Јован 14 - Свето Евангелие 2008

ГЛАВА 14 (Зачало 47)

¹ Да не се плаши срцето ваше; верувајте во Бога и во Мене верувајте.

² Во домот на Мојот Отец има многу места за живеење. А да немаше, Јас ќе ви кажев. Одам да подготвам место.

³ И кога ќе отидам и ќе ви подготвам место, пак ќе дојдам.

⁴ А каде одам Јас знаете, и патот го знаете.

⁵ Тома Му рече: – Господи, не знаеме каде одиш; и како можеме патот да го знаеме?

⁶ Исус му рече: – Јас сум патот, вистината и животот; никој не доаѓа при Отецот, освен преку Мене.

⁷ Ако бевте Ме познавале, ќе Го познававте и Мојот Отец. И отсега Го познавате, и сте Го виделе.

⁸ Филип Му рече: – Господи, покажи ни Го Отецот, и доста ни е!

⁹ Му рече Исус: – Толку време сум со вас, и не си Ме познал ли, Филипе? Кој Ме видел Мене, Го видел Отецот, и како ти велиш: покажи ни Го Отецот?

¹⁰ Не верувш ли дека Јас сум во Отецот, и дека Отецот е во Мене? Зборовите што ви ги зборувам, од Себе не ги зборувам; а Отецот, Кој е секогаш во Мене, Он ги врши делата.

(Зачало 48)

¹¹ Верувајте Ми, дека Јас сум во Отца и Отецот е во Мене. Крај на петокот Ако ли, пак, не, тогаш верувајте во Мене, заради делата.

¹² Вистина, вистина ви велам: кој верува во Мене, делата што ги правам Јас и тој ќе ги прави, и поголеми од нив ќе направи; оти Јас си одам при Својот Отец;

¹³ и што и да посакате од Отецот во Мое име, тоа ќе го направам, за да се прослави Отецот во Синот.

¹⁴ Ако посакате нешто во Мое име, Јас ќе го направам.

¹⁵ Ако Ме љубите, пазете ги Моите заповеди.

¹⁶ Јас ќе Го помолам Отецот, и ќе ви даде друг Утешител, за да биде со вас довека,

¹⁷ Духот на вистината, Кого светот не може да Го прими, оти не Го виде, ниту Го познава; а вие Го познавате, зашто во вас е и во вас ќе биде.

¹⁸ Нема да ве оставам сираци; ќе дојдам при вас.

¹⁹ Уште малку и светот веќе нема да Ме гледа; а вие ќе Ме гледате, зашто Јас живеам, и вие ќе живеете.

²⁰ Во оној ден вие ќе разберете, дека Јас сум во Мојот Отец и вие сте во Мене, и Јас сум во вас.

²¹ Кој ги има заповедите Мои и ги пази, тој е оној што Ме љуби; а кој Ме љуби Мене, возљубен ќе биде од Мојот Отец; и Јас ќе го возљубам, и Самиот ќе му се јавам. Крај на саботата

²² Му рече Јуда не Искариот: – Господи, зошто сакаш нам да ни се јавиш, а не на светот?

²³ Исус одговори и му рече: – Ако некој Ме љуби, ќе го пази словото Мое; и Мојот Отец ќе го возљуби, и ќе дојдеме при него и живеалиште во него ќе направиме.

²⁴ Којшто не Ме љуби, не го запазува словото Мое; а словото, што го слушате, не е Мое, туку на Мојот Отец, Којшто Ме испрати. Крај на св. ап. Јуда

²⁵ Ова ви го реков, бидејќи сум со вас.

²⁶ А Утешителот, пак, Духот Свети, Кого Отецот ќе Го испрати во Мое име, Он ќе ве научи на сѐ и ќе ви напомни за сѐ што сум ви зборувал.

²⁷ Мир ви оставам; мирот свој ви го давам; Јас ви го давам не како што го дава светот. Да не се плаши срцето ваше, ниту да се бои.

(Зачало 49)

²⁸ Чувте дека Јас ви реков: одам и пак ќе дојдам при вас. Ако Ме љубевте, вие ќе се зарадувавте што реков; одам при Мојот Отец; зашто Мојот Отец е поголем од Мене.

²⁹ И сега ви кажав, уште пред да се исполни, та, кога ќе се исполни, да поверувате.

³⁰ Нема веќе многу да зборувам со вас, оти иде кнезот од овој свет, и тој во Мене нема ништо.

³¹ Но, за да разбере светот дека Го љубам Отца и како што Ми заповеда Отецот, така и правам. Станете да си одиме одовде!