Лука 21 - Свето Евангелие 2008

ГЛАВА 21

¹ Кога ги подигна очите, виде како богатите ги пуштаа своите прилози во храмовата каса;

² виде исто така и една бедна вдовица, која пушти таму две лепти,

³ и рече: – Вистина ви велам, оваа бедна вдовица пушти повеќе од сите;

⁴ сите овие дадоа приноси на Бога од својот вишок; таа, пак, од немаштијата своја, даде сѐ што имаше, – целата својата живејачка. Крај на саботата

(Зачало 104)

⁵ И кога некои говореа за храмот, дека е украсен со убави камења и приноси, Он рече:

⁶ – Ќе дојдат дни и од сето ова што гледате, нема да остане ни камен на камен, сѐ ќе биде урнато.

⁷ И Го прашаа, говорејќи: – Учителе, а кога ќе биде тоа и каков е знакот, дека ќе стане тоа? Изостави во средата

(Зачало 105)

⁸ Он рече: – Чувајте се, да не ве прелажат; зашто мнозина ќе дојдат во Мое име и ќе зборуваат оти сум Јас, и дека наближи времето. Но, не одете по нив.

⁹ А кога ќе чуете за војни и бунтови, не плашете се; сето тоа треба да стане, ама сѐ уште не е крајот. Изостави во саботата Читај во средата

¹⁰ Тогаш им рече: – Ќе стане народ против народ и царство против царство;

¹¹ а на некои места ќе има и големи потреси, и глад и помор; ќе има стравотии и големи знаци на небото. Изостави во средата

(Зачало 106)

¹² Апред сето тоа, ќе стават раце на вас и ќе ве изгонат, предавајќи ве во синагоги и во затвори, и ќе ве водат пред цареви и управници, заради Моето име;

¹³ а тоа ќе стане, – вам за сведоштво.

¹⁴ И така, ставете си при срце да не размислувате однапред што ќе одговарате,

¹⁵ зашто Јас ќе ви дадам уста и премудрост, на која не ќе можат да се противат и да одговорат сите ваши противници.

¹⁶ Ќе бидете предадени, исто така, и од родители и од браќа, и од роднини и пријатели, а некои од вас ќе бидат и убиени;

¹⁷ и ќе бидете намразени од сите, заради Моето име;

¹⁸ но, ни влакно од главата ваша нема да загине;

¹⁹ со трпение спасувајте си ги душите. Крај на вторникот Читај во средата

²⁰ А кога ќе го видите Ерусалим опколен од војски, знајте, дека наближило неговото запустување.

²¹ Тогаш, оние што се наоѓаат во Јудеја, нека бегаат во планините; и кои се во градот, да излезат од него; а кои се по околните места, нека не влегуваат во него,

²² зашто тоа се дни на одмазда, за да се изврши сѐ што е напишано.

²³ Но, тешко на бремените и на доилките во тие дни: зашто, голема неволја ќе биде на земјата, и гнев врз овој народ;

²⁴ и ќе паднат од сечилото на мечот, и ќе бидат одведени во плен по сите народи; а Ерусалим ќе го газат незнабошци, сѐ додека не завршат времињата на незнабошците. Крај на средата Читај во саботата

²⁵ И ќе има знаци на сонцето и на месечината и на ѕвездите; а на земјата – тага кај народите од неизвесноста и од бучењето на морето, и од брановите;

²⁶ луѓето, пак, ќе умираат од страв и од исчекување на она што ќе го снајде светот, зашто и силите небески ќе се разнишаат;

²⁷ и тогаш ќе го видат Синот Човечки како доаѓа на облаци, со сила и слава голема. Изостави во саботата

(Зачало 107)

²⁸ Акога ќе почне тоа да се случува, исправете се и подигнете ги главите свои, зашто наближува вашето спасение.

²⁹ И им кажа парабола: – Погледајте ја смоквата и сите дрвја;

³⁰ кога ќе видите дека потеруваат, сами знаете оти летото е веќе близу.

³¹ Па така, кога ќе видите дека се случува ова, знајте дека се приближи царството Божјо.

³² Вистина ви велам, нема да премине овој род, додека сето тоа не се исполни. Читај во саботата

³³ Небото и земјата ќе преминат, но зборовите Мои нема да преминат. Крај на четвртокот

³⁴ Но пазете се; вашите срца да не се оддадат на прејадување и пијанство, и грижи за овој свет, за да не ве затекне оној ден ненадејно;

³⁵ зашто тој ќе дојде како примка за сите што живеат по целата земја;

³⁶ бидете будни во секое време и молете се, за да го избегнете сето она што ќе настане, и да се исправите пред Синот Човечки. Крај на саботата

(Зачало 108)

³⁷ Дење Он проповедаше во храмот, а ноќе излегуваше и ноќеваше во гората, наречена Маслинова.

³⁸ И сиот народ доаѓаше наутро при Него во храмот, за да Го слуша.