Исход 5 - Свето Писмо: Стандардна Библија 2006 (со девтероканонски книги)

Мојсеј и Арон кај фараонот

¹ А потоа Мојсеј и Арон дојдоа кај фараонот, па му рекоа: „Вака вели Господ, Бог Израилев – ‚Пушти го народот Мој, да празнува празник во Моја чест во пустината.‘“

² Но фараонот рече: „Кој е тој Господ, за да го послушам гласот Не­гов, и да ги пуштам синовите израилски? Не Го познавам тој Господ, ниту ќе го пуштам народот израилски.“

³ А тие рекоа: „Бог на Евреите нѐ повика нас три дена пат да одиме во пустината, за да Му принесеме жртва на Господ, нашиот Бог, та да не ни испрати помор или убиство.“

⁴ Тогаш царот египетски им рече: „Зошто вие, Мојсеј и Арон, го одвлекувате (мојот) народ од неговата работа? Одете (си секој од вас по својата работа)!“

⁵ И фараонот уште додаде: „Ете, сега кога народот се намножи во земјата, вие сакате да го натерате да не работи!“

Фараонот им ја наголемува работата на Евреите

⁶ И веднаш им заповеда фараонот на надзорниците над народот и на настојниците негови, и рече:

⁷ „Отсега на народот нема да му да­вате плева за правење тули, како до­сега: туку сами нека одат да си собираат плева.

⁸ А колку тули досега правеле, настојувајте толку да прават и отсега: ништо не намалувајте; зашто се без работа, па затоа викаат и велат – ‚Да одиме и да Му принесеме жртва на нашиот Бог.‘

⁹ Нека им се зголеми работата на тие луѓе, за да работат повеќе и да не се занимаваат со празни зборови.“

¹⁰ И излегоа надзорниците и настој­ниците, и му рекоа на народот: „Вака вели фараонот: нема да ви давам веќе плева;

¹¹ одете сами и собирајте си плева, каде што ќе најдете; а од работата нема ништо да ви се намали.“

¹² И се разотиде народот по целата земја египетска за да собира стрника наместо плева.

¹³ А надзорниците (ги) навалуваа, велејќи: „Вршете ги вашите (определени) работи секој ден, како и порано кога имавте плева.“

¹⁴ А настојниците од родот на сино­вите израилски, кои ги поставија над нив надзорниците на фараонот, беа би­­ени и им се велеше: „Зошто ни вчера, ни денес не изработивте толку тули, колку што ви е определено, како што пра­вев­те порано?“

¹⁵ И отидоа настојниците на синовите израилски пред фараонот, па извикаа и рекоа: „Зошто постапуваш така со слу­гите твои?

¹⁶ Плева не им се дава на слугите твои, а пак ни се вели: правете тули. И ете, ги бијат слугите твои. Го онеправдуваат твојот народ.“

¹⁷ Но тој им одговори: „Седите без работа, не работите, па затоа велите: ‚Да одиме да Му принесеме жртва на Господ.‘

¹⁸ Затоа сега одете, работете; плева нема да ви се дава, а вие определениот број тули ќе го предавате.“

¹⁹ И настојниците на синовите израилски се видоа во зло, бидејќи им беше речено: „Дневната количина на тулите не смеете да ја намалите.“

²⁰ А кога излегоа откај фараонот, ги сретнаа Мојсеј и Арон, кои стоеја и ги очекуваа.

²¹ Па им рекоа: „Бог нека види и нека ви суди што нѐ направивте омразени кај фараонот и кај службениците негови, и им дадовте меч во рацете, за да нѐ убиваат!“

²² Тогаш Мојсеј се обрна кон Господ и рече: „Господи, зошто го воведе во не­волја овој народ и зошто ме испрати мене?

²³ Зашто, откако излегов пред фараонот и проговорив во Твое име, тој уште полошо постапува со овој народ? Ти не го избави народот Свој!“