Матеј 11 - Свето Евангелие 2008

ГЛАВА 11

¹ И кога ги заврши Исус овие заповеди кон дванаесетте Свои ученици, замина оттаму за да поучува и да проповеда по нивните градови. Крај на петокот, седмата сабота и пред Воздвижение

(Зачало 40)

² А Јован, откако чу, во затворот, за Христовите дела, испрати двајца свои ученици,

³ и Му рече: – Ти ли си Оној што треба да дојде или друг да чекаме?

⁴ Исус им одговори и рече: – Одете и кажете му на Јована што слушате и што гледате:

⁵ слепи прогледуваат и сакати проодуваат; лепрозни се очистуваат и глуви прослушуваат, мртви воскреснуваат и на бедните им се проповеда Евангелието;

⁶ и блажен е оној што не се соблазнува заради Мене.

⁷ А кога си отидоа овие, Исус почна да му зборува на народот за Јована: – Што сте излегле да видите во пустината? Трска ли што се лулее од ветерот?

⁸ Но, што излеговте да видите? Човек ли, облечен во меки алишта? Ете, оние што носат меки алишта, по царските палати се.

⁹ Но, што излеговте да видите? Пророк ли? Да, ви велам, и повеќе од пророк.

¹⁰ Зашто тој е за кого е напишано: „Ете, Јас го испраќам Мојот ангел пред лицето Твое; тој ќе го подготви патот Твој пред Тебе“.

¹¹ Вистина ви велам: – Меѓу родените од жени не се јавил поголем од Јована Крстителот; ама најмалиот во царството небесно е поголем од него.

¹² А од деновите на Јована Крстителот, па до сега, царството небесно насила се зема и силните го грабаат.

¹³ Зашто сите Пророци и Законот беа пророкувале до Јована.

¹⁴ И, ако сакате да примите, тој е Илија, којшто ќе дојде.

¹⁵ Кој има уши да слуша, нека чуе! Крај на понеделникот и на св. Јован

(Зачало 41)

¹⁶ Асо кого да го споредам овој род? Тој личи на деца што седат по пазариштата, па им викаат на своите другари

¹⁷ и велат: ви свиревме и не игравте; ви пеевме жални песни и не плачевте.

¹⁸ Зашто, дојде Јован, кој ниту јаде ниту пие, а велат: бес има.

¹⁹ Дојде Синот Човечки, Којшто и јаде и пие, а велат: еве човек ненаситен и пијаница, пријател на цариниците и грешниците. И се оправда Премудроста од своите дела.

(Зачало 42)

²⁰ Тогаш почна Исус да ги укорува градовите, во кои се извршија најмногу Негови чуда, бидејќи не се покајаа. Крај на вторникот

²¹ Тешко тебе, Хоразине! Тешко тебе, Витсаидо! Ако во Тир и Сидон беа чудата што станаа при вас, одамна тие би се покајале во кострет и пепел;

²² но, ви велам: на Тир и на Сидон ќе им биде полесно во Судниот ден, отколку вам.

²³ И ти, Капернауме, што си се воздигнал до небото, до пеколот ќе слезеш; зашто, ако во Содом се беа извршиле чудата, што станаа во тебе, тој и до ден-денеска ќе останеше.

²⁴ Но ви кажувам, дека на земјата содомска ќе ѝ биде полесно на Судниот ден, отколку на тебе.

²⁵ Во тоа време, продолжи Исус и рече: – Те прославувам, Оче, Господи на небото и на земјата, оти си го сокрил тоа од мудрите и разумните, и си го открил на децата.

²⁶ Да, Оче, зашто таква беше волјата Твоја. Крај на средата

(Зачало 43)

²⁷ Сѐ ми е предадено од Мојот Отец и никој не Го познава Синот, освен Отецот; ниту Отецот Го познава некој, освен Синот; и кому што сака Синот да му открие.

²⁸ Дојдете при Мене сите изморени и обременети, и Јас ќе ве успокојам;

²⁹ земете го Мојот јарем на себе и поучете се од Мене, бидејќи сум кроток и смирен по срце, и ќе најдете мир за душите ваши;

³⁰ зашто јаремот Мој е благ и бремето Мое е лесно. Крај на четвртокот