Матеј 11 - Свето Писмо: Стандардна Библија 2006 (со девтероканонски книги)

¹ И кога ги заврши Исус овие запо­веди кон дванаесетте Свои ученици, замина оттаму за да поучува и да проповеда по нивните градови.

Пратеници од Јован Крстител

² А Јован, штом чу во затворот за Христовите дела, испрати двајца од своите ученици

³ и му рече: „Ти ли си Оној што треба да дојде или да чекаме друг?“

⁴ Исус им одговори и рече: „Одете и кажете му на Јован што слушате и што гледате:

⁵ слепи прогледуваат и сакати прооду­ва­ат; лепрозни се очистуваат и глуви прослушуваат; мртви воскреснуваат и на сиромашните им се проповеда Еван­гелието.

⁶ И блажен е оној што не се соблазнува поради Мене.“

⁷ А кога си отидоа овие, Исус почна да му зборува на народот за Јован: „Што сте излегле да видите во пустината? Трска ли, што се лулее од ветрот?

⁸ Но, што излеговте да видите? Човек ли, облечен во меки алишта? Ете, оние што носат меки алишта, по царски палати се.

⁹ Па, што излеговте да видите? Пророк ли? Да, ви велам, и повеќе од пророк!

¹⁰ Зашто тој е оној за кого е напишано: ‚Ете, Јас го праќам Мојот ангел пред лицето Твое, кој ќе го при­готви патот Твој пред Тебе.‘

¹¹ Вистина ви велам: меѓу родените од жена не се јавил поголем од Јован Крстител, но најмалиот во царството небесно е поголем од него!

¹² А од деновите на Јован Крстител па до сега, царството небесно со напор се освојува и силните го грабаат,

¹³ зашто сите Пророци и Законот пророкувале до Јован.

¹⁴ И, ако сакате да прифатите, тој е Илија, кој треба да дојде.

¹⁵ Кој има уши да слуша, нека чуе!“

¹⁶ „А со кого да го споредам овој род? Тој личи на деца што седат по паза­риш­тата, па им довикуваат на своите другари

¹⁷ и велат: ‚Ви свиревме и не игравте; ви тежевме и не плачевте.‘

¹⁸ Зашто дојде Јован, кој не јаде, ниту пие, а тие велат: ‚Ѓаволот е во него.‘

¹⁹ Дојде Синот Човечки, Кој јаде и пие, и велат: ‚Еве човек јадач и винопиец, пријател на цариниците и греш­ниците.‘ Но мудроста се оправда преку своите чеда.“

Грешни градови

²⁰ Тогаш почна Исус да ги укорува градовите во кои се извршија повеќето Негови чуда, бидејќи не се покајаа.

²¹ „Тешко тебе, Хоразине! Тешко те­бе, Витсаидо! Ако во Тир и Сидон беа чудата, што станаа кај вас, тие одам­на би се покајале во вреќиште и пепел;

²² но ви велам: на Тир и на Сидон ќе им биде полесно во судниот ден отколку вам!

²³ И ти, Капернауме, што си се воздигнал до небото, до пеколот ќе бидеш спуштен; зашто, ако во Содом се беа извршиле чудата што станаа во тебе, тој и до ден денес ќе останеше.

²⁴ Но ви велам дека на земјата Содом­ска ќе ѝ биде полесно на судниот ден, отколку тебе.“

Исусовиот повик

²⁵ Во тоа време, одговори Исус и рече: „Те прославувам, Оче, Господи на небото и на земјата, зашто си го сокрил тоа од мудрите и разумните, а си им го открил тоа на децата!

²⁶ Да, Оче, зашто таква беше вол­јата Твоја.

²⁷ Сѐ ми е предадено од Мојот Отец и никој не Го познава Синот, освен Отецот; ниту Отецот Го познава некој освен Синот, и кому што сака Синот да Го открие.

²⁸ Дојдете кај Мене сите изморени и обременети и Јас ќе ве успокојам.

²⁹ Земете го Мојот јарем на себе и поучете се од Мене, бидејќи сум кроток и смирен по срце, и ќе најдете спокој­ство за душите ваши.

³⁰ Зашто јаремот Мој е благ и бремето Мое е лесно.“