Агеј 2 - Свето Писмо: Стандардна Библија 2006 (со девтероканонски книги)

Славата на идниот храм

¹ Во седмиот месец, на дваесет и првиот ден од месецот, дојде сло­во Господово преку пророкот Агеј:

² „Кажи им сега на Зоровавел, си­нот на Салатиил, управителот на Ју­деја, и на Исус, Јоцадаковиот син, првосвештеникот, и на другиот народ:

³ Кој од вас што останавте, го видел овој храм во неговата поранешна слава, а како вие сега го гледате овој? Не е ли овој како ништо во вашите очи?

⁴ Но охрабри се сега, Зоровавеле, – вели Господ – ободри се, Исусе, сине Јоцадаков, првосвештенику, охрабре­те се сите народи овде – вели Господ – и работете, зашто Јас сум со вас“, ве­ли Господ Саваот.

⁵ „Како што ви ветив, кога излеговте од Египет, Мојот Дух ќе биде меѓу вас: не плашете се!“

⁶ Зашто вака вели Господ Саваот – „Уште еднаш – и ете, скоро ќе се слу­чи тоа – ќе ги затресам небото и земјата, морето и копното;

⁷ ќе ги стресам сите народи – и ќе дојде богатството на сите народи и ќе се исполни овој дом со слава“, вели Господ Саваот.

⁸ „Среброто е Мое и златото е Мое“ – вели Господ Саваот.

⁹ „Славата на овој нов храм ќе биде поголема отколку на поранешниот – вели Господ Саваот; и на ова место ќе му дадам мир“, вели Господ Саваот.

Минатото и иднината

¹⁰ На дваесет и четвртиот ден од деветтиот месец, во втората година на Дариј, дојде слово Господово преку пророкот Агеј:

¹¹ „Вака вели Господ Саваот – пра­шај ги свештениците за Законот и кажи –

¹² ако некој би носел осветено месо во полата од облеката своја, и со по­лата би се допрел до леб, или до неш­то варено или до вино, или до масло, или до какво и да е друго јадење, дали би се осветило тоа?“ Одговорија свештениците и рекоа: „Не.“

¹³ Потоа пак рече Агеј: „Ако некој се осквернил, допирајќи мртовец и потоа би се допрел до тоа, дали би станало тоа нечисто?“ Одговорија свештениците и рекоа – „Ќе стане нечисто.“

¹⁴ Тогаш рече Агеј – таков е и овој народ, такво е и ова племе пред Мене, вели Господ, и такви се сите дела на рацете негови! Па што и да принесувате, сѐ ќе биде нечисто.

¹⁵ А сега размислете за минатото и за иднината, кога уште не беше поло­жен камен на камен во овој храм Господов,

¹⁶ како изгледавте? Доаѓавте до куп­че од дваесет мери, а имаше само де­сет; доаѓавте да црпите од каца со зафатнина од педесет мери, а имаше само дваесет мери.

¹⁷ Ве поразував со гламја и со млечка по житата и со град во секое дело на рацете ваши, но вие не се обративте кон Мене, вели Господ.

¹⁸ Размислете од денес за натаму, од дваесет и четвртиот ден во овој деветти месец, од денот кога беше основан храмот Господов; обратете ги срцата ваши:

¹⁹ Има ли уште во житниците семе? Досега ни лозата, ни смоквата, ни нарот, ни маслината не даваа плод; а од денес Јас ќе ве благословувам.

Божјо Слово до Зоровавел

²⁰ И дојде слово Господово до пророкот Агеј по вторпат на дваесет и четвртиот ден од месецот, и беше речено:

²¹ „Кажи му на Зоровавел, управи­телот на Јудеја: ќе го затресам небото и земјата;

²² ќе урнам престоли на царства нез­набожечки, ќе превртам бојни ко­ли и оние што ќе седнат во нив, и кутнати ќе бидат и коњите и коњаниците нив­ни ќе паднат, секој од мечот на својот другар.

²³ Во тој ден, вели Господ Саваот, ќе те земам, Зоровавеле, сине Сала­ти­илов, слуго Мој, вели Господ, и ќе те држам како печат, бидејќи те избрав.“