Марко 1 - Свето Евангелие 2008

ГЛАВА 1 (Зачало 1)

¹ Пbочеток од Евангелието на Исуса Христа, Синот Божји,

² како што е напишано кај пророците: „Ете, Јас го испраќам пред лицето Твое Мојот ангел, којшто ќе го подготви Твојот пат пред Тебе“.

³ „Гласот на оној што вика во пустината: – Подгответе го патот Господов, и исправете ги патеките Негови“.

⁴ Се јави Јован, крштевајќи во пустината, и проповедаше покајно крштение, за прошка на гревовите.

⁵ И излегуваа при него од сиот Јудејски крај и од Ерусалим, и сите се крштеваа од него во реката Јордан, исповедувајќи ги своите гревови.

⁶ А Јован носеше облека од камилски влакна и појас од кожа околу половината своја, и јадеше скакулци и див мед.

⁷ И проповедаше, велејќи: – По мене доаѓа посилниот од мене, на Кого не сум достоен да се наведнам и да Му ги одврзам ремењето од обувките Негови;

⁸ јас ве крстив со вода, а Он ќе ве крсти со Духот Свети. Крај на неделата и на третиот час.

(Зачало 2)

⁹ И во оние дни, дојде Исус од Назарет Галилејски и се крсти од Јована во Јордан.

¹⁰ И кога излегуваше од водата, наеднаш виде како се отворија небесата, и Духот, во вид на гулаб, слегуваше над Него.

¹¹ И се чу глас од небесата: – Ти си Мојот возљубен Син, Кој е според Мојата волја. Крај на Богојавление, на утрената

¹² Веднаш потоа, Духот Го изведе во пустината.

¹³ И беше таму, во пустината, четириесет дни, искушуван од сатаната; беше со ѕверови и ангелите Му служеа.

¹⁴ А потоа, кога Јован беше предаден, дојде Исус во Галилеја и го проповедаше Евангелието на царството Божјо,

¹⁵ и велеше: – Времето се исполни и царството Божјо наближи; покајте се и верувајте во Евангелието. Крај на понеделникот и на шестиот час

(Зачало 3)

¹⁶ И одејќи покрај Галилејското Море, го виде Симона и брата му Андреја, како фрлаат мрежа во морето, зашто беа рибари.

¹⁷ Исус им рече: – Врвете по Мене и Јас ќе ве направам ловци на луѓе!

¹⁸ И тие веднаш ги оставија мрежите и тргнаа по Него.

¹⁹ Па штом одмина малку, го виде Јакова Заведеев и брата му Јована, исто така во кораб, како ги крпат мрежите свои;

²⁰ и веднаш ги повика. И тие, оставајќи го татка си Заведеја во коработ со наемниците, тргнаа по Него.

²¹ И дојдоа во Капернаум; и веднаш во саботата, влезе Он во синагогата и поучуваше.

²² И се чудеа на Неговата поука, оти Он ги учеше како Оној што има власт, а не како книжниците. Крај на вторникот

(Зачало 4)

²³ И маше во синагогата нивна човек со нечист дух, и извика, говорејќи:

²⁴ – О, што имаш Ти со нас, Исусе Назарејче! Си дошол ли да нѐ погубиш? Те знам Кој си Ти, Светец Божји!

²⁵ Но Исус му забрани, велејќи: – Молкни и излези од него!

²⁶ Тогаш нечистиот дух го стресе, па извика со висок глас и излезе од него.

²⁷ И сите се стресоа од ужас, така што, еден со друг се прашуваа и велеа: – Што е ова? И какво е ова ново учење, та со власт и на нечистите духови им заповеда, и тие Му се покоруваат.

²⁸ И наеднаш се разнесе глас за Него по целиот крај галилејски. Крај на средата

(Зачало 5)

²⁹ Па откако излегоа од синагогата, дојдоа со Јакова и Јована во куќата на Симона и Андреја.

³⁰ А тешта му на Симона лежеше од треска; и веднаш Му јавија за неа.

³¹ И кога пристапи, ја фати за рака и ја подигна; и треската веднаш ја остави; и таа стана и им служеше.

³² А приквечер, кога заоѓаше сонцето, носеа при Него секакви болни и бесни.

³³ И целиот град беше се собрал пред портата.

³⁴ И излекува мнозина што страдаа од разни болести; истера многу бесови, и не дозволуваше бесовите да говорат, дека знаат оти Он е Христос.

(Зачало 6)

³⁵ Аутрината, во темни зори, стана, излезе и отиде во пусто место, и таму се молеше. Крај на четвртокот

³⁶ А Симон, и оние што беа со Него, поитаа по Него;

³⁷ па кога Го најдоа, Му рекоа: – Сите Те бараат.

³⁸ Он им рече: – Да појдеме до блиските села и градови, и таму да проповедам, бидејќи затоа сум излегол.

³⁹ И проповедаше во нивните синагоги, по цела Галилеја и изгонуваше бесови.

⁴⁰ И дојде при Него еден лепрозен, па, молејќи Го, падна пред Него на колена и Му рече: – Ако сакаш, можеш да ме очистиш.

⁴¹ А Исус, кога се смили, протегна рака, се допре до него и му рече: – Сакам, очисти се!

⁴² И штом го рече тоа, се изгуби лепрата од него, и тој стана чист;

⁴³ па откако му заповеда, веднаш го испрати.

⁴⁴ И му рече: – Гледај, никому ништо не кажувај; но оди, покажи му се на свештеникот и принеси дар за твоето очистување, како што заповедал Мојсеј, ним за сведоштво. Крај на саботата

⁴⁵ А тој, штом излезе, почна да раскажува многу и да разгласува, така што Исус не можеше јавно да влезе во градот, а се наоѓаше надвор во осамени места. И приоѓаа кај Него отсекаде.