Марко 1 - Свето Писмо: Стандардна Библија 2006 (со девтероканонски книги)

Улогата на Јован Крстител

¹ Почеток од Евангелието на Исус Христос, Син Божји.

² Како што е напишано кај пророците: „Еве, Јас го испраќам пред ли­цето Твое Мојот ангел, кој ќе го под­готви Твојот пат пред Тебе:

³ ‚Гласот на оној, што вика во пусти­на­та: подгответе го патот на Господа, из­рамнете ги патеките Негови.‘“

⁴ Се јави Јован, крштевајќи во пустината и проповедајќи покајно крштевање за проштевање на гревовите.

⁵ И доаѓаа кај него од целата Јудејска земја и од Ерусалим, и сите се крш­те­ваа од него во реката Јордан, ис­по­ведувајќи ги своите гревови.

⁶ А Јован носеше облека од камилски влакна и појас од кожа околу половината своја, и јадеше скакулци и див мед.

⁷ Тој проповедаше, велејќи: „По мене иде Посилниот од мене, на Кого не сум достоен да се наведнам и да Му ги одврзам ремењата од обувките Негови.

⁸ Јас ве крстив со вода, а Тој ќе ве крс­ти со Дух Свети.“

Исусовото крштевање

⁹ А во оние дни дојде Исус од Назарет Галилејски и се крсти од Јован во Јор­дан.

¹⁰ И кога излегуваше од водата, вед­наш виде како се отвораат небесата, и Духот, во вид на гулаб, како слегува над Него.

¹¹ И се чу глас од небесата: „Ти си Мојот возљубен Син, во Кого е Мојата волја.“

Исусовото искушување во пустината

¹² Веднаш потоа Духот Го изведе во пустината.

¹³ И беше таму, во пустината, чети­ри­есет дни искушуван од сатаната; беше со ѕверови и ангелите Му служеа.

Исус го проповеда Евангелието во Галилеја

¹⁴ А потоа, откако Јован беше пре­да­ден, дојде Исус во Галилеја и го про­по­ведаше Евангелието за царството Божјо,

¹⁵ и велеше: „Времето се исполни и царството Божјо наближи; покајте се и верувајте во Евангелието.“

Повик до четирите рибари

¹⁶ И, одејќи покрај Галилејското Мо­ре, Исус го виде Симон и брат му Ан­дреј како фрлаат мрежа во морето, зашто беа рибари.

¹⁷ Исус им рече: „Врвете по Мене и Јас ќе ве направам ловци на луѓе!“

¹⁸ И тие веднаш ги оставија мрежите и тргнаа по Него.

¹⁹ Па, штом одмина малку, го виде Ја­ков Заведеев и брат му Јован, исто така во кораб како ги крпат мрежите;

²⁰ веднаш ги повика и нив. И тие, откако го оставија татка си Заведеј во коработ со наемниците, тргнаа по Него.

Исус во Капернаум

²¹ И дојдоа во Капернаум; и веднаш во саботата Тој влезе во синагогата и поучуваше.

²² И се чудеа на Неговата наука, зашто Тој ги учеше како Оној што има власт, а не како книжниците.

²³ Имаше во синагогата нивна човек со нечист дух, и извика,

²⁴ говорејќи: „Што имаш Ти со нас, Исусе од На­зарет! Си дошол ли да нѐ погубиш? Те знам Кој си Ти, Светец Божји!“

²⁵ Но Исус му заповеда, велејќи: „Замолкни и излези од него!“

²⁶ Тогаш го стресе нечистиот дух, па извика со силен глас и излезе од него.

²⁷ И се ужаснаа сите, така што еден со друг се прашуваа и велеа: „Што е ова!? И како е ова ново учење, што со власт и на нечистите духови им заповеда, и тие Му се покоруваат!“

²⁸ И веднаш се разнесе глас за Него по целиот Галилејски крај.

Исцелување на тештата на Симон

²⁹ Штом излегоа од синагогата, дојдоа со Јаков и Јован во куќата на Симон и Андреј.

³⁰ А тештата на Симон лежеше од треска; и веднаш Му јавија за неа.

³¹ Тој пристапи, ја фати за рака и ја подигна; и треската веднаш ја остави; и таа им служеше.

Исус исцелува мнозина

³² А приквечер, кога заоѓаше сонцето, кај Него донесуваа секакви болни и бесомачни.

³³ И целиот град се беше собрал пред портата.

³⁴ И излекува многу болни што стра­даа од разни болести; истера многу де­мони и не им дозволуваше на демоните да зборуваат, дека знаат оти Тој е Христос.

Исус во Галилеја

³⁵ А утредента, во темни зори, стана, излезе и отиде на пусто место и таму се молеше.

³⁶ А Симон, и оние што беа со Него, тргнаа да Го бараат;

³⁷ па, кога Го најдоа, Му рекоа: „Сите Те бараат!“

³⁸ А Тој им рече: „Да појдеме до блис­ките села и градови, и таму да про­по­ве­дам, зашто затоа сум дошол.“

³⁹ И проповедаше во нивните синагоги, по цела Галилеја и изгонуваше демони.

Исус исцелува лепрозен

⁴⁰ И дојде кај Него еден лепрозен, па, молејќи Го, падна пред Него и Му рече: „Ако сакаш, можеш да ме очистиш.“

⁴¹ А Исус, кога се смилува, протегна рака, се допре до него и му рече: „Сакам! Очисти се!“

⁴² И штом го рече тоа, се изгуби ле­п­ра­та од него, и тој стана чист;

⁴³ Па, откако го отпушти, му за­по­веда,

⁴⁴ и му рече: „Гледај, никому ништо да не кажуваш; но оди, покажи му се на свештеникот и принеси дар за очистува­ње, како што заповедал Мојсеј – ним за сведоштво.“

⁴⁵ А тој, штом излезе, почна да раскажува многу и да разгласува, така што Исус не можеше јавно да влезе во градот, а се задржуваше надвор, во оса­мени места. И доаѓаа кај Него отсекаде.