Јован 15 - Свето Евангелие 2008

ГЛАВА 15 (Зачало 50)

¹ Јас сум вистинската лоза и Мојот Отец е лозарот.

² Секоја прачка во Мене, која не дава плод, Он ќе ја исече; и секоја, која дава плод, ќе ја очисти, за да принесе повеќе плод.

³ Вие сте веќе чисти преку словото што сум ви го проповедал.

⁴ Бидете во Мене, и Јас ќе бидам во вас. Како што прачката не може да роди плод сама од себе, ако не е на лозата, така и вие, ако не бидете во Мене.

⁵ Јас сум лозата, а вие прачките; и кој е во Мене и Јас во него, тој ќе даде многу плод; оти без Мене не можете да направите ништо.

⁶ Ако некој не остане во Мене, ќе биде исфрлен надвор, како прачката, и ќе се исуши; и ќе ги соберат, и во оган ќе ги фрлат, и ќе ги изгорат.

⁷ Ако останете во Мене, и зборовите Мои во вас, тогаш што и да посакате, барајте, и ќе ви биде. Крај на понеделникот и на светителот

⁸ Со тоа ќе се прослави Мојот Отец, ако вие принесувате многу плод и ако бидете Мои ученици.

(Зачало 51)

⁹ Како што Ме возљуби Отецот, и Јас ве возљубив вас; бидете во Мојата љубов.

¹⁰ Ако ги запазите Моите заповеди, ќе останете во љубовта Моја, како што Јас ги запазив заповедите на Мојот Отец, и останувам во љубовта Негова.

¹¹ Ова ви го реков, за да остане радоста Моја во вас, и радоста ваша да биде полна.

¹² Оваа е Мојата заповед: да се љубите еден со друг, како што ве возљубив и Јас.

¹³ Од оваа љубов никој нема поголема: да ја положи душата своја за своите пријатели.

¹⁴ Вие сте Мои пријатели, ако го вршите она, што ви заповедувам Јас.

¹⁵ Не ве викам веќе слуги, зашто слугата не знае што работи господарот; туку ве викам пријатели, оти ви кажав сѐ што сум чул од Мојот Отец.

¹⁶ Вие не Ме избравте Мене, но Јас ве избрав вас и ве поставив да одите и да принесувате плод, и плодот ваш да остане, та што и да посакате од Отецот во Мое име, да ви даде. Крај на светителот

(Зачало 52)

¹⁷ Оваа заповед ви ја давам: да се љубите еден со друг.

¹⁸ Ако светот ве мрази, знајте, дека Мене светот уште пред вас Ме замрази.

¹⁹ Да бевте од овој свет, тогаш светот ќе го љубеше своето; но бидејќи не сте од светот, туку Јас ве избрав од светот, затоа светот и ве мрази.

²⁰ Помнете ги зборовите што ви ги реков Јас: ниеден слуга не е поголем од својот господар. Ако Мене Ме гонеа, и вас ќе ве гонат; ако Моите зборови ги запазеа, и вашите ќе ги запазат.

²¹ Ама сето ова ќе ви го направат заради Моето име, оти не Го знаат Оној, Којшто Ме испрати.

²² Да не бев дошол и да не бев им зборувал, грев немаше да имаат. Но сега тие немаат изговор за својот грев.

²³ Којшто Ме мрази Мене, Го мрази и Мојот Отец.

²⁴ Ако не бев направил меѓу нив дела, какви што никој друг не направил, грев немаше да имаат; а сега и видоа, и Ме замразија Мене, и Мојот Отец.

²⁵ Ама нека се исполни словото, напишано во нивниот Закон, дека Ме замразија за ништо.

²⁶ А кога ќе дојде Утешителот, Кого ќе ви Го испратам Јас од Отецот, Духот на вистината, Којшто излегува од Отецот, Он ќе сведочи за Мене;

²⁷ а и вие ќе сведочите, бидејќи од почетокот сте со Мене.