Левитска 12 - Свето Писмо: Стандардна Библија 2006 (со девтероканонски книги)

Очистување на жената по породувањето

¹ И му рече Господ на Мојсеј, велејќи:

² „Кажи им на синовите Израилеви и речи им: кога жената ќе забремени и роди машко дете, нечиста ќе биде седум дена, како во деновите на природното очистување свое, така ќе биде нечиста.

³ А во осмиот ден нека му се обрезе на детето крајниот дел.

⁴ А таа нека остане уште триесет и три дена чистејќи се од крвта; до ништо свето да не се допира и да не влегува во светилиштето сѐ додека не изминат деновите на нејзиното чистење.

⁵ А ако роди женско дете, тогаш во времето на своето чистење нечиста ќе биде четиринаесет дена, и шеесет и шест дена нека остане, чистејќи се од крвта своја.

⁶ И кога ќе се навршат деновите на чистењето нејзино, заради синот или за­ради ќерката, нека донесе при свеште­никот пред скинијата на собранието едногодишно јагне за жртва сепаленица или млад гулаб или грлица како жртва поради грев.

⁷ И тој нека ја принесе пред Господ и така ќе ја очисти од течењето на крвта нејзина. Тоа е закон за жената која ќе роди машко или женско дете.

⁸ Ако не е во можност да донесе јагне, тогаш нека земе две грлици или две гулапчиња, едното како жртва сепаленица, а другото поради жртва за грев; и ќе ја очисти од гревот нејзин свештеникот, и таа ќе биде чиста.“