Исход 3 - Свето Писмо: Стандардна Библија 2006 (со девтероканонски книги)

¹ Мојсеј го пасеше стадото на Јотор, тестот свој, свештеникот мидјански. Еднаш го одведе стадото далеку во пустината и дојде до Божјата планина Хорив.

² И му се јави ангел Господов во огнен пламен од средината на една грмушка. И виде тој, а тоа грмушката гори со оган, а не изгорува.

³ И Мојсеј рече: „Да појдам да го видам ова чудо, зошто грмушката не изгорува?“

⁴ А кога Господ виде дека тој доаѓа да види, извика Господ од грмушката и рече: „Мојсеј, Мојсеј!“ А тој одговори: „Еве ме, Господи!“

⁵ А Тој рече: „Не приоѓај ваму. Собуј си ги обувките од нозете, зашто ова место, на кое стоиш, е света земја.“

⁶ И му рече: „Јас сум Бог на таткото твој, Бог Авраамов, Бог Исаков и Бог Јаковов.“ А Мојсеј го закри лицето свое, зашто се плашеше да погледне во Бога.

⁷ И Господ му рече (на Мојсеј): „Ги видов страдањата на народот Мој во Египет, и го чув пискотот негов од надзорниците. Позната ми е маката негова.

⁸ Па слегов да го избавам од рацете египетски, и да го изведам од таа земја и да го воведам во земја добра и пространа, во земја, каде што тече мед и млеко, во земјата на Хананците, Хитиј­ците, Аморејците, Перизијците, Евејци­те и Јевусијците.

⁹ И еве, сега викотот на израилските синови стигна до Мене, и Јас го видов гнетот, со кој ги мачат Египќаните.

¹⁰ А сега појди – Јас те испраќам кај фараонот, (египетскиот цар,) за да го изведеш од Египет народот Мој, синовите израилски.“

Бог му го открива Своето имена Мојсеј

¹¹ Мојсеј, пак, Му проговори на Бога: „Кој сум јас, та да одам кај фараонот, и да ги изведам синовите на Израил од земјата египетска?“

¹² А Тој рече: „Јас ќе бидам со тебе, и еве ти знак дека Јас сум те испратил: Кога ќе го изведеш народот од Египет, ќе Му служите на Бога на оваа планина.“

¹³ А Мојсеј Му рече на Бога: „Еве, ќе појдам кај синовите израилски и ќе им речам: ‚Бог на татковците ваши ме ис­пра­ќа кај вас.‘ И ако тие ме прашаат: ‚како Му е името‘, што ќе им речам тогаш?“

¹⁴ Бог му одговори на Мојсеј, велејќи: „Јас сум Оној, Кој вечно постои!“ Па продолжи: „Така ќе им кажеш на си­новите израилски: ‚Оној, Кој вечно постои, ме испрати кај вас.‘“

¹⁵ И пак му рече Бог на Мојсеј: „Вака кажи им на синовите израилски: ‚Гос­под Бог на татковците наши, Бог Авра­амов, Бог Исаков и Бог Јаковов ме испрати кај вас. Ете тоа е името Мое вечно, и тоа е споменот за Мене од ко­лено на колено.‘

¹⁶ Оди и собери ги израилските старе­шини, и кажи им: Господ, Бог на тат­ковците ваши, ми се јави, Бог Авра­амов, (Бог) Исаков и (Бог) Јаковов, и ми рече: ‚Ве посетив и видов што ви се прави во Египет.‘

¹⁷ И реков: ‚Ќе ве изведам од маките египетски во земјата на Хананците, Хитијците, Аморејците, Перизијците, (Гергесејците,) Евејците, и Јевусијците, во земја каде што тече мед и млеко!‘

¹⁸ И тие ќе го послушаат гласот твој; а ќе отидеш ти и израилските стареши­ни кај (фараонот,) царот египетски, и ќе му речете: ‚Господ, Бог на Евреите, нѐ повика да појдеме на три дена пат во пустината, за да Му принесеме жртва на Господ, нашиот Бог.‘

¹⁹ А Јас знам дека (фараонот,) царот египетски нема да ви дозволи да изле­зете, ако не го натера силна рака.

²⁰ Но ќе ја пружам раката Своја, и ќе го притиснам Египет со сите Мои чудеса, што ќе ги направам таму; потоа ќе ве пушти.

²¹ И ќе му дадам милост на овој народ кај Египќаните, така што, кога ќе појдете, нема да појдете со празни раце.

²² Туку секоја жена нека побара од сосетката своја и од онаа што живее во домот нејзин сребрени и златни предмети и облека; и ќе ги украсите со нив синовите ваши и ќерките ваши, и така ќе го ограбите Египет.“