Јован 13 - Свето Евангелие 2008

ГЛАВА 13 (Зачало 44)

¹ Апред празникот Пасха, знаејќи Исус дека Му дојде часот Негов за да премине од овој свет кон Отецот, ги засака Своите во светот, и до крај ги засака.

² И на вечерата, кога ѓаволот беше го поттикнал срцето на Јуда Симонов Искариот за да го предаде, Читај на Вел. Четврток, на литургијата

³ Исус, знаејќи дека Отецот сѐ Му предал во рацете и дека од Бога излегол и при Бога оди,

⁴ стана од вечерата, ја соблече горната облека и кога зеде крпа, се препаша;

⁵ потоа истури вода во мијалникот и почна да им ги мие нозете на учениците и да ги брише со крпа, со којашто беше препашан.

⁶ Дојде и при Симона Петра, а тој Му рече: – Господи, ти ли ќе ми ги миеш нозете?

⁷ Исус одговори и му рече: – Што правам Јас сега, ти не знаеш, но подоцна ќе разбереш.

⁸ Петар Му рече: – Никогаш Ти нема да ми ги измиеш нозете мои. Исус му одговори: – Ако не те измијам, нема да имаш дел со Мене.

⁹ Симон Петар Му рече: – Господи, не само нозете мои, туку и рацете и главата!

¹⁰ Исус му рече: – На измиениот треба само нозете да му се измијат, оти е целиот чист; и вие сте чисти, ама не сите.

¹¹ Бидејќи Он знаеше кој ќе Го предаде, па затоа и рече: не сите сте чисти. Крај на првото евангелие пред миење на нозете

(Зачало 45)

¹² Акога им ги изми нозете, ја облече облеката Своја и пак седна на трпезата, па им рече: – Знаете ли, што ви направив?

¹³ Вие Ме викате Учител и Господ: и добро велите, бидејќи тоа сум.

¹⁴ Ако, пак, Јас, Господ и Учител, ви ги измив нозете, тогаш и вие сте должни еден со друг да си ги миете нозете.

¹⁵ Зашто ви дадов пример да правите и вие така, како што ви направив Јас.

¹⁶ Вистина, вистина ви велам: нема слуга поголем од својот господар, ниту пратеник поголем од оној што го испратил.

¹⁷ Кога го знаете ова, блажени сте, ако го исполнувате. Крај на второто евангелие по миење на нозете Премини на Вел. Четврток, на зачало 108 според Матеја, од половина

¹⁸ Не го говорам ова за сите вас, оти Јас ги знам оние што ги избрав. Но нека се исполни Писмото; „Кој јаде леб со Мене, ја подигна против Мене својата петица“.

¹⁹ Отсега ви кажувам, уште пред да се исполнило, та кога ќе се исполни, да поверувате дека сум Јас.

²⁰ Вистина, вистина ви велам: кој го прима оној што го праќам Јас, Мене Ме прима, а кој Ме прима Мене, Го прима Оној, Којшто Ме пратил.

²¹ Штом го рече ова, Исус се нажали во душата, посведочи и рече: – Вистина, вистина ви зборувам, дека еден од вас ќе Ме предаде.

²² Тогаш учениците почнаа да се погледнуваат еден со друг, не разбирајќи за кого говори.

²³ А еден од учениците, кого го милуваше Исус, беше се навалил на градите Исусови.

²⁴ Нему Симон Петар му даде знак да праша, кој ли ќе е, за кого што говори.

²⁵ Тој, пак, откако се навали на градите Исусови, Му рече: – Кој е, Господи?

²⁶ Одговори Исус: – Оној е, кому Јас ќе му натопам и подадам залак. И штом натопи залак, му го подаде на Јуда Симонов Искариот.

²⁷ И тогаш, по залакот, сатаната влезе во него. А Исус му рече: – Што ќе правиш, направи го побргу!

²⁸ Никој, пак, од оние што седеа на трпезата, не разбра зошто му го рече тоа.

²⁹ Но, бидејќи Јуда го чуваше ковчежето, некои помислија дека Исус му рече: купи што ни треба за празникот; или, да раздаде нешто на сиромаси.

³⁰ А тој, штом го зеде залакот, веднаш излезе; беше ноќ.

³¹ Кога тој излезе, Исус рече: Сега се прослави Синот Човечки и Бог се прослави во Него.

(Зачало 46)

³² Ако Бог се прослави во Него, и Бог ќе го прослави во Себе, и веднаш ќе Го прослави.

³³ Чеда, уште малку сум со вас! Ќе Ме барате и, како што им реков на Јудејците, дека каде што одам Јас вие не можете да дојдете, и вам ви зборувам сега.

³⁴ Нова заповед ви давам, да се љубите еден со друг; како Јас што ве возљубив, така и вие да се љубите еден со друг.

³⁵ По тоа ќе ве познаат сите, дека сте Мои ученици, ако имате љубов помеѓу себе.

³⁶ Симон Петар Му рече: – Господи, каде одиш? Исус му одговори: – Каде што одам Јас, ти не можеш сега да дојдеш по Мене, но подоцна ќе врвиш по Мене.

³⁷ Петар Му рече: – Господи, зошто не можам да идам по Тебе сега? Душата своја ќе ја положам за Тебе.

³⁸ Исус му одговори: – Душата ли ќе ја положиш за Мене? Вистина, вистина ти велам: нема да запее петел, додека ти трипати не се одречеш од Мене.