Лука 4 - Свето Писмо: Стандардна Библија 2006 (со девтероканонски книги)

Исусовото искушување

¹ Исполнет со Дух Свети, Исус се врати од Јордан, и беше одведен од Духот во пустината.

² Четириесет дена Го искушуваше ѓаволот. Во текот на тие денови не ја­деше ништо, а кога изминаа тие, најпос­ле огладне.

³ Тогаш Му рече ѓаволот: „Ако си Син Божји, кажи му на овој камен да стане леб.“

⁴ А Исус му одговори и рече: „Напи­шано е дека не само со леб ќе живее човекот, туку и со секој збор Божји.“

⁵ Потоа ѓаволот Го одведе на една ви­сока планина и му ги покажа за миг сите царства во светот.

⁶ И Му рече ѓаволот: „Тебе ќе Ти ја дадам сета оваа власт и нивната слава, зашто мене ми е предадена, и ја давам кому што сакам.

⁷ Ако Ти ми се поклониш, сето тоа ќе би­де Твое.“

⁸ Но Исус му одговори и рече: „Бегај од Мене, сатано, зашто напишано е: ‚На Господа, твојот Бог, поклонувај Му се и единствено Нему служи Му!‘“

⁹ И Го одведе во Ерусалим, и Го пос­тави на стреата од храмот, па Му рече: „Ако си Син Божји, фрли се одовде до­лу!

¹⁰ Зашто е напишано: ‚На ангелите Свои ќе им заповеда за Тебе да Те за­чу­ваат;

¹¹ и на раце ќе Те земат, да не си ја сопнеш ногата Своја на камен.‘“

¹² И Исус му одговори и рече: „Кажа­но е: ‚Не искушувај Го Господ, својот Бог!‘“

¹³ Па откако ѓаволот заврши со сите искушенија, се оддалечи од Него за некое време.

Исус го започнува Своето дејствување во Галилеја

¹⁴ И се врати Исус во Галилеја во си­лата на Духот; и се разнесе глас за Него по целиот тој крај.

¹⁵ А Тој поучуваше во нивните синагоги, и сите Го прославуваа.

Исус е отфрлен во Назарет

¹⁶ И дојде во Назарет, каде што беше одраснал, и по обичајот Свој влезе еден саботен ден во синагогата и стана да чита.

¹⁷ Му ја подадоа книгата на пророкот Исаија; и Тој, штом ја отвори, го најде местото каде што беше напишано:

¹⁸ „Духот Господов е врз Мене; зашто Господ Ме помаза да им со­општам ра­досна вест на сиромашните. Ме прати да ги исцелам оние со скрушено срце, да им проповедам на заробените осло­бо­дување и на слепите прогледување, да ги пуштам на слобода напате­ни­те;

¹⁹ да ја проповедам благопријатната година Господова!“

²⁰ Потоа ја затвори книгата, му ја даде на прислужникот, и седна; а очите на сите во синагогата беа вперени во Него.

²¹ И почна да им говори: „Денес се исполни ова Писмо што го чувте.“

²² И сите Му посведочија и се восхитуваа на Неговите благодатни зборови што излегуваа од устата Негова и ве­леа: „Не е ли Овој синот на Јосиф?“

²³ А Тој им рече: „Некој од вас сигур­но ќе Ми приговори со оваа изрека: ‚Лекаре, излекувај се Сам! Направи го и овде, во Твојот роден крај, она што чувме дека се случило во Капернаум.‘“

²⁴ Па им рече: „Вистина ви велам: ни­еден пророк не е омилен во својата тат­ковина.

²⁵ Навистина ви кажувам: имаше многу вдовици во Израил, во времето на Илија, кога се затвори небото три години и шест месеци и настана голем глад по целата земја;

²⁶ и кај ниедна од нив не беше пратен Илија, но само кај една жена вдовица во Сарепта Сидонска;

²⁷ и имаше мнозина лепрозни во Из­раил во времето на пророкот Елисеј, но ниеден од нив не се очисти, освен Сири­ецот Нееман.“

²⁸ А кога го слушнаа тоа, сите во си­на­гогата се исполнија со гнев;

²⁹ па станаа, Го истераа надвор од гра­дот и Го одведоа на врвот од еден рид, каде што беше соѕидан нивниот град, за да Го турнат одозгора.

³⁰ Но Тој помина меѓу нив и си отиде.

Исус во Капернаум. Силата на Неговиот збор

³¹ И слезе во Капернаум, во градот Галилејски, и ги поучуваше во саботни­те денови.

³² И се чудеа на Неговата наука, заш­то Неговото слово беше силно.

³³ Во синагогата имаше еден чо­век обземен од дух на нечист демон, и тој извика со силен глас:

³⁴ „Еј, што сакаш од нас Ти, Исусе од На­за­рет? Си дошол ли да нѐ погубиш? Те знам кој си. Ти си Светец Божји.“

³⁵ А Исус му заповеда, говорејќи: „Молкни и излези од него!“ Па откако го кутна насреде, духот зол излезе од него и ништо лошо не му направи.

³⁶ Сите ги обзеде страв, па си зборуваа меѓу себе: „Каков ли е тој збор! Зашто со власт и сила им заповеда на не­чис­ти­те духови и тие излегуваат!“

³⁷ Па се разнесе глас за Него по сите околни места.

Исус оздравува многумина болни

³⁸ Штом излезе од синагогата, влезе во куќата Симонова; а тештата на Си­мон имаше силна треска, и Го помолија за неа.

³⁹ И како застана над неа, Тој ја пре­кори треската, и таа ја остави; и жената веднаш стана и им служеше.

⁴⁰ И на зајдисонце, сите што имаа болни од разни болести ги доведуваа кај Него; а Тој, положувајќи раце над секого од нив, ги исцелуваше.

⁴¹ Од мнозина излегуваа демони со ви­кање, и велеа: „Ти си Христос, Син Божји.“ А Тој забрануваше и не им доз­волуваше да кажуваат дека знаат дека е Тој Христос.

Исус проповеда во Јудеја

⁴² Кога се раздени, Тој излезе и отиде на осамено место, а луѓето Го бараа па, кога дојдоа кај Него, Го задржуваа да не си оди од нив.

⁴³ А Тој им рече: „И на другите гра­дови треба да им ја објавам радосната вест за царството Божјо, зашто за тоа сум пратен.“

⁴⁴ И проповедаше по синагогите га­ли­лејски.