Броеви 25 - Свето Писмо: Стандардна Библија 2006 (со девтероканонски книги)

Израилците се оддаваат на идолопоклонство

¹ Израил живееше во Ситим и народот почна преку блуд да се осквернува со ќерките на Моав;

² и тие го покануваа народот да при­суствува на принесувањето жртви на идолите нивни, и народот ги јадеше жртвите нивни и им се поклонуваше на боговите нивни.

³ И му се приклони Израил на Ваал-Фегор. И се разгоре гневот Гос­подов против Израил.

⁴ И му рече Господ на Мојсеј: „Земи ги сите началници народни и обеси ги пред Господ спроти сонцето, и ќе се одврати јаросниот гнев Господов од Израил.“

⁵ Тогаш Мојсеј им рече на судиите израилски: „Секој нека ги убие своите луѓе, што му служат на Ваал-Фегор.“

⁶ И ете, еден од синовите на Израил дојде и доведе кај еден од своите собраќа една Мидјанка, пред очите на Мојсеј, и пред очите на целото опште­ство на синовите израилски, кога тие плачеа при влезот од скинијата на соб­ранието.

⁷ Финес, синот на Елеазар, син на свеш­теникот Арон, кога го виде тоа, стана среде општеството и зеде во раката ко­пје,

⁸ и влезе по Израилецот во блуди­лиштето и ги прободе и обајцата: Изра­илецот и жената во утробата нејзина; и престана поморот на синовите израил­ски.

⁹ А умрените од помор беа дваесет и четири илјади.

¹⁰ И му рече Господ на Мојсеј, ве­лејќи:

¹¹ „Финес, синот на Елеазар, син на свештеникот Арон, ја одврати јароста Моја од синовите израилски, покажу­вајќи меѓу нив ревност за Мене, и Јас не ги истребив синовите на Израил во ревноста Своја.

¹² Така кажи им: ете, Јас му давам мирен завет;

¹³ и тој ќе биде за него и за потомството негово по него завет на вечно свештенство, затоа што покажа ревност за својот Бог и Го омилостиви за синовите израилски.“

¹⁴ Името на убиениот Израилец, кој беше убиен со Мидјанката, е Замвриј, син на Салу, началник на родот Симе­оновци;

¹⁵ а името на убиената Мидјанка е Козби; таа беше ќерка на Цур, начал­ник на едно од племињата на Мидја­ните.

¹⁶ Пак му рече Господ на Мојсеј, ве­лејќи:

¹⁷ „Сметајте ги за непријатели Мидја­ните и поразувајте ги,

¹⁸ зашто тие со подмолноста своја постапуваа непријателски спрема вас, соблазнувајќи ве со Фегор и со Козби, ќерката на мидјанскиот началник, нив­на сестра, убиена во денот кога имаше помор поради Фегор.“