Матеј 15 - Свето Евангелие 2008

ГЛАВА 15

¹ Тогаш пристапија кон Исуса ерусалимските книжници и фарисеи, велејќи:

² Зошто учениците Твои не го запазуваат редот на старите? Бидејќи не си ги мијат рацете кога јадат леб.

³ А Он им одговори и рече: – Па зошто и вие ја престапувате Божјата заповед заради вашето предание?

⁴ Зашто Бог заповедал и рекол: „почитувај ги татка си и мајка си“, и „кој го злослови таткото свој или мајка си, со смрт да се казни“.

⁵ А вие велите: ако некој им рекол на татка си и на мајка си: тоа, со кое би можел да се ползуваш од мене, дар е;

⁶ значи, тој може да не го почитува својот татко или својата мајка. Така ја нарушивте заповедта Божја, заради вашето предание.

⁷ Лицемери, добро пророкувал за вас Исаија, велејќи:

⁸ „Овој народ се приближува до Мене со устата своја и со усните Ме почитува, а срцето негово стои далеку од Мене;

⁹ но напразно Ме почитува, оти проповеда човечки повелби“.

¹⁰ И откако ги повика луѓето, им рече: – Слушајте и разберете:

¹¹ не она што влегува во устата го осквернува човекот, туку она што излегува од устата, тоа го осквернува човекот. Крај на средата

(Зачало 61)

¹² Тогаш Неговите ученици Му се приближија и рекоа: – Знаеш ли дека фарисеите, штом го чуја тој збор, се соблазнија?

¹³ А Он, одговарајќи, им рече: – Секоја фиданка, што не ја насадил Мојот Отец небесен, ќе се искорне;

¹⁴ оставете ги: тие се слепи водачи на слепци; а кога слеп слепиот го води, двајцата ќе паднат во јама.

¹⁵ Петар, пак, Му одговори и рече: – Објасни ни ја оваа парабола.

¹⁶ А Исус им рече: – Ама вие уште ли не сфаќате?

¹⁷ Уште ли не разбирате дека сѐ што влегува во устата, минува преку стомакот и се исфрла надвор?

¹⁸ А она што излегува од устата, иде од срцето и тоа е што го осквернува човекот;

¹⁹ оти од срцето излегуваат лоши помисли, убиства, прељубодејства, блудства, кражби, лажни сведоштва, хули;

²⁰ овие се што го осквернуваат човекот. А јадењето со неизмиени раце, не го осквернува човекот.

(Зачало 62)

²¹ И кога излезе оттаму Исус, замина во земјата тирска и сидонска. Крај на четвртокот

²² И ете, една жена хананејка, откако излезе од оние краишта, повика кон Него, велејќи: – Помилуј ме, Господи, Сине Давидов! Ќерка ми жестоко се мачи од бес.

²³ Но Он не ѝ одговори ниту збор. И, пристапувајќи до Него, учениците Негови Го молеа и велеа: – Отпушти ја, оти вика по нас.

²⁴ А Он одговори и рече: – Јас сум испратен само при загубените овци од домот Израилев.

²⁵ Ама таа, кога пристапи, Му се клањаше и велеше: – Господи, помогни ми!

²⁶ А Он, одговарајќи, ѝ рече: – Не е добро да се земе лебот од децата и да се фрли на кучињата.

²⁷ Но таа Му рече: – Да, Господи, ама и кучињата јадат од трошките што паѓаат од трпезата на нивните господари.

²⁸ Тогаш Исус одговори и рече: – О, жено, голема е твојата вера; нека ти биде според желбата твоја! И во тој час оздраве ќерката нејзина. Крај на неделата

(Зачало 63)

²⁹ Штом замина оттаму, дојде Исус при Галилејското Море, се искачи на планината и седна таму.

³⁰ И дојде при Него многу народ, кој имаше со себе куци, слепи, неми, фатени и многу други, и ги положија пред нозете на Исуса, и Он ги излечи;

³¹ така што народот се восхитуваше, гледајќи како неми говорат, фатени оздравуваат, куци се движат и слепи прогледуваат и Го прославуваше Бога Израилев. Крај на петокот

(Зачало 64)

³² А Исус, откако ги повика учениците Свои, рече: – Жал ми е за народот, оти три дена веќе стојат при Мене и немаат што да јадат; да ги распуштам гладни не би сакал, за да не премалеат по патот.

³³ Но учениците Негови Му рекоа: – Од каде ќе земеме толку леб во пустинава, за да нахраниме толку народ?

³⁴ Исус ги праша: – Колку лебови имате? А тие одговорија: – Седум и неколку риби.

³⁵ Тогаш Исус му заповеда на народот да поседне по земјата.

³⁶ И откако ги зеде седумте лебови и рибите, благодари, ги прекрши и им ги даде на учениците Свои, а учениците – на народот.

³⁷ И јадоа сите и се наситија; и кренаа останати парчиња седум полни кошници.

³⁸ А оние што јадеа беа четири илјади мажи, освен жените и децата.

³⁹ Па штом го распушти народот, влезе во кораб и пристигна во пределите магдалски. Крај на саботата