Исход 38 - Свето Писмо: Стандардна Библија 2006 (66 книги)

Жртвеникот и бакарниот мијалник

¹ И направи од дрвото шитим жртвеник за жртви сепаленици; пет лакти долг и пет лакти широк, четириаголен, три лакти висок;

² а направи и рогови на неговите четири агли, така што роговите да из­легуваат од него, и го опкова со бакар.

³ И го направи сиот прибор за жр­тве­никот: котлите, лопатчињата, поти­ри­те, вилушките и кадилниците; сиот прибор го направи од бакар.

⁴ А на жртвеникот му направи ре­шетка од бакар како мрежа, од дното па до средината, наоколу;

⁵ и излеа четири алки за четирите агли на решетката од бакар, за да се провлечат низ нив лостови за носење.

⁶ А лостовите ги направи од дрвото шитим и ги опкова со бакар.

⁷ Па ги провлече лостовите низ ал­ките од обете страни на жртвеникот, за да може да се носи; од штици го направи, празен однатре.

⁸ Направи и мијалник од бакар и под­ножје од бакар со убави шарки, кои го красеа влезот на скинијата.

Завесите на дворот

⁹ И двор направи од јужната страна, а завесите му беа од пресукан лен, по сто лакти долги;

¹⁰ дваесет столбови за нив, и дваесет подножја под нив од бакар; а кукичките за столбовите и обрачите нивни беа од сребро.

¹¹ Така и од северната страна – завеси од сто лакти; столбови за нив дваесет и подножја под нив од бакар дваесет; а и кукичките за столбовите и обрачите нивни од сребро.

¹² А од западната страна завеси од педесет лакти: десет столбови за нив, и подножја – десет; кукичките за столбовите и обрачите нивни од сребро;

¹³ и од источната страна, завеси од педесет лакти.

¹⁴ За едната страна на вратата завеси од петнаесет лакти, три столбови за нив и три подножја под нив;

¹⁵ и за другата страна завеси од петнаесет лакти, три столба за нив, и подножја под нив – три.

¹⁶ Сите завеси на дворот наоколу беа од пресукан лен,

¹⁷ а подножјата на столбовите – од бакар, кукичките за столбовите и обрачите на нив – од сребро; и врвовите нивни беа со сребро обложени; и сите столбови на дворот беа со сребрени обрачи поврзани.

¹⁸ А завесата на вратата од дворот – везена – од сина, пурпурна и црвена волна и од пресукан лен, долга дваесет лакти, а во висина по целата ширина пет лакти, како и другите завеси во дворот;

¹⁹ и четири столба за неа, и четири подножја под нив од бакар; кукичките им беа од сребро, врвовите нивни по­сребрени, а и обрачите нивни беа од сребро.

²⁰ Сите колчиња околу скинијата и дворот беа од бакар.

Изработките за скинијата

²¹ Ете, тоа се изработките за скинијата на собранието, направени по заповедта на Мојсеј од левитите, а под надзор на свештеникот Итамар, син на Арон.

²² А сѐ она како што му заповеда Господ на Мојсеј, го направи Веселеил, син на Уриј, синот Оров, од племето Јудино.

²³ И со него Охолијав, синот Ахи­самахов, од племето Даново, резбар, вешт ткајач и везач на сина, пурпурна и црвена и ленена ткаенина.

²⁴ Сето злато, што беше употребено за сиот прибор на светилиштето, злато, принесено на дар, беше дваесет и девет кикари и седумстотини и триесет шекели, свештени шекели;

²⁵ а среброто преброено од дародав­ците – сто кикари и илјада седумстотини седумдесет и пет шекели, свештени шекели.

²⁶ По половина шекел од човек, пре­сметано според свештениот шекел, од секој што доаѓа на пребројување, од дваесет години и нагоре, од шестотини и три илјади петстотини и педесет души.

²⁷ Сто кикари сребро беа употребени за лиење на подножјата за светилиш­тето и подножјата за завесите; сто подножја од сто кикари, по кикар на подножје;

²⁸ а од илјада седумстотини седумдесет и петте шекели тој направи кукич­ки за столбовите и опков за врвовите нивни, а направи и обрачи за нив.

²⁹ А од принесениот дар во бакар има­ше седумдесет кикари, и две илјади и четиристотини шекели;

³⁰ и од него ги направи тој подножјата за влезот во скинијата, и жртвеникот од бакар како и решетката од бакар за него, и сиот прибор за жртвеникот;

³¹ подножјата за целиот двор наоколу, подножјата за вратата на дворот, и сите колчиња за скинијата и сите колчиња за дворот наоколу.