Матеј 13 - Свето Писмо: Стандардна Библија 2006 (66 книги)

Параболи за Божјото царство

¹ Излегувајќи тој ден од куќата, Исус седна покрај морето.

² И се собра околу Него многу народ, така што Тој влезе во кораб и седна, а сиот народ стоеше на брегот.

Парабола за сејачот

³ И им говореше многу во параболи, велејќи: „Ете, излезе сејач да сее;

⁴ и кога сееше, едни зрна паднаа по­крај патот; долетаа птици и ги искол­ваа.

⁵ Други паднаа на каменито место, ка­де што немаше многу земја, и набргу проникнаа, зашто земјата не беше дла­бока.

⁶ Но, штом изгреа сонцето, тие свенаа, па, бидејќи немаа корен, се ису­ши­ја.

⁷ Некои паднаа во трње и израсна тр­њето и ги задуши.

⁸ Други паднаа на добра земја и дадоа добар плод; едно сто, друго шеесет, а трето триесет.

⁹ Кој има уши да слуша, нека чуе.“

Целта на параболите

¹⁰ И кога се приближија до Него уче­ниците, Му рекоа: „Зошто им зборуваш во парабола?“

¹¹ А Тој им одговори и рече: „Зашто вам ви е дадено да ги знаете тајните на царството небесно, а ним не им е дадено.

¹² Кој има ќе му се даде и ќе му се преумножи; а кој нема, ќе му се земе и она што го има.

¹³ Затоа им зборувам во параболи, за­што гледаат и не видат; слушаат и не можат да чујат, ниту пак, разбира­ат;

¹⁴ и над нив се исполнува про­рош­твото на Исаија, кој вели: ‚Со уши ќе чу­ете и нема да разберете, со очи ќе гледате и нема да видите;

¹⁵ срцето на овие луѓе закоравело и со ушите тешко слушаат; и ги затвориле очите свои за да не можат никогаш со очите да видат и со ушите да чујат и со срцето да разберат, та да се покајат и да ги исцелам.‘

¹⁶ Вашите, пак, очи се блажени, би­деј­ќи гледаат и ушите ваши – бидејќи слу­шаат;

¹⁷ зашто вистина ви велам: многу пророци и праведници сакаа да видат што гледате вие, и не видоа, и да чујат што слушате вие, и не чуја.“

Објаснување на параболата за сејачот

¹⁸ „Вие, пак, чујте ја параболата за се­јачот.

¹⁹ Кај секого, што го слуша словото за царството и не го разбира, доаѓа лу­ка­виот и го граба посеаното во срцето не­гово; ете, тоа означува посеаното по­крај патот.

²⁰ А посеаното на камен е оној што го слуша словото и веднаш со радост го прима;

²¹ но нема во себе корен и е непостојан: дојдат ли неволји или гонење заради словото, веднаш отстапува.

²² Посеаното, пак, во трње е оној што го слуша словото, но грижите од овој свет и примамливото богатство го за­ду­шуваат словото и тоа останува без род.

²³ А посеаното на добра земја е оној што го слуша словото и го разбира, и дава плод: еден сто, друг шеесет, а трет триесет.“

Парабола за каколот

²⁴ И друга парабола им кажа, велејќи: „Царството небесно прилега на човек што посеал добро семе на својата нива.

²⁵ Но, додека спиеја луѓето, дојде не­говиот непријател и посеја меѓу житото какол, па си отиде.

²⁶ А кога израсна растението и донесе плод, тогаш се појави и каколот.

²⁷ И кога дојдоа слугите на стопанот, му рекоа: ‚Господаре, нели добро семе посеа на нивата своја? Од каде сега, пак, овој какол во неа?‘

²⁸ А тој им рече: ‚Непријателот го на­прави тоа!‘ Слугите, пак, му рекоа: ‚Са­каш ли да одиме и да го исплевиме?‘

²⁹ Но тој им рече: ‚Не, да не би, кор­нејќи го каколот, да искорнете заедно со него и жито;

³⁰ оставете нека расте и едното и другото, до жетвата; а по жетвата ќе им кажам на жетварите: соберете го најна­пред каколот и врзете го во снопови, за да се изгори; а, житото приберете го во мојата житница.‘“

Парабола за синаповото зрно

³¹ И друга парабола им кажа, кога ре­че: „Царството небесно прилега на си­напово зрно, кое човек го зел и го по­се­ал на нивата своја.

