Матеј 4 - Свето Писмо: Стандардна Библија 2006 (со девтероканонски книги)

Исусовите искушувања

¹ Тогаш Духот Го одведе Исуса во пустината за да биде искушуван од ѓаволот.

² И откако постеше четириесет дни и четириесет ноќи, најпосле огладне.

³ А кога пристапи до Него, иску­шу­вачот Му рече: „Ако си Син Божји, за­поведај овие камења да станат лебови.“

⁴ А Тој му одговори и рече: „Напи­ша­но е – ‚Човек не живее само од леб, туку и од секој збор што излегува од устата на Бога.‘“

⁵ Тогаш ѓаволот Го одведе во светиот град и Го постави на стреата од хра­мот

⁶ и Му рече: „Ако си Син Божји, скокни долу, зашто напишано е: ‚На ангелите Свои ќе им заповеда за Тебе да Те запазат и на раце ќе Те земат за да не Си ја сопнеш ногата од камен.‘“

⁷ А Исус му рече: „Напишано е исто така – ‚Не искушувај Го Господа, Твојот Бог.‘“

⁸ Повторно ѓаволот Го одведе на многу висока планина и Му ги покажа сите царства на светот и нивната слава

⁹ и Му рече: „Сето ова ќе Ти го дадам, ако паднеш и ми се поклониш.“

¹⁰ Но, Исус му рече: „Бегај од Мене, сатано, зашто е напишано: ‚На Господа, Твојот Бог, да Му се поклонуваш и са­мо Нему да Му служиш!‘“

¹¹ Тогаш ѓаволот Го остави и веднаш дојдоа ангели и Му служеа.

Исусовата служба во Галилеја

¹² А кога Исус чу дека Јован е предаден, отиде во Галилеја.

¹³ И кога го остави Назарет, дојде и се насели во Капернаум приморски, во пределите Завулонови и Не­ф­та­лимови,

¹⁴ за да се исполни реченото преку пророкот Исаија, кој вели:

¹⁵ „Земјата Завулонова и земјата Нефталимова, на пат кон морето, отаде Јордан, е незнабожечка Галилеја.

¹⁶ Народот, што седеше во темнина, виде голема светлина и на оние, што седеа во пределот и во смртна сенка, им изгреа светлина.“

¹⁷ Оттогаш Исус почна да проповеда и да говори: „Покајте се, зашто се приближи царството небесно!“

Исус ги повикува првите ученици

¹⁸ И одејќи покрај Галилејското Море, ги виде двајцата браќа, Симон, наречен Петар, и брат му Андреј, како фрлаат мрежа во морето, бидејќи беа рибари.

¹⁹ И им рече: „Појдете по Мене и Јас ќе ве направам ловци на луѓе.“

²⁰ И ете, тие веднаш ги оставија мре­жите и тргнаа по Него.

²¹ И откако отиде оттаму виде други двајца браќа: Јаков Заведеев и брат му Јован, во кораб со Заведеј, таткото нив­ни, кои си ги крпеа мрежите свои, и нив ги повика.

²² И тие веднаш го оставија коработ и татка си и тргнаа по Него.

Исус поучува и лекува

²³ И одеше Исус по цела Галилеја поучувајќи по синагогите нивни, про­поведајќи го Евангелието на Цар­ството и лекувајќи секаква болест и немоќ кај народот.

²⁴ Па се разнесе глас за Него по цела Сирија и ги доведоа кај Него сите болни, нападнати од различни болести и страдања, опседнати од демони, ме­сечари, фатени, а Тој ги излекува.

²⁵ И по Него одеше многу народ од Галилеја, Десеттоградието, Ерусалим, Јудеја и отаде Јордан.