нека ви биде слуга;

²⁷ и кој сака меѓу вас да биде прв, нека ви биде роб;

²⁸ како што и Синот Човечки не дојде да Му служат, туку дојде да послужи и да ја даде душата Своја за откуп на мнозина. Крај на четвртокот

(Зачало 82)

²⁹ И кога излегуваше од Ерихон, по Него врвеше многу народ.

³⁰ И ете, двајца слепи, седнати покрај патот, штом чуја дека минува Исус, извикаа и рекоа: – Помилуј нѐ, Господи, Сине Давидов!

³¹ А народот им велеше да молчат; но тие уште посилно викаа и велеа: – Помилуј нѐ, Господи, Сине Давидов!

³² И кога застана Исус, ги повика и рече: – Што сакате да ви направам?

³³ Тие Му одговорија: – Да ни се отворат очите наши.

³⁴ А Исус се смилува и се допре до нивните очи, и одеднаш им прогледаа очите нивни; и тие тргнаа по Него. Крај на саботата