Матеј 12 - Свето Евангелие 2008

ГЛАВА 12 (Зачало 44)

¹ Во тоа време, една сабота, Исус минуваше преку нивјето, а учениците Негови огладнеа, па почнаа да кинат класје и да јадат.

² Фарисеите, штом го видоа тоа, Му рекоа: – Ете, учениците Твои прават што не треба да се прави во сабота.

³ А Он им рече: – Не сте читале ли што направи Давид, кога огладне самиот тој и оние што беа со него?

⁴ Како влезе во домот Божји и ги изеде лебовите од предложението, кои не требаше да ги јаде ни тој, ниту оние што беа со него, туку само свештениците.

⁵ Или, не сте читале ли во Законот дека во сабота свештениците ја нарушуваат саботата и пак не се виновни?

⁶ Но, Јас ви велам дека е тука Оној Којшто е поголем од храмот;

⁷ и, ако знаевте што значи: „милост сакам, а не жртва“, не би сте ги осудувале невините;

⁸ зашто Синот Човечки е господар и на саботата. Крај на петокот

(Зачало 45)

⁹ И откако отиде оттаму, дојде во синагогата нивна.

¹⁰ И ете, таму беше еден човек, кој имаше исушена рака. И за да Го обвинат, Го прашаа Исуса: – Бива ли да се лекува во сабота?

¹¹ А Он им рече: – Кој од вас, ако има една овца и ако таа падне во сабота во јама, што не ќе ја земе и извлече?

¹² А колку, пак, човекот е поскап од една овца? И така, во сабота е дозволено да се прави добро.

¹³ Тогаш му рече на човекот: – Протегни ја раката! И тој ја протегна; и таа стана здрава, како другата. Крај на понеделникот

(Зачало 46)

¹⁴ Афарисеите, штом излегоа, се договорија како да Го погубат. Но Исус, кога разбра, се оддалечи оттаму.

¹⁵ И тргна по Него многу народ, и Он ги излечи сите;

¹⁶ и им забрани да разгласуваат за Него;

¹⁷ за да се исполни кажаното преку пророкот Исаија, кој вели:

¹⁸ „Ете Го слугата Мој, Кого што Го избрав, Мојот возљубен, што е по волјата на Мојата душа. Ќе го положам Духот свој над Него и на народите ќе им објави суд;

¹⁹ нема да се кара, ниту ќе вика, и никој нема да го чуе гласот Негов по раскрсниците;

²⁰ трските наведнати нема да ги скрши, ниту запалените светила ќе ги угасне, додека не го изведе судот кон победа.

²¹ И во Неговото име народите ќе се надеваат“. Крај на саботата. Читај во вторникот

²² Тогаш доведоа при него еден бесен, кој беше слеп и нем; и го излечи, така што слепонемиот прогледа и проговори.

²³ И сиот народ се чудеше и велеше: – Не е ли Овој Христос, синот Давидов?

²⁴ А фарисеите, штом го слушнаа тоа, рекоа: – Он не ги истерува бесовите на друг начин, освен преку Велзевул, началникот на бесовите.

²⁵ Но Исус, знаејќи ги нивните помисли, им рече: – Секое царство, ако се раздели, запустува; и секој град или дом, ако се раздели на противни групи, ќе пропадне.

²⁶ И, ако сатаната изгонува сатана, тој се разделил сам против себе; тогаш, како може да се запази царството негово?

²⁷ И, ако Јас истерувам бесови преку Велзевул, а синовите ваши, преку кого ги изгонуваат? Затоа тие ќе ви бидат судии.

²⁸ Ако, пак, Јас истерувам бесови со Духот Божји, тоа значи дека дошло царството Божјо до вас.

²⁹ Или, како може да влезе некој во куќата на силен човек и да му ја плени покуќнината, ако најнапред не го врзе силниот и тогаш да му ја ограби куќата?

(Зачало 47)

³⁰ Кој не е со Мене, против Мене е; и кој не собира со Мене, тој растура. Крај на вторникот

³¹ Затоа ви велам: – секој грев и хула ќе им се прости на луѓето, но хулата против Светиот Дух, нема да им се прости на луѓето.

³² И, ако некој каже збор против Синот Човечки, ќе му се прости; но, ако каже нешто против Светиот Дух, нема да му се прости, ни на овој, ни на оној свет.

³³ Или, ако насадите добро дрво и плодот ќе му биде добар; а ако насадите лошо дрво и плодот ќе му биде лош; зашто, по плодот се познава дрвото.

³⁴ Породи змиини! Како можете да говорите добро, кога сте лоши? Зашто, од преполнето срце прикажува устата.

³⁵ Добриот човек од доброто сокровиште изнесува добро, а лошиот човек од лошото сокровиште – лошо.

³⁶ И ви велам, дека за секој необмислен збор, што ќе го изговорат луѓето, ќе одговараат на Судниот ден;

³⁷ оти според зборовите свои ќе бидеш оправдан, и според зборовите свои ќе бидеш суден. Крај на саботата

(Зачало 48)

³⁸ Тогаш некои од книжниците ифарисеите одговорија и рекоа: – Учителе, сакаме да видиме знак од Тебе.

³⁹ А Он им одговори и рече: – Лукав и прељуботворен род бара знаци; но нема да му се даде знак, освен знакот на пророкот Јона;

⁴⁰ оти, како што Јона беше во утробата на китот три дни и три ноќи, така и Синот Човечки ќе биде во срцето на земјата три дни и три ноќи.

⁴¹ Ниневијците ќе излезат на суд со овој род и ќе го осудат, зашто тие се покајаа од проповедта на Јона; а ете, тука има повеќе од Јона.

⁴² И царицата јужна ќе излезе на суд со овој род и ќе го осуди; зашто, таа дојде од крајот на земјата да ја чуе премудроста на Соломона; но ете, тука е многу поголем од Соломона.

⁴³ Кога нечист дух ќе излезе од човека, тој оди преку безводни места, барајќи спокој, и не го наоѓа;

⁴⁴ па, ќе рече тогаш: – да се вратам во мојот дом од каде што излегов. И штом ќе дојде, го наоѓа празен, изметен и уреден;

⁴⁵ тогаш оди и доведува други седум духови, полоши од себе, и штом ќе влезат, таму и ќе живеат; и последната состојба на тој човек станува полоша од првата. Така ќе биде и со овој пакостен род. Крај на средата

(Зачало 49)

⁴⁶ Додека му зборуваше на народот, мајка Му и браќата Негови стоеја надвор и сакаа да зборуваат со Него.

⁴⁷ Некој Му кажа: – Ете, мајка Ти и браќата Твои стојат надвор и сакаат да зборуваат со Тебе.

⁴⁸ Он му одговори на оној што Му зборуваше, и рече: – Која е Мојата мајка и кои се Моите браќа?

⁴⁹ И откако покажа со рака на учениците Свои, рече: – Еве ја Мојата мајка и еве ги Моите браќа;

⁵⁰ зашто, кој ја исполнува волјата на Мојот Отец Кој е на небесата, тој Ми е брат, и сестра, и мајка.