Матеј 18 - Свето Евангелие 2008

ГЛАВА 18 (Зачало 74)

¹ Во тој час се приближија учениците до Исуса и рекоа: – Кој е поголем во царството небесно?

² И откако повика Исус едно дете, го постави меѓу нив

³ и рече: – Вистина ви велам, ако не се преобратите и не бидете како деца, нема да влезете во царството небесно;

⁴ значи, кој ќе се смири како ова дете, тој е поголем во царството небесно; Крај на саботата

⁵ и, кој прима такво дете во Мое име, Мене Ме прима;

⁶ а кој ќе соблазни едно од овие малите, за него е поарно да му се обеси воденичен камен на вратот и да потоне во морската длабочина.

⁷ Тешко на светот од соблазни, оти соблазните треба да дојдат; но тешко на оној човек, преку кого доаѓа соблазна.

⁸ Ако те соблазнува раката твоја или ногата твоја, пресечи ја и фрли ја од себе: подобро е за тебе да влезеш во животот без рака или без нога, отколку со две раце и две нозе да бидеш фрлен во вечниот оган;

⁹ и, ако те соблазнува окото твое, извади го и фрли го од себе: подобро е за тебе да влезеш во животот со едно око, отколку да ги имаш и двете очи, а да бидеш фрлен во геената огнена.

(Зачало 75)

¹⁰ Гледајте да не презрете едно од овие малите, зашто ви велам, нивните ангели на небесата секогаш го гледаат лицето на Мојот Отец небесен.

¹¹ Оти Синот Човечки дојде да го побара и спаси загубеното. Крај на понеделникот

¹² Како ви се чини? Ако некој има сто овци и една од нив се загуби, нема ли да ги остави деведесет и деветте и да појде во планините да ја бара загубената овца?

¹³ И, ако се случи да ја најде, вистина ви велам, ќе се радува за неа повеќе отколку за деведесет и деветте незагубени.

¹⁴ Така и вашиот небесен Отец не сака да загине ниедно од овие малите.

¹⁵ Ако згреши против тебе братот твој, оди и искарај го насамо; ако те послуша, си го придобил брата си;

¹⁶ ако ли не те послуша, поведи со себе уште еден или двајца, па со устата на двајца или тројца сведоци нека се потврди секој збор;

¹⁷ ако ли, пак, не ги послуша и нив, кажи ѝ на Црквата; но ако и Црквата не ја послуша, тогаш нека ти биде тој како незнабожец и цариник.

(Зачало 76)

¹⁸ Вистина ви велам: сѐ што ќе сврзете на земјата, ќе биде сврзано и на небото; и сѐ што ќе разврзете на земјата, ќе биде разврзано и на небото.

¹⁹ Пак ви велам: ако двајца од вас се согласат на земјата да помолат нешто, што и да било, ќе им биде дадено од Мојот Отец Кој е на небесата;

²⁰ зашто, каде што се двајца или тројца собрани во Мое име, таму сум и Јас, посреде нив. Крај на понелникот на Св. Дух

²¹ Тогаш Петар пристапи кон Него и рече: – Господи, колкупати да му простам на брат ми, ако ми згреши? До седумпати ли?

²² Исус му одговори: – Не ти велам до седум, туку до седумдесетпати по седум. Изостави во вторникот

(Зачало 77)

²³ Затоа царството небесно прилега на цар, кој побара да ги расчисти сметките со своите слуги.

²⁴ Кога почна да ја расчистува сметката, доведоа при него еден Што му должеше десет илјади таланти;

²⁵ па, бидејќи немаше со што да плати, господарот негов нареди да го продадат и него, и жена му, и децата негови и сѐ што имаше, за да наплати;

²⁶ тогаш, тој слуга падна и му се клањаше, говорејќи: – Господаре, стрпи се спрема мене и сѐ ќе ти платам!

²⁷ А господарот на тој слуга, кога се смилува, го пушти и му го прости долгот.

²⁸ Слугата, пак, штом излезе, најде еден од другарите свои, кој му должеше сто пенези и, кога го фати, го давеше и му велеше: – Исплати ми, што си ми должен!

²⁹ Тогаш, неговиот другар падна пред нозете негови, го молеше и велеше: – Стрпи се спрема мене и сѐ ќе ти исплатам!

³⁰ Но, тој не сакаше, а отиде и го фрли во затвор, дури не му го исплати долгот.

³¹ Другарите, пак, негови, кога го видоа тоа што стана, многу се огорчија, па отидоа и му кажаа на својот господар за сѐ што се случило.

³² Тогаш, господарот негов го повика и рече: – Лукав слуго, јас ти го простив сиот долг, зашто ми се молеше;

³³ не требаше ли и ти да се смилиш над својот другар, како што се смилив и јас над тебе?

³⁴ И се разгневи господарот негов, па го предаде на мачители, додека не му го исплати целиот свој долг.

³⁵ Така и Мојот Отец небесен ќе направи со вас, ако секој од вас не ги прости, од срце, грешките на брата си. Крај на неделата. Читај во вторникот.