Броеви 32 - Свето Писмо: Стандардна Библија 2006 (со девтероканонски книги)

Три колена се населуваат источно од Јордан

¹ Рувимовите потомци и потомците на Гад имаа многу добиток; и тие видоа дека земјата Јазер и земјата Галаад се погодни места за стада.

² И Гадовите потомци и Рувимовите потомци дојдоа и им кажаа на Мојсеј и на свештеникот Елеазар, и на кнезовите народни, велејќи:

³ „Атарот, Дивон, Јазер, Нимра, Есе­вон, Елале, Севам, Нево и Беон –

⁴ земјата, која Господ им ја предаде на синовите израилски, е земја за одгледување стада, а твоите слуги имаат стада.“

⁵ И рекоа: „Ако сме нашле милост во очите твои, дај им ја таа земја на твоите слуги во владение; не нѐ преведувај преку Јордан.“

⁶ И им рече Мојсеј на потомците на Гад и на Рувимовите потомци: „Браќата ваши ќе отидат во војна, а вие тука ли ќе останете?

⁷ Зошто го одвраќате срцето на синовите израилски да одат во земјата што Господ им ја дава?

⁸ Не направија ли така татковците ваши, кога ги испраќав од Ка­дис-Барнеа да ја видат земјата?

⁹ Тие отидоа до долината Ешкол и ја видоа земјата, и го одвратија срцето на синовите израилски, за да не отидат во земјата, која Господ им ја дава;

¹⁰ и во оној ден се разгори гневот на Господ и Тој се заколна, велејќи:

¹¹ ‚И тие луѓе, што излегоа од Египет, од дваесет години и нагоре (кои знаат што е добро и што е зло), нема да ја видат земјата, за која им се бев заколнал на Авраам, Исак и Јаков, зашто тие не Ме послушаа,‘

¹² освен Халев, синот на Јефуне, и Исус, синот Навинов, зашто тие Му се покоруваа на Господ.

¹³ И се разгоре гневот на Господ против Израил, и Тој ги водеше по пустината четириесет години; додека не изгина целиот род, кој беше направил зло пред Господ.

¹⁴ И ете, наместо татковците ваши, востанавте вие, изроди од грешници, за да го зголемите уште повеќе гневот на јароста Господова против Израил.

¹⁵ Ако се одвратите од Него, Тој пак ќе го остави Израил во пустината, и вие ќе го погубите сиот овој народ.“

¹⁶ И тие се приближија до него и ре­коа: „Ќе направиме тука кошари за на­шите стада и градови за нашите деца;

¹⁷ а самите ние први ќе се вооружиме и ќе одиме пред синовите израилски, додека не ги одведеме до местата нив­ни; нашите деца, пак, нека останат во утврдени градови, за да бидат во безо­пасност од месните жители;

¹⁸ нема да се вратиме во домовите на­ши сѐ додека не стапат синовите изра­илски – секој на својот дел;

¹⁹ зашто нема да земеме заедно со нив дел од онаа страна на Јордан и понатаму, ако ни се даде дел од оваа страна на Јордан, кон исток.“

²⁰ Тогаш Мојсеј им рече: „Ако го направите тоа, ако отидете вооружени во војна пред Господ,

²¹ и секој од вас вооружен го мине Јордан пред Господ, додека не ги истреби Тој пред Себе Своите непријатели,

²² и кога земјата ќе биде покорена пред Господ, тогаш ќе се вратите и нема да бидете виновни пред Господ и пред Израил, и ќе ја владеете оваа земја пред Господ.

²³ Но ако не постапите така, ќе згре­шите пред Господ и за гревот свој ќе претрпите казна, што ќе ве стигне.

²⁴ Изградете градови за децата ваши и трла за добитокот ваш, и извршете го она, што го кажавте со устата своја!“

²⁵ Тогаш потомците на Гад и на Рувим му рекоа на Мојсеј: „Слугите твои ќе направат така, како што заповеда гос­подарот наш;

²⁶ децата, пак, наши, жените наши, стадата наши и сиот наш добиток нека останат тука во градовите на Галаад,

²⁷ а слугите твои, сите вооружени и подготвени како војници, пред Господ ќе појдат во војна, како што вели нашиот господар.“

²⁸ И Мојсеј им заповеда на свештени­кот Елеазар и на Исус, Навиновиот син, и на началниците над колената од сино­вите израилски,

²⁹ и им рече: „Ако потомците на Гад и на Рувим го преминат заедно со вас Јор­дан, сите вооружени и подготвени за во­јување пред Господ, и ја покорите земјата пред вас, дајте им ја да ја владеат земјата Галаад.

³⁰ Ако пак не тргнат заедно со вас вооружени (за војна пред Господ, тогаш испратете ги пред вас имотите нивни, нивните жени и нивниот добиток во ха­нанската земја и), нека и тие добијат дел, заедно со вас, во земјата хананска.“

³¹ Тогаш потомците на Гад и на Рувим одговорија и рекоа: „Како што ни запо­веда Господ на слугите твои, така и ќе направиме;

³² ние ќе тргнеме вооружени пред Господ за хананската земја, а дајте ни ја во владение наше оваа страна на Јор­дан.“

³³ И им го даде Мојсеј – на потомците на Гад и на Рувим и на половината од коленото на Манасија, синот на Јосиф, – царството на Сион, аморејски цар, и царството на Ог, башански цар, земјата со градовите нејзини и околиите нивни, – градовите со земјата околу нив.

³⁴ И тогаш потомците на Гад го из­градија Дивон, Атарот, Ароер,

³⁵ Атрот-Шофан, Јазер, Јогбеха,

³⁶ Бет-Нимра и Бет-Харан, градови утврдени, и огради за овци.

³⁷ А потомците на Рувим ги изградија Есевон, Елале, Кирјатаим,

³⁸ Нево, Ваал-Меон, чии имиња беа изменети, и Сивма; и им дадоа имиња на градовите, што ги изградија.

³⁹ И отидоа потомците на Махир, Ма­насиев син, во Галаад, и го презедоа и ги протераа Аморејците, што живееја таму.

⁴⁰ И им го даде Мојсеј Галаад на потомците на Махир, син Манасиев, и тие се населија таму.

⁴¹ Јаир, пак, потомок Манасиев, отиде и ги презеде селата нивни и ги нарече Јаирови села.

⁴² А Новах отиде и го зазеде Кенат и околните места, и го нарече според името свое: Новах.