Лука 16 - Свето Писмо (Гаврилова) 1990

Парабола за неправедниот настојник. Богаташот и сиромашниот Лазар.

¹ А на учениците Свои им рече: »Еден човек беше богат и имаше настојник; и тој беше наклеветен пред него дека го растура неговиот имот.

² И кога го повика, му рече: ‚Што е ова што слушам за тебе? Дај сметка за раководењето, зашто веќе не ќе можеш да бидеш настојник.‘

³ А настојникот си рече во себе: ‚Што да правам? Господарот мој го одзема од мене раководењето на куќата; да копам, не можам; да просам – се срамам.

⁴ Знам што да правам, за да ме примат во своите домови, кога ќе бидам отстранет од раководењето на куќата.‘

⁵ И кога ги повика должниците на својот господар, секого поодделно, му рече на првиот: ‚Колку му должиш на мојот господар?‘

⁶ Тој одговори: ‚Сто мери елеј.‘ И му рече: ‚Земи си ја потврдата, седни бргу и напиши: »педесет!«‘

⁷ Потоа му рече на другиот: ‚А ти, колку должиш?‘ Тој одговори: ‚Сто мери пченица.‘ И му рече: ‚Земи си ја потврдата и напиши: »осумдесет!«‘

⁸ И го пофали господарот несправедливиот настојник, оти постапил досетливо; зашто синовите на овој свет во својот род се подосетливи од синовите на светлината.

⁹ И јас ви велам: создадете си пријатели со неправедно богатство, па, кога осиромашите, да ве примат во вечните живеалишта.

¹⁰ Верниот во малку и во многу е верен, а несправедливиот и во многу и во малку е несправедлив.

¹¹ Па така, ако во неправедното богатство не бевте верни, кој ќе ви го довери вистинското?

¹² И ако во туѓото не бевте верни, кој ќе ви го даде вашето?

¹³ Ниеден слуга не може да им служи на двајца господари; зашто, или едниот ќе го замрази, а другиот ќе го засака, или на едниот ќе му угоди, а другиот ќе го презре. Не можете да служите на Бога и на Мамона.«

¹⁴ Сето тоа го слушаа фарисеите, што беа среброљупци, и Му се потсмеваа.

¹⁵ И им рече: »Вие се прикажувате пред луѓето за праведни, но Бог ги знае вашите срца; зашто, она што е за луѓето високо, пред Бога е мерзост.

¹⁶ Законот и Пророците беа до Јована; а оттогаш царството Божјо се благовестува и секој со усилие влегува во него.

¹⁷ Но полесно им е на небото и на земјата да преминат, отколку една црта од Законот да пропадне.

¹⁸ Секој, што ја остава жената своја и се жени со друга, прељубодејствува, и секој, што се жени со напуштена, прави прељуба.

¹⁹ Еден човек беше богат и се облекуваше во порфир и свила, и секој ден живееше раскошно и се веселеше.

²⁰ Имаше исто така, и еден сиромав, по име Лазар, кој струплив лежеше пред вратата негова;

²¹ и сакаше да се нахрани со трошките што паѓаа од трпезата на богатиот; и кучињата доаѓаа и ги лижеа раните негови.

²² Умре сиромавиот и ангелите го однесоа во крилото Авраамово; умре и богатиот и го погребаа.

²³ И во пеколот, кога беше во маки, ги подигна очите свои и го виде оддалеку Авраама и Лазара во крилото негово,

²⁴ и, откако извика, рече: ‚Оче Аврааме, смилуј се на мене и прати го Лазара да го накваси својот прст во вода и да ми го разлади јазикот, оти многу страдам во овој пламен!‘

²⁵ Но Авраам рече: ‚Синко, сети се, дека ти си го добил своето добро уште додека беше жив, а Лазар злото; сега, пак, тој се утешува, а ти страдаш.

²⁶ Освен тоа, меѓу вас и нас постои голема провалија така што оние, кои би сакале да дојдат при вас, не можат; а исто така и оние оттаму – при нас.‘

²⁷ А тој пак рече: ‚Тогаш те молам, оче, прати го во татковата ми куќа,

²⁸ зашто имам петмина браќа, та да им посведочи, за да не дојдат и тие во ова место на маките!‘

²⁹ Авраам му рече: ‚Тие го имаат Мојсеја и Пророците; нив нека ги слушаат!‘

³⁰ А тој рече: ‚Не, оче Аврааме, туку, ако некој од мртвите отиде при нив, тогаш ќе се покајат.‘

³¹ Авраам му рече: ‚Штом Мојсеја и Пророците не ги слушаат, тогаш и да воскресне некој од мртвите, тие нема да му поверуваат.‘«