Лука 23 - Свето Евангелие 2008

ГЛАВА 23 (Зачало 110)

¹ И сето мноштво стана, па Го поведоа кај Пилата, Крај на вторникот од Сирната седмица

² и почнаа да Го обвинуваат, говорејќи: – Го најдовме Овој како го бунтува народот наш и забранува да се дава данок на царот, и вели за Себе дека Он е Христос – Цар.

³ А Пилат Го праша, велејќи: – Ти ли си Царот Јудејски? Он одговори и му рече: – Ти велиш.

⁴ Пилат им рече на првосвештениците и на народот: – Јас не наоѓам никаква вина кај Овој Човек.

⁵ Но, тие и понатаму велеа, дека Он го изопачува народот и поучува по цела Јудеја, почнувајќи од Галилеја па довде.

⁶ А Пилат штом чу за Галилеја, праша: – Зар Овој Човек е Галилеец?

⁷ И кога разбра дека е Он од областа Иродова, Го испрати при Ирода, кој во тие денови, исто така, беше во Ерусалим.

⁸ Ирод, кога Го виде Исуса, се зарадува многу, бидејќи одамна имаше желба да Го види, зашто беше слушал многу за Него, па се надеваше да види некое чудо направено од Него,

⁹ и Му поставуваше многу прашања, ама Он ништо не одговараше.

¹⁰ Но, првосвештениците и книжниците стоеја и постојано Го обвинуваа.

¹¹ А Ирод, со војниците свои, кога Го понизи и Му облече светла облека, повторно Го испрати при Пилата.

¹² И во тој ден Пилат и Ирод станаа пријатели, оти порано беа скарани помеѓу себе.

¹³ А Пилат ги повика првосвештениците и управниците, и народот,

¹⁴ па им рече: – Ми Го доведовте Овој Човек како бунтовник на народот; а еве, јас пред вас Го испитав и не најдов кај Него никаква вина во она, за што Го обвинувате;

¹⁵ и Ирод исто така, бидејќи Го испратив и кај него; и ете, Он не направил ништо, за што би заслужувал смрт;

¹⁶ па, затоа ќе Го казнам и ќе Го пуштам.

¹⁷ А тој требаше за празникот да им ослободи еден затвореник.

¹⁸ Но сиот народ повика, говорејќи: – Земи Го Овој, а пушти ни го Варава!

¹⁹ Варава беше фрлен во затвор, поради некаква буна во градот и убиство.

²⁰ Пилат одново извика гласно, дека сака да Го пушти Исуса.

²¹ Но, тие викаа, велејќи: – Распни Го, распни!

²² Тој, и по третпат им рече: – Та какво зло направил Овој? Јас не најдов во Него ништо, за што заслужува смрт; па затоа ќе Го казнам и ќе Го пуштам.

²³ Но тие постојано навалуваа со голем повик и бараа да биде распнат; и надвладеа нивниот вик и оној на првосвештениците.

²⁴ И Пилат пресуди да им биде според желбата нивна,

²⁵ и им го пушти затворениот, којшто беше во темница за бунт и убиство, за кого што молеа; а Исуса им Го предаде на нивната волја.

²⁶ И кога Го поведоа, го фатија некојси Симон Киринеец, кој се враќаше од нива, и му го кладоа крстот, за да го носи по Исуса.

²⁷ А по Него одеа многу луѓе и жени, кои плачеа и ридаа за Него.

²⁸ Но Исус, кога се заврти кон нив, им рече: – Ќерки ерусалимски, не плачете за Мене, туку плачете за себе и за своите деца;

²⁹ зашто, ете, наближуваат деновите кога ќе се рече: – блазе на неплодните и на утроби што не родиле, и на гради што не доеле.

³⁰ Тогаш ќе почнат да им велат на планините: – паднете врз нас; и на ридиштата: – покријте нѐ!

³¹ Зашто, кога ова го прават со зеленото дрво, што ќе биде тогаш со сувото?

(Зачало 111)

³² Водеа и двајца злосторници, за да ги погубат со Него.

³³ И кога дојдоа на местото, наречено Черепница, Го распнаа таму Него и злосторниците, едниот оддесно, а другиот одлево.

³⁴ А Исус рече: – Оче, прости им, оти не знаат што прават! Изостави во четвртокот од Сирната седмица И кога ги делеа алиштата Негови, фрлија ждрепка.

³⁵ А народот стоеше и гледаше; се потсмеваа заедно со народот и началниците, велејќи: – Други спаси, нека се спаси и Себеси, ако е Он Христос, избраникот Божји.

³⁶ Исто така и војниците се подигруваа со Него; приближувајќи се, тие му принесуваа оцет,

³⁷ и велеа: – Ако си ти Царот Јудејски, спаси се Самиот!

³⁸ А над Него имаше натпис, напишан на грчки, латински и еврејски: Овој е Царот Јудејски. Читај на Вел. Петок, вечерта

³⁹ Еден од распнатите злосторници хулеше на Него, велејќи: – Ако си Ти Христос, спаси се Себеси и нас!

⁴⁰ А другиот, кога одговори, го искара и рече: – Зар и од Бога не се плашиш, кога си веќе и самиот осуден?

⁴¹ Ние сме праведно осудени, зашто примивме заслужена казна според нашите дела; но, Он ништо лошо не направил.

⁴² Па Му рече на Исуса: – Сети се на мене, Господи, кога ќе дојдеш во царството Свое!

⁴³ Исус му рече: – Вистина ти велам: денеска ќе бидеш со Мене во рајот! Премини на Вел. Петок, вечерта, на зачало 113-то според Матеја Читај во четвртокот од Сирната седмица

⁴⁴ А беше веќе околу шестиот час и настана мрак по целата земја, до деветтиот час;

⁴⁵ и сонцето потемне, и храмовата завеса се расцепи преку средината.

⁴⁶ И Исус извика гласно и рече: – Оче, во Твоите раце Го предавам Својот дух! И штом го рече тоа, издивна.

⁴⁷ А стотникот, кога виде што стана, Го прослави Бога и рече: – Навистина Овој Човек бил праведник!

⁴⁸ И сиот народ, кој беше се собрал да гледа, кога виде што стана, се враќаше со удирање в гради.

⁴⁹ А сите Негови познати, и жените кои Го следеа од Галилеја, стоеја подалеку и го гледаа тоа. Крај на 8-то евангелие за св. страданија Христови и на 6-от час

⁵⁰ И ете, некојси, по име Јосиф, член на Советот, човек добар и праведен,

⁵¹ тој не беше учествувал во Советот и во делата нивни, од Ариматеја, град јудејски, којшто и самиот го очекуваше царството Божјо,

⁵² отиде при Пилата и го измоли телото Исусово;

⁵³ па Го симна и го обви во платно, Го положи во издлабен гроб, во кој уште никој не беше положен.

⁵⁴ Тој ден беше петок, и саботата веќе настапуваше.

⁵⁵ По него одеа и жените, кои беа дошле со Исуса од Галилеја, и го видоа гробот и полагањето на телото Негово;

⁵⁶ па, откако се вратија, подготвија мириси и миро, а во саботата одморија, според заповедта. Крај на четвртокот од Сирната седмица