³² Тоа е најмало од сите семиња, но кога ќе израсне, поголемо е од сите гр­мушки, па станува дури и дрво, така што птиците небески долетуваат и застануваат на неговите гранки.“

Парабола за квасецот

³³ И друга парабола им кажа: „Цар­ството небесно прилега на квасец, што го зема жена и го клава во три мери брашно, дури не скисне сето.“

Зошто Исус зборува во параболи

³⁴ Сето ова му го зборуваше Исус на народот во параболи и без параболи не им говореше ништо;

³⁵ за да се исполни реченото преку пророкот кој вели: „Со параболи ќе ја отворам устата Своја; ќе ги искажам тајните од создавањето на светот.“

Значењето на параболата за каколот

³⁶ Тогаш Исус го остави народот и влезе во една куќа. А учениците се приближија до Него и Му рекоа: „Про­тол­кувај ни ја параболата за каколот на нивата!“

³⁷ А Тој им одговори и рече: „Сејачот на доброто семе е Синот Човечки.

³⁸ Нивата е овој свет; доброто семе – тоа се синовите на царството, а каколот – синовите на лукавиот.

³⁹ Непријателот, пак, што го посеа, е ѓаволот; жетвата е крајот на светот, а жетварите се ангелите.

⁴⁰ И така, како што се собира плевата и се гори во оган, така ќе биде и при крајот на овој свет.

⁴¹ Ќе испрати Синот Човечки Свои ангели и ќе ги соберат сите при­чи­ни­те­ли на гревот од Неговото царство, и оние што вршат незаконски дела,

⁴² и ќе ги фрлат во вжарена печка; та­му ќе има плач и крцкање со заби.

⁴³ Тогаш праведниците ќе заблескаат како сонце во царството на нивниот Отец. Кој има уши да слуша, нека чуе!“

Парабола за скриеното богатство

⁴⁴ „Царството небесно прилега уште и на богатство сокриено во нива, кое го нашол човек и прикрил, па, од радост за него, отишол и продал сѐ што имал, и ја купил таа нива.“

Парабола за бисерот

⁴⁵ „Царството небесно прилега и на трговец, кој бара убави бисери;

⁴⁶ па, штом најде едно зрно скапоцен бисер, оди и продава сѐ што има и го купува.“

Парабола за мрежата

⁴⁷ „Царството небесно прилега, исто така, и на мрежа, која се фрла во морето и уловува секакви риби;

⁴⁸ и кога ќе се наполни, ја извлекуваат на брегот и седнуваат, па добрите риби ги собираат во садови, а лошите ги фр­лаат.

⁴⁹ Така ќе биде и при крајот на светот: ќе излезат ангелите и ќе ги од­делат лошите од праведните,

⁵⁰ и ќе ги фрлат во вжарена печка: та­му ќе има плач и крцкање со заби.“

Заклучок

⁵¹ И ги праша Исус: „Дали го раз­брав­те сето ова?“ Тие Му одговорија: „Да, Господи!“

⁵² А Тој им рече: „Затоа секој книж­ник, кој се научил за царството небесно, прилега на домаќин што изнесува од своето сокровиште ново и старо.“

Исус се враќа во Назарет

⁵³ И, откако ги кажа Исус овие па­ра­боли, си замина оттаму.

⁵⁴ А штом дојде во Својот роден крај, го поучуваше народот во синагогите нивни. И сите се чудеа и велеа: „Од ка­де кај Него ваква мудрост и моќ?

⁵⁵ Нели е Овој син на дрводелецот? Мајка Му нели се вика Марија, и бра­ќа­та Негови – Јаков и Јосија, Симон и Ју­да?

⁵⁶ И сестрите Негови не се ли сите ме­ѓу нас? Од каде, пак, сето тоа кај Не­го?“

⁵⁷ И се соблазнија заради Него. А Ис­ус им рече: „Нема пророк без чест, ос­вен во земјата негова и во домот негов.“

⁵⁸ И не направи таму многу чуда поради нивното неверие.