Матеј 27 - Свето Писмо: Стандардна Библија 2006 (со девтероканонски книги)

Исус пред Пилат

¹ А кога се раздени, сите првосвеш­теници и старешини напра­вија договор против Исус за да Го убијат;

² и откако Го врзаа, Го одведоа и Го предадоа на управникот Понтиј Пилат.

Самоубиството на Јуда

³ Тогаш Јуда, што Го предаде, кога виде дека е Тој осуден, се покаја и им ги врати триесетте сребреници на прво­свештениците и старешините,

⁴ велејќи им: „Згрешив, зашто пре­дадов невина крв!“ А тие му одговорија: „Што ни е грижа нам за тоа? Мисли му ти!“

⁵ Тој ги фрли сребрениците во хра­мот, излезе и отиде, та се обеси.

⁶ Првосвештениците ги собраа сребрениците и рекоа: „Не чини да се стават во касата на храмот, бидејќи се цена за крв.“

⁷ Откако се советуваа, ја купија со нив грнчаревата нива, за погребување на странци.

⁸ Затоа и до денес таа нива се вика Крвна нива.

⁹ Тогаш се исполни реченото преку пророкот Еремија, кој вели: „И ги зедоа три­есетте сребреници, цената на Непро­цен­ливиот, Кого Го оценија синовите Израилеви,

¹⁰ и ги дадоа за грнчаревата нива, како што ми кажа Господ.“

Пилат Го сослушува Исус

¹¹ И Исус застана пред управникот. И тој Го праша, велејќи: „Ти ли си Царот Јудејски?“ Исус му одговори: „Ти велиш.“

¹² И кога Го обвинуваа првосвеш­те­ни­ците и старешините, Тој ништо не од­говараше.

¹³ Тогаш Пилат Му рече: „Не слушаш ли колку сведочат против Тебе?“

¹⁴ И не му одговори ниту на еден збор, така што управникот се чудеше многу.

¹⁵ А на секој Празник управ­ни­кот имаше обичај да му пушта на народот по еден затвореник, кого тие сакаа.

¹⁶ Тогаш тие имаа еден прочуен зат­вореник, по име Варава.

¹⁷ И кога се собраа, Пилат им рече: „Кого сакате да ви го пуштам: Варава ли, или Исус, наречен Христос?“

¹⁸ Зашто знаеше дека Го беа предале од завист.

¹⁹ А во тоа време, кога тој седеше во судот, жена му порача да му кажат: „Не прави му ништо на Тој Праведник, заш­то денеска многу пострадав на сон заради Него.“

²⁰ Но првосвештениците и стареши­ните го наговорија народот да го измоли Варава, а Исуса да Го погуби.

²¹ Тогаш управникот одговарајќи им рече: „Кого од двајцата сакате да ви го пуштам?“ Тие одговорија: „Варава!“

²² Пилат им рече: „А што да правам со Исус, наречен Христос?“ Му одговорија сите: „Да биде распнат!“

²³ Управникот рече: „Па какво зло направил?“ Но тие уште посилно викаа и рекоа: „Да биде распнат!“

²⁴ Пилат, штом виде дека ништо не помага, а буната се зголемува, зеде во­да, ги изми рацете пред народот и рече: „Невин сум за крвта на Овој Пра­ведник; мислете му вие!“

²⁵ И одговарајќи целиот народ, рече: „Крвта Негова нека падне на нас и на нашите деца!“

²⁶ Тогаш им го пушти Варава, а Исуса, откако Го камшикуваа, Го пре­да­де да биде распнат.

Исусовите понижувања

²⁷ Потоа војниците на управникот Го зедоа Исуса во судницата и ја собраа целата чета околу Него,

²⁸ па, откако Го соблекоа, Му облекоа багреница;

²⁹ исплетоа трнов венец, Му Го кладоа на главата и Му дадоа во десната рака трска; и поклонувајќи се на колена пред Него, Му се потсмеваа и велеа: „Те поздравуваме, Царе Јудеј­ски!“

³⁰ И плукаа на Него, ја зедоа трската и Го удираа по главата.

³¹ А кога Го исмеаја, Му ја соблекоа багреницата, Му ги облекоа Неговите алишта и Го поведоа на распнување.

Исусовото распнување

³² На излегување сретнаа еден Ки­ри­неец, по име Симон; него го натераа да Му го носи крстот.

