Матеј 19 - Свето Писмо: Стандардна Библија 2006 (со девтероканонски книги)

За разводот

¹ Кога ги заврши Исус тие збо­рови, замина од Галилеја и дојде во пределите јудејски, отаде Јордан.

² По Него идеше многу народ и Тој ги исцели таму.

³ И Му пристапија фарисеите што Го искушуваа, па Му рекоа: „Дали му е допуштено на човек да ја остави жената своја за каква и да било причина?“

⁴ Тој им одговори и рече: „Не сте ли читале, дека Оној што ги создаде во по­четокот, машко и женско ги создаде,

⁵ и рече: ‚Затоа ќе остави човек татко и мајка и ќе се прилепи до жената своја и ќе бидат обата едно тело.‘

⁶ Па така, тие веќе не се двајца, туку едно тело. А Бог што соединил човек да не разделува.“

⁷ Тие Му рекоа: „Зошто тогаш Мојсеј заповеда да се даде разводно писмо и таа да се отпушти?“

⁸ Тој им рече: „Заради тврдокорноста на вашите срца Мојсеј ви дозволи да ги отпуштате жените свои; но во почетокот не беше така.

⁹ Јас, пак, ви велам: оној што ќе ја остави својата жена, освен заради прељуба, и се ожени со друга, тој врши прељуба; и оној, што ќе се ожени со на­пуштена, исто така прељубодејствува.“

Брак и безбрачност

¹⁰ Учениците Негови Му рекоа: „Ако е таква положбата на човекот кон жената, подобро да не се жени!“

¹¹ А Тој им рече: „Не може секој да го прифати кажаново, освен оние на кои им е дадено;

¹² зашто има скопени, така родени од мајчината утроба; а има скопени и од луѓе, но има и скопени, кои самите себе се скопиле заради царството небесно. Кој може да прифати, нека прифати.“

Исус ги благословува децата

¹³ Тогаш кај Него доведоа деца, за да ги положи рацете над нив и да се помоли, а учениците им забрануваа.

¹⁴ Но Исус рече: „Оставете ги децата и не бранете им да доаѓаат кај Мене, зашто на такви е царството небесно.“

¹⁵ И откако ги положи рацете над нив, си отиде оттаму.

За богатиот млад човек

¹⁶ И ете, еден човек, кога пристапи до него, Му рече: „Учителе добар, какво добро треба да направам за да имам живот вечен?“

¹⁷ А Тој му одговори: „Зошто Ме нарекуваш добар? Никој не е добар освен Единиот Бог. А ако сакаш да влезеш во животот, запазувај ги запо­ведите.“

¹⁸ Тој Му рече: „Кои?“ А Исус одго­вори: „Не убивај, не прељубодејствувај, не кради, не сведочи лажно;

¹⁹ почитувај го татка си и мајка си; љуби го ближниот свој како себеси!“

²⁰ Младичот Му рече: „Сето тоа сум го запазил од својата младост; што уште ми недостасува?“

²¹ Исус му рече: „Ако сакаш да бидеш совршен, оди, продај го имотот свој и раздели го на сиромаси, и ќе имаш богатство на небото; па дојди и врви по Мене!“

²² Штом го чу младиот човек кажаново, си отиде натажен, бидејќи имаше многу имот.

²³ А Исус им рече на учениците Свои: „Вистина, ви велам, дека богат тешко ќе влезе во царството небесно;

²⁴ и уште ви велам: полесно ѝ е на ка­милата да мине низ иглени уши, от­колку на богатиот да влезе во царството Божјо.“

²⁵ Кога го чуја тоа учениците, многу се зачудија и рекоа: „Тогаш кој може да се спаси?“

²⁶ А Исус, ги погледна и им рече: „За луѓето тоа не е можно, но за Бога сѐ е можно.“

²⁷ Тогаш Петар одговори и Му рече: „Ете, ние оставивме сѐ, и по Тебе појдовме: што ќе стане, со нас?“

²⁸ А Исус им рече: „Вистина ви велам дека вие што врвите по Мене, во новиот свет, кога Синот Човечки ќе седне на престолот на славата Своја, ќе седнете и вие на дванаесет престоли и ќе судите над дванаесетте Израилеви колена;

²⁹ и секој што ќе остави куќа, или брат, или сестра, или татко, или мајка, или жена, или деца, или ниви, заради Моето име, ќе добие стопати повеќе и ќе наследи живот вечен.

³⁰ Но мнозина први ќе бидат последни, а последните први.“