Марко 13 - Свето Евангелие 2008

ГЛАВА 13 (Зачало 58)

¹ Акога излегуваше од храмот, еден од учениците Негови Му рече: – Учителе, гледај какви камења и какви згради!

² Исус му одговори и рече: – Ги гледаш ли овие големи згради? Ни камен на камен нема да остане овде, што не ќе биде урнат.

³ А кога седеше на Маслиновата Гора, спроти храмот, Го прашаа насамо Петар, Јаков, Јован и Андреј:

⁴ – Кажи ни кога ќе биде тоа и кој е знакот, кога ќе се изврши сето тоа?

⁵ Исус, одговарајќи им, почна да зборува: – Чувајте се, да не ве прелаже некој.

⁶ Оти мнозина ќе дојдат во Мое име, говорејќи дека сум Јас; и ќе прелажат мнозина.

⁷ А кога ќе чуете за војни и гласови за војни, не плашете се; зашто сето тоа треба да биде; ама тоа уште не е крајот.

⁸ Ќе се дигне народ против народ, и царство против царство; а на некои места ќе има и потреси, и глад, и маки. Тоа е почетокот на болките. Крај на петокот

(Зачало 59)

⁹ Но, вие чувајте се сами, зашто ќе ве предадат на судови; а по синагогите ќе ве бијат, и пред управници и пред цареви ќе бидете изведени заради Мене, за сведоштво пред нив.

¹⁰ И кај сите народи најнапред треба да се проповеда Евангелието.

¹¹ Кога, пак, ќе ве поведат за да ве предадат, не грижете се однапред што ќе говорите, ниту размислувајте; а она што ќе ви се даде во тој час, тоа кажете го; не сте вие кои ќе говорите, туку Светиот Дух.

¹² И брат братот ќе го предаде на смрт, и татко чедото, и ќе се дигнат децата против родителите, и ќе ги убијат.

¹³ Ќе бидете намразени од сите заради Моето име; кој ќе претрпи до крај, тој ќе биде спасен. Крај на понеделникот

(Зачало 60)

¹⁴ Акога ќе ја видите, „мерзоста на запустението“, како што рекол пророкот Даниил, да стои каде што не треба – кој чита, нека разбере – тогаш оние што се во Јудеја, нека бегаат по планините;

¹⁵ и кој е на покривот, да не слегува во куќата, ниту да влегува да земе нешто од куќата своја;

¹⁶ и кој е на нива, да не се враќа за да ја земе облеката своја!

¹⁷ Но, тешко на бремените и на оние што ќе дојат во тие дни.

¹⁸ Туку, молете се, бегањето ваше да не биде зиме!

¹⁹ Зашто во тие дни ќе биде мака, каква што не била до сега од почетокот на светот, што го создаде Бог, а и нема да биде.

²⁰ И, ако Бог не ги скратеше тие дни, тогаш не би се спа сил ниеден човек; но заради избраните кои ги избра Он, ќе ги скрати дните.

²¹ Тогаш, ако ви каже некој: еве, овде е Христос, или: ене, таму е, – не верувајте!

²² Бидејќи ќе се појават лажни христоси и лажни пророци, и ќе покажат знаци и чуда, за да ги прелажат, ако е можно, и избраните.

²³ Но вие – чувајте се! Ете, сѐ претходно ви кажав. Крај на вторникот

(Зачало 61)

²⁴ Во тие дни, по жалос та, сонцето ќе потемни и месечината нема да ја дава својата светлина,

²⁵ и ѕвездите небески ќе попаѓаат, и силите што се на небото ќе се разнишаат.

²⁶ И тогаш ќе Го видат Синот Човечки, како доаѓа на облаците, со голема сила и слава.

²⁷ Па ќе ги испрати ангелите Свои и ќе ги собере Своите избрани од четирите ветра, од крајот на земјата до крајот на небото.

²⁸ Со смоквата направете споредба: кога нејзините гранки ќе се подмладат и ќе пуштаат лисја, знаете дека е близу летото.

²⁹ Па така и вие, кога ќе видите дека сето тоа се случува, знајте дека е близу пред врата.

³⁰ Вистина ви велам: нема да помине овој род, додека сето тоа не се исполни.

(Зачало 62)

³¹ Небото и земјата ќе преминат, но зборовите Мои нема да преминат. Крај на средата

³² А за тој ден и час никој не знае, ни ангелите небесни, ниту Синот, а само Отецот.

³³ Внимавајте, бидете будни и молете се, оти не знаете кога ќе настане времето.

³⁴ Како што човек кој, заминувајќи, ја оставил куќата своја и дал власт на слугите свои, секому своја работа, и на вратарот му заповедал да биде буден;

³⁵ така бидете будни, зашто не знаете кога ќе дојде домаќинот на куќата, приквечер ли, или на полноќ, или кога петлите ќе пропејат, или наутро;

³⁶ па, да не дојде ненадејно и да ве затекне да спиете.

³⁷ А ова што ви го зборувам вам, им го зборувам и на сите: бидете будни!