Јован 21 - Свето Писмо: Стандардна Библија 2006 (со девтероканонски книги)

Воскреснатиот Исус им се јавува на седум Свои ученици

¹ Потоа пак им се јави Исус на учениците Свои кај Тиве­ри­јад­ското Море. А тоа се случи вака:

² беа заедно Симон Петар и Тома, наречен Близнак, Натанаил од Кана Галилејска, Заведеевите синови и двајца други од учениците Негови.

³ Симон Петар им рече: „Ќе одам да ловам риба.“ Му рекоа: „И ние ќе дој­де­ме со тебе.“ Тогаш излегоа и веднаш влегоа во кораб, но таа ноќ ништо не уловија.

⁴ А кога се раздени, застана Исус на брегот, само учениците не го познаа дека е Исус.

⁵ Исус им рече: „Чеда, имате ли неш­то за јадење?“ Му одговорија: „Не.“

⁶ А Тој им рече: „Фрлете ја мрежата од десната страна на коработ и ќе нај­де­те!“ Ја фрлија, и не можеа веќе да ја из­влечат од многу риби.

⁷ Тогаш ученикот, што го сакаше Исус, му рече на Петар: „Тоа е Господ!“ А Симон Петар, штом чу дека е Гос­под, си ја препаша облеката – зашто бе­ше необлечен, и се фрли во морето.

⁸ А другите ученици, влечејќи ја мре­жата со риби, дојдоа со кораб, зашто не беа далеку од брегот, но само околу двесте лакти.

⁹ Кога пак излегоа на брегот, видоа наложен оган, и на него ставена риба и леб.

¹⁰ Исус им рече: „Донесете од рибите што ги уловивте сега!“

¹¹ А Симон Петар влезе и ја извлече мрежата на брегот, полна со крупни ри­би, на број сто педесет и три; и макар што беа толку многу, мрежата не се скина.

¹² Исус им рече: „Дојдете, јадете!“ И никој не смееше да Го праша: „Кој си Ти?“, зашто гледаа дека е Господ.

¹³ Исус пријде, зеде леб и им даде, исто така и риба.

¹⁴ Ова беше веќе третпат како им се јави Исус на учениците Свои, откако воскресна од мртвите.

Разговор меѓу Исус и Петар

¹⁵ А кога завршија со јадењето, Исус му рече на Симон Петар: „Симоне Јо­нин, Ме љубиш ли повеќе отколку овие?“ Петар Му рече: „Да, Господи, Ти знаеш дека Те љубам!“ Исус му рече: „Паси ги јагненцата Мои!“

¹⁶ Го праша пак, повторно: „Симоне Јонин, Ме љубиш ли?“ Петар Му кажа: „Да, Господи, Ти знаеш дека Те љубам!“ Исус му рече: „Паси ги овците Мои!“

¹⁷ И по третпат му рече: „Симоне Јо­нин, Ме љубиш ли?“ Петар се нажали дека по третпат го праша: „Ме сакаш ли?“ И Му рече: „Господи, Ти сѐ знаеш; Ти знаеш дека Те љубам.“ Исус му рече: „Паси ги овците Мои!

¹⁸ Вистина, вистина ти велам: кога бе­ше помлад, сам се препашуваше и оде­ше каде што сакаше; кога ќе остариш, ќе ги рашириш рацете свои, и друг ќе те препаша и поведе на каде што неј­ќеш.“

¹⁹ А ова го рече за да покаже со каква смрт ќе го прослави Бог. И штом го кажа тоа, му рече: „Врви по Мене!“

Омилениот ученик и сведоштвото кое останува

²⁰ А Петар, кога се заврти, виде дека по него оди оној кого Исус посебно го сакаше и кој на вечерата се беше на­ва­лил на градите Негови и прашуваше: „Господи, кој ќе Те предаде?“

²¹ Штом го виде Петар него, Му рече на Исус: „Господи, а овој, пак, зошто?“

²² Исус му рече: „Ако сакам тој да ос­тане додека да дојдам, тебе што ти е? Ти врви по Мене!“

²³ И се пренесе овој збор меѓу браќата дека тој ученик нема да умре. Но Исус не му рече дека нема да умре, туку: „Ако сакам тој да остане додека дојдам, тебе што ти е?“

²⁴ Тој е ученикот кој сведочи за овие нешта и кој го напиша ова; и знаеме дека све­доштвото негово е вистинско.

²⁵ А има и многу други работи што ги изврши Исус и кои, ако би се напишале по ред, ми се чини не би можеле да се сместат во целиот свет напишаните книги. Амин!