Матеј 2 - Свето Евангелие 2008

ГЛАВА 2 (Зачало 3)

¹ Акога се роди Исус во Витлеем Јудејски во дните на царот Ирод, ете, дојдоа во Ерусалим мудреци од Исток и рекоа:

² Каде е новородениот Цар Јудејски? Зашто ја видовме Неговата ѕвезда на Исток, па дојдовме да Му се поклониме.

³ Штом го чу тоа, царот Ирод се вознемири, и целиот Ерусалим со него.

⁴ И кога ги собра сите првосвештеници и книжници народни, ги прашуваше: – Каде ќе се роди Христос?

⁵ А тие му рекоа: – Во Витлеем Јудејски; зашто така е напишано преку пророкот:

⁶ „И ти, Витлееме, земјо Јудина, по ништо не си помал од Јудините владетелства; зашто од тебе ќе излезе водач што ќе го пасе Мојот народ Израилски“.

⁷ Тогаш Ирод тајно ги повика мудреците и дозна од нив за времето кога се појавила ѕвездата,

⁸ па, испраќајќи ги во Витлеем, рече: – Отидете, распрашајте добро за Младенецот; и штом ќе Го најдете, јавете ми, за да отидам и јас да Му се поклонам.

⁹ Тие, пак, откако го ислушаа царот, си заминаа. И ете, ѕвездата што ја беа виделе на исток врвеше пред нив, додека не пристигна и се запре над местото, каде што беше Младенецот.

¹⁰ А кога ја видоа ѕвездата, тие се зарадуваа со многу голема радост.

¹¹ И влегоа во куќата, Го видоа Младенецот со мајка Му Марија, и паднаа, па Му се поклонија; а штом ги отворија своите ковчежиња, Му принесоа дарови: злато, ливан и смирна.

¹² И кога примија во сон вест, да не се враќаат кај Ирода, си заминаа по друг пат, за својата земја. Крај на литургијата и на шестиот час

(Зачало 4)

¹³ А штом си отидоа тие, ете, ангел Господов му се јави на Јосифа во сон, говорејќи: – Стани, земи Го Младенецот и мајка Му, па бегај во Египет и остани таму додека не ти кажам, бидејќи Ирод ќе Го бара Младенецот за да Го погуби.

¹⁴ И тој стана, Го зеде Младенецот и мајка Му ноќно време, па отиде во Египет.

¹⁵ И таму беше до смртта Иродова, за да се исполни реченото од Господа, преку пророкот, кој вели: „Од Египет Го повикав Мојот Син“.

¹⁶ Тогаш Ирод, кога виде дека е измамен од мудреците, се разгневи многу и испрати, та ги уби сите деца во Витлеем и по целата негова околија од две години и надолу, според времето што точно го беше дознал од мудреците.

¹⁷ Тогаш се исполни кажаното преку пророкот Јеремија, кој говори:

¹⁸ „Глас се слуша во Рама, плач и ридање, и пискот голем: Рахила плаче за своите деца и не сака да се утеши, зашто ги нема“.

¹⁹ А по смртта на Ирода, ете, ангел Господов му се јави насон на Јосифа, во Египет,

²⁰ и му рече: – Стани, земи Го Младенецот и мајка Му, и отиди во земјата израилева, зашто изумреа оние што ја бараа душата на Младенецот.

²¹ Тој стана, Го зеде Младенецот и мајка Му, и дојдоа во земјата израилева.

²² Но, кога чу дека во Јудеја царува Архелај, место татка си Ирода, се исплаши да отиде таму; и, откако доби вест насон тој замина во пределите галилејски.

²³ И кога пристигна, се насели во градот наречен Назарет, за да се исполни кажаното преку пророците дека ќе се нарече Назареец. Крај на неделата на Младенци и на деветтиот час