Марко 3 - Свето Евангелие 2008

ГЛАВА 3

¹ И пак влезе во синагогата, а таму имаше еден човек со исушена рака.

² И внимаваа на Него, дали ќе го исцели во сабота, за да Го обвинат.

³ А Он му рече на човекот со исушената рака: – Застани насреде!

⁴ Ним, пак, им кажа: – Во сабота дозволено ли е да прави човек добро, или зло? Да спаси една душа, или да ја погуби? Но тие молчеа.

⁵ Па, кога ги изгледа со гнев, бидејќи му беше тешко поради нивните скаменети срца, му рече на човекот: – Протегни ја раката своја! И ја протегна, и таа му стана здрава, како и другата. Крај на саботата

(Зачало 11)

⁶ Фарисеите, штом излегоа, веднаш се собраа со иродовците на совет против Него, како да Го погубат.

⁷ Исус, пак, отиде со Своите ученици кон морето, и по Него одеше многу народ од Галилеја, и од Јудеја,

⁸ и од Ерусалим, и од Идумеја и оданде Јордан. Па и од Тир и Сидон, откако чуја какви дела правеше, во голем број дојдоа кај Него.

⁹ И им порача на учениците Свои да Му подготват кораб, поради народот, за да не Му додева;

¹⁰ зашто мнозина беше излекувал, така што, сите, кои беа болни, навалуваа на Него, за да се допрат до Него.

¹¹ И нечистите духови, штом ќе Го видеа, паѓаа пред Него, викаа и говореа: – Ти си Син Божји!

¹² Но Он строго им забрануваше да разгласуваат за Него. Крај на понеделникот

(Зачало 12)

¹³ Потоа, се искачи на гората и ги повика при Себе оние коишто Самиот сакаше, и тие дојдоа при Него.

¹⁴ И избра дванаесетмина да бидат со Него, и да ги испраќа да проповедаат;

¹⁵ и да имаат власт да лекуваат болести и да изгонуваат бесови;

¹⁶ првиот Симон, кого што го нарече Петар;

¹⁷ па Јаков Заведеев и брат му Јован, на кои им даде име Воанергес, што значи: синови на громовите;

¹⁸ потоа Андреј, Филип, Вартоломеј, Матеј, Тома, Јаков Алфеев, Тадеј, Симон Кананит

¹⁹ и Јуда Искариот, којшто и Го предаде. Крај на вторникот

(Зачало 13)

²⁰ Идојдоа во една куќа; и повторно се собра народ, така што тие не можеа ни леб да јадат.

²¹ И кога чуја Неговите домашни, отидоа да Го приберат, оти се говореше дека не бил на Себеси.

²² А книжниците, што беа слегнале од Ерусалим, велеа дека во Него е Велзевул и дека бесовите ги истерува со силата на кнезот на бесовите.

²³ И кога ги повика, им говореше во параболи: – Како може сатаната да изгонува сатана?

²⁴ Ако едно царство се раздели на делови, еден против друг, тоа царство не може да се одржи;

²⁵ и, ако еден дом се раздели на делови, еден против друг, тој дом не може да опстане;

²⁶ ако и сатаната се дигнал против себеси, и се разделил, не ќе може да се одржи: му дошол крајот и нему.

²⁷ Никој не може, кога ќе влезе во куќата на силен човек, да му ја ограби покуќнината, ако најнапред не го врзе силниот; и тогаш му ја зема покуќнината. Крај на средата

(Зачало 14)

²⁸ В истина, ви велам: на човечките синови ќе им се простат сите гревови и хули, какви и да бидат;

²⁹ ама, кој ќе похули на Светиот Дух, нему нема да му се прости никогаш, а ќе биде виновен пред Вечниот суд.

³⁰ Тоа го рече, оти велеа: – Нечист дух е во Него.

³¹ И дојдоа мајка Му и браќата Негови и, стоејќи надвор, порачаа да Го викнат.

³² А околу Него седеше народ. И Му рекоа: – Ете, мајка Ти, и браќата Твои, и сестрите Твои, надвор се и Те бараат.

³³ А Он им одговори, велејќи: – Која е Мојата мајка, или кои се браќата Мои?

³⁴ Па, откако ги погледна оние што седеа околу Него, рече: – Еве ги Мојата мајка и Моите браќа.

³⁵ Зашто оној што ја исполнува волјата Божја, тој Ми е брат, и сестра, и мајка. Крај на четвртокот