Левитска 19 - Свето Писмо: Стандардна Библија 2006 (со девтероканонски книги)

Како треба да Му се служи на Бога

¹ И му рече Господ на Мојсеј, велејќи:

² „Кажи му на целото општество на синовите на Израил и речи им: бидете свети, затоа што сум свет Јас, Господ, вашиот Бог.

³ Секој да ги почитува таткото свој и мајката своја и да ги запазува Моите саботи. Јас сум Господ, вашиот Бог.

⁴ Не одете по идоли, и излеани богови не правете си. Јас сум Господ, вашиот Бог.

⁵ Кога Му принесувате на Господ жртва за мир, принесувајте ја за да биде примена.

⁶ Таа треба да се јаде во денот, кога ја принесувате, и вториот ден, а она што ќе остане во третиот ден, да се изгори на оган.

⁷ Ако некој ја јаде во третиот ден, тоа е одвратно и жртвата нема да се прими.

⁸ Оној што ќе ја јаде, ќе навлече врз себе грев, бидејќи го осквернил она што Му е свето на Господ; секој таков човек ќе биде истребен од народот свој.

⁹ Кога ја собирате жетвата од земјата своја, не ја жнеј нивата своја докрај, и паднатите класја од жетвата своја не собирај ги.

¹⁰ А и лозјето свое не собирај го до зрно, и паднатите зрна од брањето не собирај ги; остави го тоа за сиромавиот и придојдениот. Јас сум Господ, вашиот Бог.

¹¹ Не крадете, не лажете и не мамете го ближниот свој.

¹² Не колнете се лажно во Моето име, не осквернувајте го името на вашиот Бог; Јас сум Господ.

¹³ Не притеснувај го и не ограбувај го ближниот свој. Надницата на наемникот твој не смее да остане кај тебе до утредента.

¹⁴ Не навредувај глув човек и пред слеп не ставај ништо, од кое може да се сопне; имај страв од твојот Бог. Јас сум Господ.

¹⁵ Не прави неправда кога судиш: не биди пристрасен спрема сиромавиот и не угодувај му на големецот; суди му на ближниот свој по правда.

¹⁶ Не шири лага меѓу народот свој и не посегнувај врз животот на ближниот свој. Јас сум Господ.

¹⁷ Во срцето свое не мрази го братот твој; изобличи го ближниот свој и нема да ти се прими за грев поради тоа.

¹⁸ Да не се одмаздува раката твоја и не биди им непријател на синовите од народот твој, туку сакај го ближниот свој како самиот себе. Јас сум Господ.

¹⁹ Чувајте ги Моите закони: не спарувај го добитокот свој со добиток од друг род; не сеј на нивата своја два вида семе; облека ткаена од две различни преѓи не облекувај.

²⁰ Ако некој преспие со жена, а таа е робинка, свршена за маж, но уште неоткупена, или уште не ѝ е дадена слобода, да се казнат и обајцата, но не со смрт, зашто таа не е слободна;

²¹ тој нека донесе пред Господ при влезот од скинијата на собранието жрт­ва за престап: еден овен,

²² и ќе го очисти свештеникот пред Господ, преку овенот за вина, за гревот што го направил, и извршениот грев ќе му биде простен.

²³ Кога ќе дојдете во земјата, (која Господ, вашиот Бог, ви ја дава,) и ќе посадите какво и да било плодно дрво, сметајте ги плодовите негови за нечис­ти; три години неговиот плод треба да е за вас нечист и да не се јаде;

²⁴ а во четвртата година секој негов плод е свет, посветен на Господ за бла­годарност.

²⁵ Во петтата, пак, година, можете да ги јадете плодовите негови и да го собирате целиот негов род. Јас сум Господ, вашиот Бог.

²⁶ Не јадете ништо со крв; не вражајте и не гатајте.

²⁷ Не стрижете ја главата своја нао­колу и не расипувајте го крајот од брадата своја.

²⁸ Заради умрен не правете рецки по снагата своја и не цртајте букви по телото свое. Јас сум Господ.

²⁹ Не осквернувај ја ќерката своја, со тоа што ќе ѝ дозволиш да врши блуд, за да не се најде земјата во блудство и да се исполни со разврат.

³⁰ Саботите Мои пазете ги и почитувајте го она што Ми е свето. Јас сум Господ.

³¹ Не одете по оние што повикуваат духови на мртви, и до маѓесници не доближувајте се, и не дозволувајте да ве осквернат. Јас сум Господ, Бог ваш.

³² Пред бели коси станувај, почитувај го лицето на старец и имај страв од твојот Бог. Јас сум Господ.

³³ Кога придојден ќе се насели во земјата ваша, не притеснувајте го;

³⁴ придојдениот меѓу вас нека ви биде исто како тукашен; сакајте го како себеси, затоа што и вие бевте придојдени во египетската земја. Јас сум Господ, Бог ваш.

³⁵ Не правете неправда кога судите, кога мерите со метар или со тегови и кога измерувате зафатнина;

³⁶ мерките ваши да ви бидат точни, теговите точни, ефата верна и хинот верен. Јас сум Господ, Бог ваш, Кој ве изведе од египетската земја.

³⁷ Пазете го целиот Мој закон и сите Мои повелби, и извршувајте ги. Јас сум Господ.“