Јован 2 - Свето Евангелие 2008

ГЛАВА 2 (Зачало 6)

¹ На третиот ден имаше свадба во Кана Галилејска, и мајката на Исуса беше таму.

² Поканет беше на свадбата, исто така, и Исус, и учениците Негови.

³ А кога приврши виното, мајка Му Му рече на Исуса: – Немаат вино.

⁴ Исус ѝ рече: – Што се однесува тоа до нас, жено? Уште не дошол Мојот час.

⁵ Но Неговата мајка им рече на слугите: – Сѐ што ќе ви рече, направете!

⁶ А таму имаше шест камени садови за вода, поставени според јудејскиот обичај за очистување, коишто собираа по две до три мери.

⁷ И Исус им рече: – Наполнете ги садовите со вода! И тие ги наполнија до горе.

⁸ Па им кажа: – Налијте сега и однесете му на старосватот! И му однесоа.

⁹ И кога вкуси старосватот од виното што беше постанало од вода – а тој не знаеше од каде е, ама слугите што ја беа донеле водата, знаеја, – го повика младоженецот,

¹⁰ и му рече: – Секој човек најнапред изнесува добро вино и, кога ќе се поднапијат гостите, тогаш полошото; а ти си го зачувал доброто вино за сега.

¹¹ Така Исус направи почеток на Своите чуда во Кана Галилејска и ја покажа Својата слава; и учениците Негови поверуваа во Него. Крај на понеделникот

(Зачало 7)

¹² Потоа слезе во Капернаум, Он и мајка Му, и браќата Негови, и учениците Негови; и таму останаа неколку дена.

¹³ Наближуваше Пасха јудејска, и Исус се искачи во Ерусалим;

¹⁴ и ги затекна во храмот оние што продаваа волови, овци и гулаби, и менувачите на пари – како седат.

¹⁵ И кога направи бич од врвци, ги истера од храмот сите, и овците и воловите; а на менувачите им ги растури парите и ги испреврте масите;

¹⁶ па им рече на оние што продаваа гулаби: – Носете го тоа одовде, и од домот на Мојот Отец не правете дом за тргување!

¹⁷ Учениците, пак, Негови тогаш се сетија дека е напишано: „Ревноста за Твојот дом Ме изеде“.

¹⁸ А Јудејците одговорија и Му рекоа: – Со каков знак ќе ни докажеш дека можеш да го правиш тоа?

¹⁹ Им одговори Исус и рече: – Урнете го овој храм и за три дена ќе го подигнам.

²⁰ А Јудејците рекоа: – Овој храм е граден четириесет и шест години, а Ти за три дена ли ќе го подигнеш?

²¹ Но, Он говореше за храмот на Своето тело.

²² А кога воскресна од мртвите, се сетија учениците Негови дека за ова беше говорел, и поверуваа на Писмото и на зборот што беше го рекол Исус. Крај на петокот

²³ И кога беше во Ерусалим на празникот Пасха, мнозина, гледајќи ги чудата Негови што ги правеше, поверуваа во Неговото име.

²⁴ Но Самиот Исус не им се доверуваше, оти ги познаваше сите,

²⁵ и немаше потреба да Му сведочи некој за човекот, бидејќи Самиот знаеше што има во човекот.