Лука 3 - Свето Евангелие 2008

ГЛАВА 3 (Зачало 9)

¹ Во петнаесеттата година од владеењето на царот Тибериј, кога Понтиј Пилат беше управител во Јудеја, а Ирод – четворовласник на Галилеја, и Филип брат му, четворовласник во Итуреја и Трахонитската област, и Лисаниј – четворовласник во Авилинија,

² при првосвештениците Ана и Кајафа, зборот Божји беше кон Јована, синот Захариев, во пустината.

³ И тој го обиколи целиот крај околу Јордан, проповедајќи покајно крштение за прошка на гревовите,

⁴ како што е напишано во Книгата, според зборовите на пророкот Исаија, кој вели: „Гласот на оној што вика во пустината: – подгответе го патот Господов и исправете ги патеите Негови;

⁵ секоја долина ќе се исполни и секоја планина и секој рид ќе се снижат; кривините ќе се исправат и нерамните патишта ќе се израмнат,

⁶ и секое тело ќе го види спасението Божјо!“

⁷ А на луѓето што доаѓаа при него да ги крсти, им велеше: – Породи змиини, кој ве научи да бегате од гневот што иде?

⁸ Но, направете плодови достојни за покајание и не почнувајте да говорите во себе: Авраама го имаме за татко! Зашто ви велам, дека Бог може и од овие камења да издигне чеда на Авраама.

⁹ Оти веќе и секирата стои при коренот на дрвото; и секое дрво што не дава добар плод, се сече и фрла во оган.

¹⁰ И го прашаа луѓето, велејќи: – Тогаш што треба да правиме?

¹¹ А тој им одговори и рече: – Кој има две облеки, нека му даде на оној што нема; и кој има храна, нека го прави истото.

¹² Дојдоа и цариници да се крстат од него, и му рекоа: – Учителе, што да правиме?

¹³ А тој им рече: – Не барајте повеќе, отколку што е определено.

¹⁴ Го прашаа и некои војници, говорејќи: – А ние што да правиме? И им рече: – Никого не присилувајте, никого не клеветете, и бидете задоволни со вашите плати.

¹⁵ А на луѓето што чекаа и си помислуваа во срцата свои за Јована, да не е тој Христос,

¹⁶ Јован им одговараше на сите, велејќи: – Јас ве крштевам со вода; ама доаѓа посилен од мене, Кому што не сум достоен да Му ги одврзам ремењето на обувките Негови: Он ќе ве крсти со Дух Свети и со оган.

¹⁷ Нему лопатата Му е во раката Негова и Он ќе го очисти гумното Свое, и ќе го собере житото во амбарот Свој, а плевата ќе ја изгори со неизгаслив оган.

¹⁸ И уште многу друго му проповедаше на народот, утешувајќи го. Крај спроти Богојавление

(Зачало 10)

¹⁹ А Ирод четворовласникот, укорен од него заради Иродијада, жената на брата му, и заради сите лоши работи што ги беше направил Ирод,

²⁰ покрај сето тоа, уште и го затвори Јована во затвор.

²¹ А кога се крсти сиот народ, и Исус, по крштението, кога се помоли на Бога, се отвори небото,

²² и Светиот Дух слезе на Него во телесен вид, како гулаб, и се чу глас од небото, кој велеше: Ти си Мојот возљубен Син, на Тебе е Мојата волја. Крај на понеделникот

(Зачало 11)

²³ Кога почна Исус да проповеда, имаше околу триесет години и беше, како што мислеа, син Јосифов, Илиев,

²⁴ Мататов, Левиин, Мелхиев, Јанаев, Јосифов,

²⁵ Мататиев, Амосов, Наумов, Еслимов, Нангеов,

²⁶ Маатов, Мататиев, Симеев, Јосифов, Јудин,

²⁷ Јоананов, Рисаев, Зоровавелов, Салатиилев, Нириев,

²⁸ Мелхиев, Адиев, Косамов, Елмодамов, Иров,

²⁹ Јосиев, Елиезеров, Јоримов, Мататов, Левиин,

³⁰ Симеонов, Јудин, Јосифов, Јонанов, Елиакимов,

³¹ Мелеаев, Маинанов, Мататаев, Натанов, Давидов,

³² Јесеев, Овидов, Воозов, Салмонов, Наасонов,

³³ Аминадавов, Арамов, Есромов, Фаресов, Јудин,

³⁴ Јаковов, Исааков, Авраамов, Тарин, Нахоров,

³⁵ Серухов, Рагавов, Фалеков, Еверов, Салин,

³⁶ Каинанов, Арфаксадов, Симов, Ноев, Ламехов,

³⁷ Матусалов, Енохов, Јаредов, Малелеилов, Каинанов,

³⁸ Еносов, Ситов, Адамов, Божји.