Матеј 6 - Свето Писмо: Стандардна Библија 2006 (со девтероканонски книги)

За милостината

¹ „Гледајте да не ја покажувате својата праведност пред луѓето само за да бидете забележани; инаку, нема да имате награда од вашиот Отец, Кој е на небесата.

² И така, кога даваш милостина не разгласувај пред себе, како што прават лицемерите по синагогите и по ули­ци­те, за да ги фалат луѓето. Навистина ви ве­­лам, тие веќе ја добиле својата награда.

³ А ти, кога даваш милостина, да не знае твојата лева рака што прави десната,

⁴ за да биде твојата милостина во тајност; и тогаш, твојот Отец, Кој гледа тајно, ќе те награди јавно.“

За молитвата

⁵ „И кога се молиш, не биди како лицемерите, кои сакаат по синагогите и крстопатите да стојат и да се молат за да се покажуваат пред луѓето. Вис­ти­на ви велам, тие веќе си ја добиле својата награда.

⁶ Но ти, кога се молиш, влези во својата скришна соба и, откако ќе ја за­тво­риш вратата, помоли Му се на твојот Отец, Кој е во тајност; и Твојот Отец, Кој гледа тајно, ќе те награди јавно.

⁷ Кога се молите, не говорете многу како незнабошците, зашто тие мислат дека за своите многубројни зборови ќе бидат услишени;

⁸ вие, пак, не бидете како нив, зашто вашиот Отец знае од што имате потреба уште пред да Го помолите.

‚Оче наш‘

⁹ Туку вие молете се вака: Оче наш, Кој си на небесата, да се свети името Твое;

¹⁰ да дојде царството Твое; да биде волјата Твоја, како на небото, така и на земјата;

¹¹ лебот наш насушен дај ни го денес;

¹² и прости ни ги долговите наши, ка­ко што и ние им ги проштеваме на на­ши­те должници;

¹³ и не воведувај нѐ во искушение, но избави нѐ од лукавиот, зашто Твое е царството, и силата, и славата во сите векови. Амин!

¹⁴ Бидејќи, ако им ги простите на луѓето грешките нивни и вам ќе ви ги прости вашиот Отец небесен.

¹⁵ Ако, пак, не им ги простите греш­ките на луѓето и вашиот Отец нема да ви ги прости вашите грешки.“

За постот

¹⁶ „Кога постите, не бидете натажени како лицемерите; зашто тие си ги прават лицата нажалени за да се покажат пред луѓето дека постат. Вистина ви велам дека тие веќе ја добиле својата награда.

¹⁷ А ти кога постиш, помажи ја главата своја и измиј го лицето свое,

¹⁸ па да се покажеш дека постиш не пред луѓето, туку пред твојот Отец, Кој е во тајност; и твојот Отец, Кој гледа во тајност, ќе те награди јавно.“

За богатството на небото

¹⁹ „Не собирајте богатства на земјата, каде што ги јаде молецот и рѓата, и ка­де што крадците ги поткопуваат и крадат;

²⁰ но собирајте си богатства на небото, каде што ниту молец, ниту рѓа ги јаде, и каде што крадци не ги поткопуваат, ни­ту крадат.

²¹ Зашто, каде што е богатството ваше, таму ќе биде и срцето ваше.“

Светлина за телото

²² „Светило за телото е окото. И така, ако твоето око биде чисто и целото твое тело ќе биде светло;

²³ ако, пак, твоето око биде лошо, целото твое тело ќе биде темно. И така, ако светлината, што е во тебе, е темнина, тогаш колкава ли ќе е темнината?“

Или Бог или богатство

²⁴ „Никој не може да им слугува на двајца господари: зашто, или едниот ќе го замрази, а другиот ќе го засака; или кон едниот ќе се приврзе, а другиот ќе го презре. Не можете да им служите на Бога и на Мамон.

За грижите

²⁵ Затоа ви велам: немојте да се гри­жите за вашата душа – што ќе јадете или што ќе пиете; ниту за вашето тело, во што ќе се облечете. Зар не чини ду­шата повеќе од храната, и телото – од облеката?

²⁶ Погледнете ги птиците небески: тие ниту сеат, ниту жнеат, ниту во амбар собираат, но вашиот небесен Отец ги храни. Зар не сте вие многу поскапи од нив?

²⁷ А кој од вас, грижејќи се, може на својот раст да му придаде макар еден лакт?

²⁸ Зошто се грижите и за облеката? По­гледнете ги полските кринови како растат! Не се трудат, ниту предат;

²⁹ но ви велам дека ниту Соломон, во це­лата своја слава не се облече така, како еден од нив.

³⁰ Па, ако полската трева, што денеска ја има, а утре во печка се фрла, Бог така ја облекува, а колку ли повеќе вас, маловерни!?

³¹ Па затоа, не грижете се и не гово­рете: ‚што да јадеме, или што да пиеме‘, или ‚во што да се облечеме?‘

³² Зашто сето тоа го бараат незна­бош­ците, а вашиот Отец небесен знае дека од сето ова имате потреба.

³³ Но, барајте го најнапред царството Божјо и Неговата правда, и сѐ ова ќе ви се придодаде.

³⁴ И затоа, не грижите се за утре, заш­то утрешниот ден ќе се грижи за своето; на секој ден доволно му е него­вото зло.“