Броеви 13 - Свето Писмо: Стандардна Библија 2006 (со девтероканонски книги)

Извидници во земјата хананска

¹ Потоа народот тргна од Хацерот и се улогори во пустината Фаран.

² И му рече Господ на Мојсеј, велејќи:

³ „Испрати од себе луѓе да ја разгледаат хананската земја, што Јас им ја давам на синовите израилски во владение: по еден човек од секое колено на предците нивни испратете – првенците меѓу нив!“

⁴ Тогаш Мојсеј ги испрати од пустината Фаран, по заповед Господова, и тие сите беа мажи, старешини на синовите израилски.

⁵ Еве ги имињата нивни: од Рувимо­вото колено – Шамуа, Закуровиот син;

⁶ од Симеоновото – Сафат, Хориевиот син;

⁷ од Јудиното колено – Халев, Јефу­неовиот син;

⁸ од Исахаровото колено – Јигал, Јоси­фовиот син;

⁹ од Ефремовото колено – Осија, На­виновиот син;

¹⁰ од Венијаминовото – Палтиј, Рафу­о­­виот син;

¹¹ од Завулоновото колено – Гадиел, Содиевиот син;

¹² од Јосифовото колено на синовите Манасиини – Гадиј, Сусиевиот син;

¹³ од Дановото колено – Амиел, синот на Гемалиј;

¹⁴ од Асировото колено – Сетур, Ми­хаиловиот син;

¹⁵ од Нефталимовото колено – Нах­биј, Вафсиевиот син;

¹⁶ од Гадовото колено – Геуел, Махие­виот син.

¹⁷ Тоа се имињата на мажите, што ги испрати Мојсеј да ја разгледаат земјата. И го нарече Мојсеј Осија, Навиновиот син, Исус.

¹⁸ Ги испрати Мојсеј (од пустината Фаран) да ја разгледаат хананската земја и им рече: „Одете во онаа пустина и качете се на планината,

¹⁹ и погледајте ја земјата каква е, и на­родот, што живее таму: силен ли е или е слаб, малуброен ли е или е многу­броен;

²⁰ и каква е земјата, каде што живее тој, добра ли е или лоша; и какви се градовите, во кои живее, – оградени ли се или не.

²¹ Каква е земјата, плодна ли е или не, има ли на неа дрвја или нема? Бидете храбри, па земете од плодовите на земјата.“ А тоа беше во времето кога зрее грозјето.

²² Тие отидоа и ја разгледаа земјата од пустината Син дури до Рехов, близу до Емат;

²³ и одејќи по пустината, тие стигнаа до Хеврон, каде што живееја Ахиман, Шешај, и Талмај, од родот на Анак; а Хеврон беше изграден седум години порано од египетскиот град Цоан;

²⁴ и дојдоа до долината Ешкол (и ја разгледаа), и таму пресекоа прачка со еден грозд, и обајца ја понесоа на стап; зедоа и калинки и смокви;

²⁵ тие го нарекоа тоа место Лозова долина (долина Ешкол), поради гроздот што го пресекоа таму синовите израилски.

Одговорот на Мојсеевите извидници

²⁶ И откако ја разгледаа земјата, се вратија по четириесет дена.

²⁷ И кога пристигнаа и дојдоа кај Мој­сеј и Арон и кај целото општество на синовите израилски во пустината Фа­ран, во Кадис, тие му донесоа таму и на целиот народ одговор, и им ги покажаа плодовите од онаа земја;

²⁸ и му раскажаа и рекоа: „Бевме во земјата, во која нѐ испрати; во неа на­вис­тина тече мед и млеко, и еве ги плодовите нејзини;

²⁹ но народот, кој живее во таа земја, е силен, и градовите се укрепени и мно­гу големи; таму ги видовме и потомците на родот Анаков.

³⁰ Амалик живее во јужниот дел на земјата, а Хитијците, (Евејците), Јеву­сијците и Аморејците живеат по планината; Хананците, пак, живеат крај мо­рето и по брегот на Јордан.“

³¹ Но Халев го успокојуваше народот пред Мојсеј, велејќи: „Да појдеме и да ја преземеме, зашто можеме да ја покориме!“

³² А оние, што беа оделе заедно со него, рекоа: „Не можеме да одиме против тој народ, зашто е посилен од нас.“

³³ И протурија ужасни гласови меѓу синовите израилски за земјата, што ја беа разгледале и велеа: „Земјата што ја изодивме, за да ја разгледаме, е земја, која ги голта своите жители, и сите, што ги видовме на неа, се многу поголеми.

³⁴ И таму видовме огромни луѓе од потомците на родот Анаков; ние изгледавме пред нив како скакулци; такви бевме и во нивните очи.“