Лука 21 - Свето Писмо: Стандардна Библија 2006 (со девтероканонски книги)

За дарот од една вдовица

¹ Кога ги подигна очите, виде како богатите ги пуштаат сво­ите прилози во ризницата на храмот.

² Виде исто така и една бедна вдовица, која пушти таму две лепти,

³ па рече: „Вистина ви велам, оваа бедна вдовица од сите повеќе приложи;

⁴ сите овие дадоа прилози на Бога од својот вишок; таа, пак, пушти од својата немаштија – сиот имот што го има­ше.“

Исус го најавува разурнувањето на храмот

⁵ И додека некои зборуваа за храмот, дека е украсен со убави камења и заветни дарови, Тој им рече:

⁶ „Ќе дојде време во кое од сето ова што го гледате нема да остане ниту камен, што не ќе биде урнат.“

Блиски и далечни знаци на Судот

⁷ И Го прашаа, говорејќи: „Учителе, а кога ќе биде тоа и каков е знакот дека тоа почнува да се случува?“

⁸ Тој рече: „Внимавајте да не ве прелажат! Зашто мнозина ќе дојдат под Мое име и ќе зборуваат дека сум Јас, и дека времето се приближи. Но, не одете по нив!

⁹ А кога ќе чуете за војни и бунтови, не плашете се; сето тоа треба најнапред да се случи, но крајот е вед­наш.“

¹⁰ Тогаш им рече: „Ќе се крене народ против народ и царство против царство;

¹¹ а на некои места ќе има и големи потреси, и глад и помор; ќе има страотни појави и големи знаци на небото.

Претходните прогонства и сведоштво

¹² А пред сето тоа ќе стават раце на вас и ќе ве гонат, предавајќи ве во синагогите и затворите, и ќе ве водат пред цареви и управници, заради Моето име.

¹³ И тоа ќе ви биде вам за сведоштво.

¹⁴ И затоа врежете во вашите срца, да не размислувате однапред што ќе одговорите,

¹⁵ зашто Јас ќе ви дадам уста и муд­рост, на која не ќе можат да ѝ против­речат ниту да ѝ се противстават сите ваши противници.

¹⁶ Ќе бидете предадени исто така и од родители, и од браќа, и од роднини и од пријатели, а некои од вас ќе бидат и убиени;

¹⁷ и ќе бидете намразени од сите, заради Моето име.

¹⁸ Но, ниту влакно од главата ваша нема да загине;

¹⁹ со трпение спасувајте ги ду­шите свои.“

Исус го најавува разурнувањето на Ерусалим

²⁰ „А кога ќе го видите Ерусалим опколен од војски, тогаш знајте дека е блиску неговото запустување.

²¹ Тогаш, оние што се наоѓаат во Ју­де­ја, нека бегаат во планините; и кои се во градот, да излезат од него; а кои се по околните места, нека не влегуваат во него,

²² зашто тоа е времето на одмазда, во кое ќе се исполни сѐ што е напишано.

²³ Но тешко на бремените и доилките во тие дни, зашто голема мака ќе има по земјата, и гнев врз овој народ;

²⁴ и ќе паднат од сечилото на мечот, и ќе бидат одведени во ропство меѓу сите народи; а Ерусалим ќе го газат незна­бошци, сѐ додека не се исполнат времињата на незнабошците.“

Доаѓањето на Синот Човечки

²⁵ „И ќе има знаци на сонцето, и на месечината и на ѕвездите, а на земјата – тага кај народите од неизвесноста и од бучењето на морето, и од брановите;

²⁶ луѓето ќе умираат од страв и од исчекување на она што ќе го снајде светот, зашто и силите небесни ќе бидат разнишани.

²⁷ И тогаш ќе Го видат Синот Чо­веч­ки како доаѓа на облаци, со голема сила и слава.

Наближувањето на Царството Божјо

²⁸ А кога ќе почне тоа да станува, ис­правете се и подигнете ги главите свои, зашто се приближува вашето избавување.“

²⁹ И им ја кажа оваа парабола: „Погледнете ја смоквата и сите дрвја;

³⁰ кога ќе видите дека потеруваат, са­ми знаете дека летото е веќе близу.

³¹ Па така, кога ќе видите дека станува ова, знајте дека се приближи цар­ството Божјо.

³² Вистина ви велам, нема да помине овој род, додека не се исполни сето тоа.

³³ Небото и земјата ќе минат, но зборовите Мои нема да минат.“

Неопходно е да се биде буден

³⁴ „Само пазете се: вашите срца да не бидат натежнати од прејадување и пи­јанство, и тегобни грижи за овој живот, за да не ве затекне оној ден ненадејно;

³⁵ зашто тој ќе дојде како стапица за сите што живеат по целата земја;

³⁶ бидете будни во секое време и мо­ле­те се, за да се удостоите да го избегнете сето она што треба да се случи и да застанете пред Синот Човечки!“

Последните денови на Исус во храмот

³⁷ Дење Тој беше во храмот и поучу­ваше, а ноќе излегуваше и ноќеваше во гората наречена Маслинова.

³⁸ И сиот народ доаѓаше наутро кај Него во храмот, за да Го слуша.