Јован 7 - Свето Писмо: Стандардна Библија 2006 (со девтероканонски книги)

Исус и Неговите браќа

¹ Потоа одеше Исус по Галилеја, за­тоа што не сакаше да оди во Јудеја, бидејќи Јудејците сакаа да Го убијат.

² Се приближуваше, пак, јудејскиот празник Сеници.

³ Тогаш браќата Негови Му рекоа: „Излези одовде и оди во Јудеја, та и учениците Твои да ги видат делата што ги вршиш.

⁴ Зашто никој не прави нешто тајно кога сака да се прочуе. Ако Ти ги вр­шиш овие работи, тогаш покажи се пред светот!“

⁵ Зашто и браќата Негови не веруваа во Него.

⁶ А на тоа Исус им одговори: „Моето време уште не е дојдено, а за вас времето е секогаш погодно.

⁷ Светов вас не може да ве мрази, а Мене Ме мрази, зашто Јас сведочам за него дека делата му се лоши.

⁸ Вие отидете на овој празник; Јас нема да излезам на овој празник, зашто вре­мето Мое сѐ уште не се исполнило.“

⁹ Откако го рече тоа, остана во Гали­леја.

Исус на празникот

¹⁰ Но, штом отидоа браќата Негови, и Тој отиде на празникот, но не јавно, туку некако скришум.

¹¹ А Јудејците Го бараа на празникот и велеа: „Каде е Оној?“

¹² И многу расправии имаше меѓу народот за Него; едни зборуваа: „Добар е“, а други велеа: „Не, туку го измамува народот!“

¹³ Но никој не зборуваше за Него от­ворено, поради страв од Јудејците.

¹⁴ А на средината од празникот, влезе Исус во храмот и поучуваше.

¹⁵ И се чудеа Јудејците, велејќи: „Ка­ко ги познава Овој Книгите, кога не учел?“

¹⁶ Тогаш им одговори Исус и рече: „Учењето Мое не е Мое, туку на Оној што Ме прати;

¹⁷ и ако некој сака да ја врши волјата Негова, ќе разбере дали е ова учење од Бога, или Јас Самиот од Себе зборувам.

¹⁸ Кој говори самиот од себе, тој си бара своја слава; а кој ја бара славата на Оној што Го пратил, Тој е вистинит и во Него нема неправда.

¹⁹ Зар не ви го даде Мојсеј Законот? Но никој од вас не го исполнува Зако­нот. Зошто сакате да Ме убиете?“

²⁰ Народот одговори и рече: „Демонот е во тебе! Кој сака да Те убие?“

²¹ Одговори Исус и им рече: „Едно де­ло извршив и сите се чудите.

²² Мојсеј ви го даде обрезанието, не затоа што тоа е од Мојсеј, туку од тат­ковците – и вие во сабота обрезува­те човек.

²³ Ако човек се обрезува во сабота, за да не се наруши Законот Мојсеев, на Мене ли се гневите што цел човек излекував во сабота?

²⁴ Не судете според надворешноста, туку судете со праведен суд!“

²⁵ Тогаш некои од Ерусалим рекоа: „Не ли е Овој што Го бараат да Го убијат?

²⁶ Ете, јавно говори и ништо не Му велат. Да не се увериле и началниците дека е Тој навистина Христос?

²⁷ Но, Овој Го знаеме од каде е, а кога ќе дојде Христос никој не ќе знае од ка­де е.“

²⁸ Тогаш Исус, поучувајќи во храмот, извика гласно и рече: „И Мене Ме познавате и знаете од каде сум; но Сам од Себе не дојдов, туку Тој што ме прати е Вистинитиот; Него вие не Го познавате.

²⁹ Јас, пак, Го знам, зашто сум од Не­го и Тој Ме прати.“

³⁰ Тогаш сакаа да Го фатат, но никој не кладе рака на Него, бидејќи уште не беше дошол часот Негов.

³¹ И мнозина од народот поверуваа во Него и велеа: „Кога ќе дојде Христос, зар ќе направи поголеми чуда откол­ку што направи Овој?“

³² Чуја фарисеите дека народот така зборува за Него, па испратија фарисеите и првосвештениците слуги да го фатат.

³³ Тогаш Исус им рече: „Уште малку време сум со вас, а потоа ќе отидам кај Оној Кој Ме прати.

³⁴ Ќе Ме барате и нема да Ме најдете; и каде што ќе бидам Јас, вие не ќе мо­жете да дојдете.“

³⁵ А Јудејците си рекоа меѓу себе: „Каде ќе оди Овој та да не можеме да Го најдеме? Да не сака да оди при раселените меѓу Елините, па и Елините да ги поучува?

³⁶ Што значат овие зборови: ‚Ќе Ме барате и не ќе Ме најдете‘; и ‚Каде што ќе бидам Јас, вие не ќе можете да дој­де­те?‘“

Изворот на жива вода

³⁷ А во последниот голем ден од праз­никот застана Исус и извика со силен глас, велејќи: „Кој е жеден нека дојде кај Мене да пие!

³⁸ Кој верува во Мене, како што е речено во Писмото, од неговата утроба, ќе потечат реки од жива вода.“

³⁹ А ова го рече за Духот, Кого што ќе Го примат оние кои веруваат во Не­го; зашто Светиот Дух уште не им беше даден, бидејќи Исус уште не беше прославен.

⁴⁰ А мнозина од народот, кога ги чуја овие зборови, рекоа: „Навистина Овој е пророк!“

⁴¹ Други велеа: „Овој е Христос.“ А некои рекоа: „Зар од Галилеја ќе дојде Христос?

⁴² Не е ли речено во Писмото дека Христос ќе дојде од семето Давидово и од гратчето Витлеем, од каде што беше Давид?“

⁴³ И така настана меѓу народот раздор за Него.

⁴⁴ А некои од нив сакаа да Го фатат, но никој не стави рака врз Него.

⁴⁵ Дојдоа, пак, слугите кај првос­веш­тениците и фарисеите и овие им рекоа: „Зошто не Го доведовте?“

⁴⁶ А слугите одговорија: „Никогаш човек не говорел така како Овој Чо­век.“

⁴⁷ Тогаш им одговорија фарисеите: „Да не се прелагавте и вие?

⁴⁸ Поверувал ли некој од началниците и фарисеите во Него?

⁴⁹ Но, овој народ, што не го знае За­конот, е проклет.“

⁵⁰ Никодим, пак, кој беше отишол кај Него ноќе, а беше еден од нив, им рече:

⁵¹ „Осудува ли нашиот Закон човек додека најнапред не го сослушаат и не дознаат што прави?“

⁵² А тие му одговорија и рекоа: „Да не си и ти од Галилеја? Испитај и ќе ви­диш дека пророк од Галилеја не се јавува!“

⁵³ И секој си отиде во својот дом.