Матеј 17 - Свето Писмо: Стандардна Библија 2006 (со девтероканонски книги)

Христовото преображение

¹ А по шест дни Исус ги зеде со Себе Петар, Јаков и брат му Јован, и ги изведе на висока гора сами;

² и се преобрази пред нив; и лицето Негово светна како сонце, а алиштата Негови станаа бели како светлина.

³ И ете, им се јавија Мојсеј и Илија, кои разговараа со Него.

⁴ Тогаш Петар Му одговори на Исус и рече: „Господи, добро ни е да бидеме овде; ако сакаш да направиме три колиби: една за Тебе, една за Мојсеј и една за Илија.“

⁵ Додека уште говореше, ете, ги засени светол облак; и се чу глас од облакот кој велеше: „Овој е Мојот возљубен Син, во Кого е Мојата волја; Него послушајте Го!“

⁶ И кога го чуја тоа учениците, паднаа ничкум и многу се уплашија.

⁷ Но Исус, откако им пријде, се допре до нив и им рече: „Станете и не плашете се!“

⁸ А тие, кога ги подигнаа очите, не видоа никој друг освен Исус.

⁹ А кога слегуваа од гората, Исус им заповеда и рече: „Никому не кажувајте што видовте додека Синот Човечки не воскресне од мртвите!“

За Илија

¹⁰ И учениците Негови Го запра­шаа, говорејќи: „Зошто, пак, книж­ни­ците велат дека најнапред треба да дојде Илија?“

¹¹ Исус им одговори и рече: „Илија ќе дојде претходно и ќе уреди сѐ;

¹² но ви велам дека Илија веќе дојде и не го познаа, туку му направија сѐ што сакаа; така и Синот Човечки ќе пострада од нив.“

¹³ Тогаш учениците разбраа дека Тој им зборува за Јован Крстител.

Исус ослободува од демони

¹⁴ Кога дојдоа кај народот, пристапи кон Него еден човек, кој падна на колена

¹⁵ и рече: „Господи, смилувај се на мојот син, зашто е месечар и многу се мачи; често паѓа во оган и често – во вода;

¹⁶ го доведов кај Твоите ученици, но тие не можеа да го излекуваат.“

¹⁷ А Исус одговори и рече: „О, роде безверен и развратен! До кога ќе бидам со вас? До кога ќе ве трпам? Доведете Ми го тука!“

¹⁸ И му нареди Исус и демонот излезе од него; и момчето оздраве во тој час.

¹⁹ Тогаш учениците пристапија кон Исус насамо и Му рекоа: „Зошто не можевме ние да го истераме?“

²⁰ А Исус им рече: „Заради вашето безверие: зашто, вистина, ви велам, ако имате вера колку синапово зрно, ќе ѝ речете на оваа планина: ‚Премести се одовде таму!‘ И таа ќе се премести, и ништо нема да биде за вас неможно.

²¹ Овој, пак, род се истерува само со молитва и пост.“

Исус повторно ја најавува Својата смрт и воскресение

²² А кога беа во Галилеја, Исус им рече: „Синот Човечки ќе биде предаден во раце човечки,

²³ и ќе Го убијат, и на третиот ден ќе воскресне.“ И тие многу се нажалија.

За храмовниот данок

²⁴ А кога пристигнаа во Капернаум, му пристапија на Петар оние што собираа дидрахми и му рекоа: „Учителот ваш не плаќа ли дидрахми?“

²⁵ Тој одговори: „Плаќа.“ И кога влезе дома, Исус го испревари и рече: „Што мислиш, Симоне? Земните цареви од кого земаат царина или данок? Од своите синови или од туѓи?“

²⁶ Петар Му одговори: „Од туѓите.“ Исус му рече: „Значи, синовите се ослободени;

²⁷ но, за да не ги соблазниме, отиди до морето, фрли јадица и првата риба што ќе ја уловиш, земи ја; и, кога ќе ѝ ја отвориш устата, ќе најдеш статир; земи го и подај им го за Мене и за себе!“