Јован 5 - Свето Евангелие 2008

ГЛАВА 5 (Зачало 14)

¹ Потоа имаше празник, и се искачи Исус во Ерусалим.

² А во Ерусалим, при Овчата порта, има бања, по еврејски наречена Витезда, која има пет тремови;

³ во нив лежеа мнозина болни, слепи, куци, исушени, кои очекуваа да се раздвижи водата,

⁴ зашто одвременавреме слегуваше во бањата ангел Господов и ја раздвижуваше водата; и кој прв ќе влезеше по раздвижувањето на водата, оздравуваше од каква болест и да боледуваше. Крај на осветување на вода

⁵ Беше таму и еден човек, кој боледувал триесет и осум години.

⁶ Исус, кога го виде како лежи и штом узна дека од многу години боледува, му рече: – Сакаш ли да оздравиш?

⁷ Болниот Му одговори: – Да, Господи! Ама немам човек да ме спушти во бањата кога ќе се раздвижи водата; додека, пак, јас дојдам, друг слегува пред мене.

⁸ Исус му рече: – Стани, земи си ја постелката своја и оди си дома!

⁹ И веднаш оздраве човекот, ја зеде постелката своја и одеше. А тој ден беше сабота.

¹⁰ Евреите, пак, му рекоа на исцелениот: – Сабота е, и не треба да ја земаш својата постелка.

¹¹ Но тој им одговори: – Оној што ме излечи ми рече: земи ја постелката своја и оди!

¹² А тие го прашаа: – Кој е Човекот што ти рече: земи ја постелката своја и оди?

¹³ Но исцелениот не знаеше кој е, зашто Исус беше се оддалечил, оти на тоа место имаше многу народ.

¹⁴ А потоа Исус го сретна во храмот и му рече: – Ете, сега си здрав и не греши веќе, за да не те снајде нешто полошо.

¹⁵ А човекот отиде и им кажа на Јудејците дека Исус е, што го излечи. Крај на неделата

¹⁶ И затоа Јудејците Го гонеа Исуса и сакаа да Го убијат, оти тоа го правеше во сабота.

¹⁷ А Исус им одговараше: Мојот Отец досега работи, и Јас работам.

(Зачало 15)

¹⁸ Затоа Јудејците уште повеќе сакаа да Го убијат, оти не само што ја нарушуваше саботата, туку и Бога Го нарекуваше Свој Отец, правејќи се еднаков со Бога.

¹⁹ А Исус им одговори на тоа и рече: – Вистина, вистина ви велам: Синот не може да прави ништо Сам од Себе, ако не Го види Отецот да прави; оти, она што го прави Он, истото тоа го прави и Синот.

²⁰ Зашто Отецот Го сака Својот Син и Му покажува сѐ што прави Самиот; и ќе Му покаже дела поголеми од овие, за да се чудите вие.

²¹ Оти, како што Отецот воскреснува мртви и оживува, така и Синот ги оживува кои што сака.

²² Отецот не суди никого, но целиот суд го предаде на Синот;

²³ та сите да Го почитуваат Синот, како што Го почитуваат Отецот. Кој не Го почитува Синот, тој не Го почитува ни Отецот, Кој што Го испратил.

(Зачало 16)

²⁴ Вистина, вистина ви велам: којшто го слуша словото Мое и верува во Оној Којшто Ме испрати, ќе има живот вечен и нема да дојде на суд, а преминал од смрт во живот. Крај на средата

²⁵ Вистина, вистина ви зборувам: иде часот и дошол веќе, кога мртвите ќе го чујат гласот на Синот Божји, и штом го чујат, ќе оживеат.

²⁶ Оти, како што Отецот има живот во Себе, така Му даде и на Синот да има живот во Себе;

²⁷ и Му даде власт да суди, оти е Син Човечки.

²⁸ Не чудете се на ова, зашто иде часот кога сите, кои се во гробовите, ќе го чујат гласот на Синот Божји,

²⁹ и ќе излезат: кои правеле добро ќе воскреснат за живот, а кои правеле зло, ќе воскреснат за осудување.

³⁰ Но Јас ништо не можам да правам Сам од Себе. Како што слушам, така и судам, и Мојот суд е праведен, оти не ја барам Мојата волја, а волјата на Отецот, Којшто Ме испрати. Крај на четвртокот и на мртвите

(Зачало 17)

³¹ Ако Јас сведочам Сам за Себе, сведоштвото Мое нема да биде вистинско.

³² Но има Друг што сведочи за Мене; и знам дека е вистинско сведоштвото, со кое Он сведочи за Мене.

³³ Вие праќавте при Јована и тој ви посведочи за вистината.

³⁴ Ама Јас не го примам сведоштвото од човек; туку го кажувам ова, за да се спасите вие.

³⁵ Тој беше светило, кое гори и свети, а вие малку време сакавте да се порадувате на неговата светлина.

³⁶ Но Јас имам поголемо сведоштво од Јовановото; оти делата што Ми ги даде Отецот да ги извршам, самите тие дела, кои ги извршувам Јас, сведочат за Мене дека Ме пратил Отецот.

³⁷ И Отецот, Којшто Ме испрати, Самиот посведочи за Мене. А вие ни гласот Негов никогаш не сте го чуле, ниту лицето Негово сте го виделе.

³⁸ И зборовите Негови не се во вас, зашто не верувате во Оној, Кого Го испратил Он.

³⁹ Изучувајте го Писмото, зашто вие мислите дека преку него ќе имате живот вечен; и тоа сведочи за Мене.

⁴⁰ Но не сакате да дојдете при Мене, за да имате живот.

⁴¹ Од луѓе слава не примам,

⁴² но ве разбрав, дека во себе љубов Божја немате.

⁴³ Јас дојдов во името на Мојот Отец и не Ме примате; а некој друг ако дојде во свое име, него ќе го примите.

⁴⁴ Како можете вие да поверувате, кога примате слава еден од друг, а славата што е од Единиот Бог, не ја барате?

⁴⁵ Немојте да мислите дека Јас ќе ве обвинам пред Отецот; има кој да говори против вас – Мојсеј, на кого вие се надевате.

⁴⁶ Оти ако бевте му верувале на Мојсеја, и Мене ќе Ми поверувавте, зашто тој пишуваше за Мене.

⁴⁷ Ако, пак, на неговите Писанија не поверувате, како тогаш ќе им поверувате на Моите зборови?