Исход 31 - Свето Писмо: Стандардна Библија 2006 (со девтероканонски книги)

Градителите на скинијата

¹ И му рече Господ на Мојсеј, велејќи:

² „Ете, го определив по име Веселеил, син на Уриј, синот на Ор, од племето Јудино;

³ и го исполнив со Духот Божји, со мудрост, разум, знаење и секаква умеш­ност;

⁴ да работи со злато, сребро и бакар; (со сина, пурпурна и црвена волна и со испреден висон);

⁵ да реже камења, да прави дрвени изработки, за секакви потреби.

⁶ И, ете, му го дадов за помошник Охолијав, синот на Ахисамах, од племето Даново; и на сите способни луѓе им дадов разум да се потрудат да направат сѐ како што ти заповедав:

⁷ скинијата, и ковчегот на заветот, и очистилиштето над него, и сиот прибор во скинијата;

⁸ и трпезата со сите нејзини принад­лежности, и светилникот од чисто злато со сите делови негови, и кадилниот жртвеник;

⁹ жртвеникот за жртви сепаленици со сиот негов прибор, и мијалникот и подножјето негово;

¹⁰ и одеждите на Арон за служење и одеждите на синовите Аронови, со кои ќе ми свештенодејствуваат;

¹¹ и маслото за помазание, и кадивото благопријатно за светилиштето – сѐ нека направат така, како што ти заповедав.“

Празнување на саботата

¹² И пак му рече Господ на Мојсеј, велејќи:

¹³ „Кажи им на синовите на Израил така: пазете ги саботите Мои, зашто тоа е знак меѓу Мене и вас од колено до колено, за да знаете дека Јас сум Господ, Кој ве осветува.

¹⁴ Пазете ја саботата, бидејќи таа е света за вас: кој ќе ја оскверни, да се погуби. Секој, кој ќе врши некаква ра­бо­та во тој ден, таа душа нека се истреби од народот свој.

¹⁵ Шест дена нека се работи; а седми­от ден е сабота, ден за одмор, посветен на Господ: секој, кој ќе работи во саботен ден, нека се предаде на смрт.

¹⁶ Затоа синовите израилски нека ги пазат саботите, празнувајќи ги во родовите свои како вечен завет.

¹⁷ Тоа е знак меѓу Мене и синовите на Израил довека; зашто во шест дена ги создаде Господ небото и земјата, а во седмиот ден си отпочина и се одмори.“

¹⁸ И кога Бог престана да зборува со Мојсеј на Планината Синајска, му ги даде двете плочи на заветот – камени плочи, напишани со прст Божји.