Михеј 1 - Свето Писмо: Стандардна Библија 2006 (со девтероканонски книги)

Суд за Самарија

¹ Слово Господово, упатено до Михеј од Морешет, во деновите на Јо­там, Ахаз и Езекија, цареви јудејски, со кое му беше откриено за Сама­рија и за Ерусалим.

² Чујте, сите народи, внимавај, зем­јо, и сѐ што те исполнува! Сведок не­ка е против вас Господ Бог, Господ од Својот свет храм!

³ Зашто Господ, ете, излегува од Своето место, ќе слезе и ќе оди по зем­ните височини,

⁴ и планините ќе се топат под Него, долините ќе се растопат како восок од оган, како водата што се излева низ стрмнини.

⁵ И сето тоа ќе стане поради престапите на Јаков, поради гревот на Израилевиот дом. Кој му е гревот на Јаков? Нели е тоа Самарија? Кои ѝ се идолските светилишта на Јудеја? Не­ли е тоа Ерусалим?

⁶ Затоа од Самарија ќе направам купишта урнатини во полето, место за садење лози; ќе ги сринам камењата нејзини во долина и ќе ѝ ги разголам основите.

⁷ И сите нејзини резани ликови ќе се строшат и сите нивни дарови од блуд – со оган ќе бидат изгорени: сите идо­ли ќе ги разурнам; со дарови од блуд ги правела, и пак ќе бидат дарови од блуд.

Суд за Јудеја

⁸ Поради тоа ќе заплачам и ќе заридам, ќе одам бос и гол, ќе вијам како чакал, ќе врискам како ној;

⁹ зашто нема лек за нејзината рана, тоа дојде до Јудеја, а стигна дури и до портите на Мојот народ – сѐ до Ерусалим.

¹⁰ Не разгласувајте го ова во Гет, не плачете таму гласно, а во Бет-Ли­јаф­ра посипете се со пепел.

¹¹ Исели се, жителко шафирска, срамно разголена; нема да се спаси ни жителката хананска, до темел е разурнат Бет-Ецел, искорнат е од своите цврсти основи.

¹² Жителката на Марот е желна за добро, а ете, зло дојде од Господ, слезе до портите ерусалимски.

¹³ Впрегни брзи коњи во колата, жителко лахишка, тоа беше почеток на гревот од ќерката Сионска, зашто во тебе се појавија престапите на Из­раил.

¹⁴ Затоа ти ќе се збогуваш со дарови од Морешет-Гат; куќите ахзивски ќе бидат измама за царевите израилски.

¹⁵ Ќе доведам и освојувач против тебе, жителко; и тој ќе дојде дури до Адулам, славата на Израил.

¹⁶ Куби ја косата своја, истрижи се – од жал за своите сакани деца: разголи ја ќелавоста своја за нив како го­ло­глав орел зашто тие ќе бидат одведе­ни од тебе во ропство.