Јован 7 - Свето Евангелие 2008

ГЛАВА 7 (Зачало 25)

¹ Потоа одеше Исус по Галилеја, зашто не сакаше да оди во Јудеја, оти Јудејците сакаа да Го убијат.

² Наближуваше, пак, јудејскиот празник – Правење сеници.

³ Тогаш браќата Негови Му рекоа: – Излези одовде и отиди во Јудеја, та и учениците Твои да ги видат делата што ги вршиш.

⁴ Оти никој не прави нешто тајно, кога и самиот сака да се прочуе. Ако Ти ги вршиш овие работи, тогаш покажи се пред светот.

⁵ Зашто и браќата Негови не веруваа во Него.

⁶ А на тоа Исус им одговори: – Моето време уште не дошло, а за вас времето секогаш е погодно.

⁷ Светов вас не може да ве мрази, а Мене Ме мрази, зашто Јас сведочам за него, дека делата негови се лоши.

⁸ Вие отидете на овој празник; Јас нема да излезам на празникот, оти времето Мое уште не се исполнило.

⁹ Кога им го кажа ова, Он остана во Галилеја.

¹⁰ Но кога браќата Негови отидоа, отиде и Он на празникот, ама не јавно, туку тајно.

¹¹ А Евреите Го бараа на празникот и велеа: – Каде е Оној?

¹² И многу расправии имаше во народот за Него: едни зборуваа дека е добар; а други велеа: не, туку го заблудува народот.

¹³ Ама никој не зборуваше за Него отворено, поради стравот од Јудејците. Крај на вторникот

(Зачало 26)

¹⁴ Веднаш, пак, на Преполовението на празникот, влезе Исус во храмот и поучуваше.

¹⁵ И се чудеа Јудејците, велејќи: – Како ги познава Овој книгите, кога не учел?

¹⁶ Тогаш им одговори Исус и рече: – Учењето Мое не е Мое, туку на Оној Којшто Ме испрати;

¹⁷ и ако некој сака да ја исполнува волјата Негова, ќе разбере дали ова учење е од Бога, или Јас Самиот од Себе зборувам.

¹⁸ Којшто говори сам од себе, тој ја бара својата слава; а кој ја бара славата на Оној што Го испратил, Он е вистина и во Него нема неправда.

¹⁹ Зар Мојсеј не ви даде Закон? Ама никој од вас не го исполнува Законот. Зошто сакате да Ме убиете?

²⁰ Народот одговори и рече: – Бесот ли Те фатил? Кој сака да Те убие?

²¹ Одговори Исус и им рече: – Едно дело извршив и сите се чудите.

²² Мојсеј ви даде обрезание – макар што тоа не е од Мојсеја, а од татковците – и вие во сабота обрезувате човек.

²³ Ако човек се обрезува во сабота, за да не се наруши Законот Мојсеев, на Мене ли се гневите што цел човек направив здрав во сабота?

²⁴ Не судете според надворешноста, туку судете со праведен суд!

²⁵ Тогаш некои од Ерусалим рекоа: – Не е ли Овој, Кого што Го бараат за да Го убијат?

²⁶ Ете, јавно говори и ништо не Му велат; да не се увериле и началниците, дека е Он навистина Христос?

²⁷ Но, Овој Го знаеме од каде е, а кога ќе дојде Христос, никој не ќе знае од каде е.

²⁸ Тогаш Исус, поучувајќи во храмот, извика гласно и рече: – И Мене Ме познавате, и знаете од каде сум; ама Сам од Себе не дојдов, но има еден Вистински, Кој Ме испрати и Кого вие не Го познавате.

²⁹ Јас, пак, Го знам, оти сум од Него и Он Ме испрати.

³⁰ Тогаш сакаа да Го фатат; ама никој не кладе рака на Него, бидејќи уште не беше дошол часот Негов. Крај на средата

³¹ И мнозина од народот поверуваа во Него и велеа: кога ќе дојде Христос, зар ќе направи поголеми чуда отколку што направи Овој?

³² Чуја фарисеите дека народот така зборува за Него, па фарисеите и првосвештениците испратија слуги да Го фатат.

³³ Тогаш Исус им рече: – Уште малку време сум со вас, а потоа ќе отидам при Оној, Кој што Ме испрати.

³⁴ Ќе Ме барате и нема да Ме најдете; и каде што сум Јас, вие не можете да дојдете.

³⁵ А Јудејците си рекоа помеѓу себе: каде ќе оди Овој, па да не можеме да Го најдеме? Да не сака да оди при расејаните меѓу Елините, та и Елините да ги поучува?

³⁶ Што значат овие зборови: ќе Ме барате и не ќе Ме најдете; и каде што сум Јас, вие не можете да дојдете?!

(Зачало 27)

³⁷ Аво последниот голем ден од празникот, застана Исус и извика со висок глас, велејќи: – Кој е жеден, нека дојде при Мене да пие!

³⁸ Кој верува во Мене, од неговата утроба, како што е речено во Писмото, ќе потечат реки од жива вода.

³⁹ А ова го рече за Духот, Кого ќе Го примат оние што веруваат во Него; оти Светиот Дух уште не им беше даден, бидејќи Исус уште не беше прославен.

⁴⁰ А мнозина од народот, кога ги чуја овие зборови, рекоа: – Навистина, Овој е пророк!

⁴¹ Други велеа: – Овој е Христос! А некои рекоа: – Зар од Галилеја ќе дојде Христос?

⁴² Не е ли речено во Писмото, дека Христос ќе дојде од семето Давидово и од гратчето Витлеем, од каде што беше Давид?

⁴³ И така настана во народот расправија за Него.

⁴⁴ А некои од нив сакаа да Го фатат, но никој не стави рака врз Него.

⁴⁵ Дојдоа, пак, слугите кај првосвештениците и фарисеите и овие им рекоа: – Зошто не Го доведовте?

⁴⁶ А слугите одговорија: – Никогаш човек не говорел така, како Овој Човек.

⁴⁷ Тогаш им одговорија фарисеите: – Да не се прелагавте и вие?

⁴⁸ Поверувал ли некој од началниците и фарисеите во Него?

⁴⁹ Но, овој народ, којшто не го знае Законот, е проклет.

⁵⁰ Никодим, пак, кој беше отишол при Него ноќе, а беше еден од нив, им рече:

⁵¹ – Осудува ли нашиот Закон човек, додека најнапред не го сослушаат и не узнаат што прави?

⁵² А тие му одговорија и рекоа: – Да не си и ти од Галилеја? Испитај и види дека пророк од Галилеја не се јавил. Изостави на Духовден и премини на зачало 29

⁵³ И секој си отиде во својот дом.