³³ И кога дојдоа на местото наречено Голгота, што значи Черепница,

³⁴ Му дадоа да пие оцет, измешан со жолчка. Но Тој вкуси и не сакаше да пие.

³⁵ А штом Го распнаа, ги разделија алиштата Негови, фрлајќи ждрепка;

³⁶ па седеа таму и Го чуваа;

³⁷ и Му кладоа над главата натпис, со вината Негова: „Овој е Исус, Царот Јудејски.“

³⁸ Тогаш распнаа со Него и двајца разбојници; едниот од десната страна, а другиот од левата.

³⁹ А минувачите, вртејќи ги главите свои, Го хулеа

⁴⁰ и велеа: „Ти, што го уриваш храмот и за три дни го соѕидуваш, спаси се Себеси! Ако си Син Божји, симни се од крстот!“

⁴¹ Исто така и првосвештениците, книжниците, старешините и фарисе­ите, потсмевајќи се говореа:

⁴² „Други спасуваше, а Себеси не може да се спаси! Ако е Тој Цар Израилев, нека слезе сега од крстот, па ќе поверуваме во Него.

⁴³ Се надеваше на Бога, нека Го избави сега, ако е по волјата Негова, бидејќи говореше: ‚Син Божји Сум!‘“

⁴⁴ Така и разбојниците, распнати со Него, Го исмејуваа.

Исусовата смрт

⁴⁵ А од шестиот час настана темнина по целата земја, до деветтиот час;

⁴⁶ а околу деветтиот час извика Исус со силен глас и рече: „Или! Или! Лима савахтани?“ А тоа значи: „Боже Мој, Боже Мој, зошто Ме остави!“

⁴⁷ А некои од оние што стоеја таму, кога го чуја тоа, рекоа: „Овој го вика Илија!“

⁴⁸ И веднаш еден од нив отрча, зеде сунѓер, го натопи во оцет и го надена на трска, па Му даваше да пие.

⁴⁹ Другите, пак, велеа: „Чекајте, да видиме, дали ќе дојде Илија да Го спа­си!“

⁵⁰ А Исус, откако повторно извика со силен глас, го испушти духот.

⁵¹ И ете, се расцепи завесата на хра­мот на две – од горе до долу; и земјата се затресе; и карпи се распаднаа.

⁵² И гробови се отворија; и многу тела на упокоени светии воскреснаа;

⁵³ па кога излегоа од гробовите, по воскресението Негово, влегоа во светиот град и им се јавија на мнозина.

⁵⁴ А стотникот и оние што со него Го чуваа Исуса, откако го видоа земјотресот и сѐ друго што стана, се уплашија многу и говореа: „Навистина Овој беше Син Божји!“

⁵⁵ Таму беа и гледаа оддалеку многу жени, коишто врвеа по Исус од Галилеја и Му служеа.

⁵⁶ Меѓу нив беа Марија Магдалена и Марија, мајка им на Јаков и Јосиф, и мајката на Заведеевите синови.

Исусовиот погреб

⁵⁷ А кога се стемни, дојде еден богат човек од Ариматеја, по име Јосиф, кој Му беше, исто така, ученик на Исус;

⁵⁸ тој отиде кај Пилат и го побара телото Исусово. Тогаш Пилат нареди да му го дадат телото.

⁵⁹ А Јосиф, штом го зеде телото, Го завитка во чисто платно,

⁶⁰ и Го положи во својот нов гроб, што го беше издлабил во камен; па, откако постави голем камен над гробната врата, си отиде.

⁶¹ А таму беа Марија Магдалена и другата Марија, кои седеа спроти гробот.

Стражата на Исусовиот гроб

⁶² Утредента, пак, по петокот, се собраа првосвештениците и фарисеите кај Пилат,

⁶³ и му рекоа: „Господаре, се сетивме дека Оној измамник, уште дури беше жив, рече: ‚По три дни ќе воскреснам!‘

⁶⁴ Затоа нареди да се причува гробот до третиот ден, за да не отидат уче­ни­ците Негови ноќе и да Го украдат, па да му речат на народот: ‚Воскресна од мртвите!‘ Та последната измама ќе биде полоша од првата.“

⁶⁵ Пилат им рече: „Имате стража; одете и чувајте го како што знаете.“

⁶⁶ Тие отидоа и со стража го чуваа гробот, а каменот го запечатија.