Марко 16 - Свето Евангелие 2008

ГЛАВА 16 (Зачало 70)

¹ Штом мина саботата, Марија Магдалина, Марија Јаковова и Саломија купија мириси, за да дојдат и да Го помазаат Исуса.

² И во првиот ден од седмицата, дојдоа на гробот многу рано, кога изгреваше сонцето,

³ па си говореа помеѓу себе: – Кој ќе ни го оттргне каменот од вратата на гробот?

⁴ И кога погледнаа, видоа дека каменот е оттргнат; а тој беше многу голем.

⁵ Штом влегоа во гробот, видоа еден млад човек, облечен во бели алишта, како седи од десната страна; и се уплашија.

⁶ А тој им рече: – Не бојте се! Вие Го барате Исуса Назареецот, – Распнатиот. Он воскресна, не е овде. Еве го местото каде што Го положија.

⁷ Но одете, кажете им на учениците Негови и на Петра, дека Он пред вас ќе отиде во Галилеја; таму ќе Го видите, како што ви беше рекол.

⁸ Па, штом излегоа, побегнаа од гробот, зашто ги опфати страв и ужас, и никому ништо не рекоа, бидејќи се плашеа. Крај на второто воскресно евангелие и на Мироносиците

(Зачало 71)

⁹ А Исус, кога воскресна во првиот ден од седмицата, се јави најнапред на Марија Магдалина, од која беше истерал седум демони.

¹⁰ Таа отиде и им јави на оние што беа со Него и што плачеа и ридаа;

¹¹ но тие, кога чуја дека е Он жив, и дека таа Го видела, не поверуваа.

¹² Потоа им се јави во поинаков лик на двајца од нив по патот, кога одеа в село.

¹³ И штом се вратија, тие им кажаа на останатите; ама и ним не им поверуваа.

¹⁴ Најпосле им се јави на единаесетте, кога беа на трпеза, и ги укори за нивното неверие и жестокосрдечност, зашто не им поверуваа на оние кои Го виделе воскреснат.

¹⁵ Па им рече: – Одете по цел свет и проповедајте го Евангелието на секое создание.

¹⁶ Којшто ќе поверува и ќе се крсти, ќе биде спасен; а којшто нема да поверува, ќе биде осуден.

¹⁷ А знаците на тие што ќе поверуваат, ќе бидат овие: со Моето име ќе истеруваат бесови, ќе говорат нови јазици;

¹⁸ ќе фаќаат змии и, ако нешто смртоносно испијат, нема да им наштети; на болни ќе полагаат раце и тие ќе оздравуваат.

¹⁹ А по разговорот со нив, Господ се вознесе на небото и седна од десната страна на Бога.

²⁰ Тие, пак, отидоа и проповедаа насекаде; и Господ го поткрепуваше словото нивно со чуда што се јавуваа. Амин! Крај на третото воскресно евангелие и на Вознесение Христово