Матеј 19 - Свето Евангелие 2008

ГЛАВА 19

¹ Кога ги заврши Исус тие зборови, тргна од Галилеја и пристигна во пределите јудејски, оданде Јордан.

² По Него одеше многу народ, и Он ги исцели таму. Изостави во вторникот

(Зачало 78)

³ И дојдоа кај Него фарисеите што Го искушуваа, па Му рекоа: – Може ли човек да ја остави жената своја за каква и да било причина?

⁴ Он им одговори и рече: – Не сте ли читале дека Оној што ги создаде во почетокот, маж и жена ги создаде и рече:

⁵ „Затоа ќе остави човек татко и мајка и ќе се прилепи до жената своја, и ќе бидат обата едно тело“.

⁶ Па така, тие веќе не се двајца, а едно тело. А Бог што составил, човек да не разделува.

⁷ Тие Му рекоа: – Зошто тогаш Мојсеј заповеда да ѝ даде мажот разводно писмо и да ја напушти?

⁸ Он им одговори: – Заради вашите лоши срца Мојсеј ви разрешил да ги оставате жените свои; но, во почетокот не беше така;

⁹ Јас, пак, ви велам: оној што ќе ја остави жената своја, освен поради прељуба, и ќе се ожени со друга, тој прави прељуба; и оној што ќе се ожени со напуштена, прељубодејствува.

¹⁰ А учениците Негови Му рекоа: – Ако е таков долгот на човекот кон жената, тогаш не треба ни да се жени?

¹¹ Но, Он рече: – Не сите го примаат овој збор, а само оние на кои им е дадено;

¹² зашто има скопени, така родени од мајчината утроба; а има скопени и од луѓе; но, има и такви што се скопени само заради царството небесно. Кој може да прими, нека прими! Крај на саботата. Читај во вторникот

¹³ Тогаш доведоа при Него деца, за да ги положи рацете над нив и да се помоли, а учениците им бранеа.

¹⁴ Но Исус рече: – Оставете ги децата и не пречете им да доаѓаат при Мене, зашто на так ви е царството небесно.

¹⁵ И кога ги положи рацете над нив, Исус си отиде оттаму. Крај на вторникот

(Зачало 79)

¹⁶ И ете, еден млад човек, кога пристапи до Него, Му рече: – Благ Учителе, какво добро треба да направам, за да имам живот вечен?

¹⁷ А Он му одговори: – Зошто Ме викаш благ? Никој не е благ, освен единиот Бог. А, ако сакаш да влезеш во животот, исполнувај ги заповедите.

¹⁸ Тој Му рече: – Кои? А Исус одговори: – Не убивај, не прељубодејствувај, не кради, не сведочи лажно;

¹⁹ почитувај ги таткото и мајката; сакај ги ближните свои како себеси!

²⁰ Младиот човек Му рече: – Сето тоа сум го запазил од младоста моја; што уште ми е потребно?

²¹ Исус му рече: – Ако сакаш да бидеш совршен, оди, продај го имотот свој и раздели го на сиромаси, и ќе имаш сокровиште на небото; па дојди и врви по Мене!

²² Штом ги чу младиот човек тие зборови, си отиде нажален, оти имаше голем имот.

²³ А Исус им рече на учениците свои: – Вистина, ви велам, богат мачно ќе влезе во царството небесно;

²⁴ и уште ви велам: полесно е камила да мине низ иглени уши, отколку богат да влезе во царството Божјо.

²⁵ Кога го чуја тоа учениците, многу се зачудија и рекоа: – Тогаш, кој може да се спаси?

²⁶ А Исус, кога погледна на нив, им рече: – За луѓето тоа е неможно, ама за Бога сѐ е можно. Крај на 12-та недела. Читај во неделата на сите светии

²⁷ Тогаш Петар одговори и Му рече: – Ете, ние оставивме сѐ и по Тебе одиме: што ќе стане, пак, со нас?

²⁸ А Исус им рече: – Вистина ви велам, дека, вие што врвите по Мене, при повторното раѓање, кога Синот Човечки ќе седне на престолот на славата Своја, ќе седнете и вие на дванаесет престоли и ќе судите над дванаесетте Израилеви колена;

²⁹ и секој што ќе остави куќа, или брат, или сестра, или татко, или мајка, или жена, или деца, или ниви, заради Моето име, ќе наследи стопати повеќе и ќе добие живот вечен.

³⁰ И мнозина први ќе бидат последни, а последните – први. Крај на неделата на сите светии