Јован 3 - Свето Евангелие 2008

ГЛАВА 3 (Зачало 8)

¹ Меѓу фарисеите беше еден човек по име Никодим, кнез јудејски.

² Тој дојде при Исуса ноќно време и Му рече: – Рави! Знаеме дека Ти си учител, дојден од Бога, зашто никој не може да ги прави овие чуда што ги правиш Ти, ако со него не е Бог.

³ Му одговори Исус и рече: – Вистина, вистина ти велам, ако некој не се роди одозгора, не може да го види царството Божјо.

⁴ Никодим Му рече: – Како може човек да се роди, кога е стар? Зар може по вторпат да влезе во утробата на мајка си и да се роди?

⁵ А Исус му одговори: – Вистина, вистина ти велам: ако некој не се роди од вода и Дух, не може да влезе во царството Божјо;

⁶ зашто, роденото од тело – тело е; а роденото од Дух – дух е.

⁷ Затоа, не чуди се што ти реков: вие треба да се родите одозгора;

⁸ Духот дише каде што сака и гласот Негов го слушаш, ама не знаеш од каде иде и на каде оди; така е со секој човек роден од Дух.

⁹ Никодим Му одговори и рече: – Како може тоа да биде?

¹⁰ Исус одговори и Му рече: – Ти си учител Израилев, па тоа ли не го знаеш?

¹¹ Вистина, вистина ти велам: ние зборуваме за она што знаеме и сведочиме за она што сме виделе; а вие нашето сведоштво не го примате.

¹² Кога за земни работи ви говорев и не верувавте, како ќе поверувате ако би ви говорел за небесни?

(Зачало 9)

¹³ Никој не се искачил на небо, освен Синот Човечки, Којшто слезе од небото и Кој е на небото.

¹⁴ И како што Мојсеј ја издигна змијата во пустината, така треба да се издигне и Синот Човечки,

¹⁵ та секој што верува во Него, да не загине, но да има живот вечен. Крај на четвртокот

(Зачало 10)

¹⁶ Зашто Бог толку го возљуби светот, та Го даде Својот Единороден Син, па секој што верува во Него да не погине, но да има живот вечен.

¹⁷ Бидејќи Бог не Го испра ти Својот Син во светот за да му суди на светот, туку светот да се спаси преку Него. Крај на неделата пред Воздвижение

¹⁸ Којшто верува во Него, нема да биде суден, а кој не верува, тој веќе е осуден, оти не поверувал во името на Единородниот Син Божји.

¹⁹ А овој суд е затоа што Светлината дојде на светот, ама на луѓето повеќе им омиле темнината отколку светлината, оти нивните дела беа лоши.

²⁰ Зашто секој што прави зло, ја мрази светлината и не оди кон светлината, за да не бидат осудени неговите дела, оти се лукави.

²¹ А оној што твори вистина, оди кон светлината, за да се видат неговите дела, бидејќи се по Бога извршени. Крај на вторникот

(Зачало 11)

²² Потоа дојде Исус со учениците Свои во земјата јудејска, и таму живееше со нив, и крштеваше.

²³ А Јован крштеваше во Енон, близу Салим, зашто таму имаше многу вода; и доаѓаа и се крштеваа,

²⁴ оти Јован уште не беше фрлен в затвор.

²⁵ Тогаш настана расправија меѓу учениците Јованови и Јудејците околу очистувањето.

²⁶ И дојдоа при Јована и му рекоа: – Учителе, Оној што беше со тебе оданде Јордан и за Кого ти сведочеше, ете, Он крштева и сите одат при Него.

²⁷ А Јован одговори и рече: – Не може човек ништо да прими, ако не му е дадено од небото.

²⁸ Вие самите сте мои сведоци, дека реков: јас не сум Христос, но сум испратен пред Него.

²⁹ Оној што има невеста, младоженец е; а пријателот на младоженецот, кој стои и го слуша, многу се радува на гласот од младоженецот. Оваа, пак, моја радост се исполни.

³⁰ Он треба да расте, а јас да се смалувам.

³¹ Кој доаѓа одозгора, тој е над сите; а кој е од земјата, земен е и како земен зборува. Кој доаѓа од небото, над сите е.

³² И за она што виде и чу, за тоа сведочи; и сведоштвата Негови никој не ги прима.

³³ Кој го примил Неговото сведоштво, потврдил дека Бог е вистински. Крај на саботата

³⁴ Кого, пак, Бог го испратил, Он говори Божји зборови; оти Бог не Го дава Духот со мерка.

³⁵ Зашто Отецот Го љуби Својот Син и сѐ Му даде во раката Негова.

³⁶ Кој верува во Синот, има живот вечен; а кој не верува во Синот, нема да види живот, но гневот Божји ќе биде врз него.