Левитска 17 - Свето Писмо: Стандардна Библија 2006 (со девтероканонски книги)

Светоста на Израил Прописи во врска со крвта

¹ И му рече Господ на Мојсеј, велејќи:

² „Кажи му на Арон и на синовите не­гови и на сите синови израилски и речи им: еве што заповеда Господ:

³ ако некој од домот Израилев (или некој придојден, присоединет кон вас) заколе вол или овца, или коза во населбата, или надвор од населбата,

⁴ а не го доведе при влезот од скинијата на собранието, за да Му принесе дар на Господ пред живеалиштето Не­гово, тогаш тој човек да се обвини за крв: тој пролеал крв, да се истреби од народот негов.

⁵ Така да ги принесуваат синовите из­раилски жртвите свои, што ги колат в поле и да ги донесуваат пред Господ при влезот од скинијата на собранието, кај свештеникот, и да ги колат пред Господ како жртви за мир,

⁶ и да попрска свештеникот со крв околу жртвеникот Господов при влезот од скинијата на собранието и да го за­пали лојот за благопријатен мирис пред Господ.

⁷ И да не принесуваат во иднина жрт­ви свои на идоли, во кои самите блудствуваат. Ова нека биде вечна наредба и за поколенијата ваши.

⁸ Кажи им уште: ако некој од домот Израилев или од придојдените, што живеат меѓу вас, принесува сепаленица или жртва

⁹ и не ја донесе крај влезот од скинијата на собранието, за да ја принесе пред Господ, таа душа да се истреби од народот свој.

¹⁰ Ако, пак, некој од домот Израилев или од придојдените, што живеат меѓу вас, јаде каква и да било крв, тогаш Јас ќе го свртам лицето Мое против душата на оној, што ќе јаде крв, и ќе го истребам од народот,

¹¹ зашто душата на секое тело е во неговата крв, и Јас ви ја дадов за жрт­веникот за да ги очистувате душите ваши, бидејќи таа крв ја очистува душата.

¹² Поради тоа и им реков на синовите израилски: ниедна душа меѓу вас не смее да јаде крв, па ни придојдениот, кој живее меѓу вас, не смее да јаде крв.

¹³ А, ако некој од синовите израилски и од придојдените, кои живеат меѓу вас, фати во лов диво животно или птица, што се јаде, да ја пушти крвта да истече и да ја покрие со земја,

¹⁴ зашто душата на секое тело е во крвта негова и затоа им реков на синовите на Израил: не јадете крв од никакво тело, бидејќи душата на секое тело е во крвта негова; секој што ќе ја јаде, ќе биде истребен.

¹⁵ И секој кој јаде мрша или ѕвероја­дина, ваш или придојден, нека ја испере облеката своја, и да го измие телото свое со вода и ќе биде нечист до ве­черта, а потоа ќе биде чист.

¹⁶ Ако, пак, не ги испере (алиштата), и не го измие телото свое со вода, ќе го прими своето беззаконие врз себе.“