Исаија 1 - Свето Писмо: Стандардна Библија 2006 (66 книги)

¹ Видение на Исаија, синот на Амоц, кое го виде за Јудеја и Ерусалим, во деновите на јудејските цареви Озија, Јотам, Ахаз и Езекија.

Одметнат народ

² Чујте небеса и слушај земјо, зашто Господ вели: „Јас воспитав и подигнав синови, а тие се побунија против Мене.

³ Волот го познава стопанот свој, и магарето – јаслите на господарот свој, а Израел не Ме познава, Мојот народ не разбира.“

⁴ Ах, народе грешен, народ претрупан со беззаконија, племе на злодејци и си­нови погубни! Го оставивте Гос­пода, Го презревте Светецот Изра­елов, – грб Му свртевте.

⁵ Каде уште да ве бијат вас, кои сѐ уште се противставувате? Целата глава ви е во рани, и целото срце ви е изне­моштено.

⁶ Од главата до петите нема во тој на­род здраво место, модрици, гнојни рани, нечистени, непреврзани и неомекнати со масло.

Опустошена земја

⁷ Земјата ви е опустошена, градо­вите ви се изгорени со оган; нивите ваши пред ваши очи туѓинци ги јадат; и пус­тош е, како што запустуваат туѓинци.

⁸ Остана ќерката Сионова како колиба во лозје, како колиба во градина, како опсаден град.

⁹ Да не беше ни оставил Господ Са­ваот мал остаток, ќе бевме како Содом, ќе заприлегавме на Гомора.

Не жртви, туку правда

¹⁰ Чујте го словото Господово, кнезови содомски, вслушајте се во зако­нот на нашиот Бог, народе гоморски!

¹¹ „Зошто ми се многуте ваши жртви? – вели Господ. Презаситен сум од сепаленици на овни и од маснотија на згоен добиток; крв од телињата, од јагниња и јариња не сакам.

¹² Кога доаѓате да се јавите пред лицето Мое, кој го бара тоа од вашата рака, кога ќе згазнете на Моите дво­рови?

¹³ Не принесувајте веќе празни жрт­ви; кадењето е одвратно за Мене; ново­месечија, саботи и празнични собранија со беззаконија – не можам да трпам!

¹⁴ Душата Моја ги мрази вашите но­вомесечија и вашите празници: тие се товар за Мене, тешко Ми е да ги носам.

¹⁵ И кога протегате раце, Јас ги кријам од вас очите Свои, а кога ги умно­жувате молбите свои, Јас не слушам: рацете ваши се полни со крв.

¹⁶ Измијте се, исчистете се; иставете ги од очите Мои лошите дела свои; престанете да правите зло;

¹⁷ научете се да правите добро, барајте правда, спасувајте угнетен, заштитувај­те сирак, застапувајте се за вдовица.“

Повик од Господ

¹⁸ Тогаш дојдете и ќе се пресуди, вели Господ. Гревовите ваши да се и алово црвени – како снег ќе ги по­белам; да бидат црвени и како пурпур – како вол­на ќе станат бели.

¹⁹ Ако Го барате и послушате, ќе ги јадете добрата земни;

²⁰ ако, пак, не сакате и се против­ставувате, меч ќе ве истреби! Тоа го рече устата Господова.

Осуда на Ерусалим

²¹ Како справедливиот верен град Сион стана блудница? Во него царуваше правда, а сега престојуваат убијци.

²² Среброто ти стана како згура, виното ти е со вода помешано;

²³ твоите кнезови се престапници на законот и соучесници на крадци; сите тие сакаат подароци и лакомат за наг­рада; не заштитуваат сирак, и поплака на вдовица не стигнува до нив.

²⁴ Затоа вели Господ, Господ Саваот, Јунакот Израелов: „О, ќе ја истурам ја­роста на противниците Свои и ќе им се одмаздам на непријателите Свои!

²⁵ И ќе ја свртам против тебе раката Своја и како со пепелница ќе ја исчис­там од тебе згурата и ќе го одделам од тебе сето олово.

²⁶ И пак ќе поставам судии, како по­рано, и советници како отпрвин; тогаш ќе говорат за тебе: град на правда, верна престолнина!

Господ ќе го избави Ерусалим

²⁷ Сион ќе се спаси преку праведен суд, и обратените негови – преку правда.

²⁸ За сите отстапници и грешници – погибел, а оние, што Го оставиле Гос­пода, ќе бидат истребени.

²⁹ Вие ќе бидете посрамени заради да­бовите што ги обожавате, ќе црвенеете од срам заради градините што сте си ги избрале;

³⁰ зашто вие ќе бидете како даб, чиј лист свенал и како градина, во која нема вода.

³¹ И силниот ќе биде отпадок, а делото негово – искра; ќе горат заедно, – и никој нема да ги угасне.“