Левитска 10 - Свето Писмо (Гаврилова) 1990

Оган ги изгорува Надава и Авиуда.

¹ Двата сина Аронови, Надав и Авиуд, земајќи ја секој својата кадилница, ставија оган во нив, па ставија во нив и кадиво, и принесоа пред Господа туѓ оган, иако тоа не им беше заповедал Господ.

² Тогаш излезе оган од Господа, и ги изгоре, и умреа пред Господа.

³ И му рече Мојсеј на Арона: »Тоа е она што го рече Господ, велејќи преку оние што ќе пристапуваат кон Мене, ќе се осветам и во цел собор ќе се прославувам.« И Арон се смири.

⁴ Потоа Мојсеј ги повика Мисаила и Елисафана, синовите на Озил, чичкото на Арона, и им рече: »Дојдете и извадете ги браќата ваши од светилиштево надвор од логоров.«

⁵ И тие пристапија и ги изнесоа заедно со хитоните нивни надвор од логорот, како што рече Мојсеј.

⁶ Па му рече Мојсеј на Арона и на Елеазара и на Итамара, другите негови синови: »Не откривајте ги вашите глави, а и одеждите ваши да не ги раскинувате, за да не умрете и Господ да не се разгневи на целиот народ, туку браќата ваши, целиот дом Израилев нека плаче поради огнот што се запали од Господа;

⁷ и не излегувајте од дверите на скинијата на сведоштвото, за да не загинете, зашто елејот за помазание на вас е од Господа.« И направија според зборовите на Мојсеја.

⁸ И Господ му рече на Арона, велејќи:

⁹ »Вино и сикер да не пиете, ти и синовите твои, кога ќе влегувате во скинијата на сведоштвото, а и кога ќе пристапувате кон жртвеникот, за да не загинете, тоа нека ви биде вечен закон во поколенијата ваши:

¹⁰ за да можете да распознавате што е свето, а што не е; и што е чисто, а што не;

¹¹ учете ги синовите Израилеви на сите заповеди, што им ги кажа Господ преку Мојсеја.«

¹² Потоа Мојсеј му рече на Арона, и на Елеазара и на Итамара, другите негови синови: »Земајте од жртвата што ќе преостане и од приносите пред Господа и јадете го тоа кај жртвеникот, зашто тоа е најголема светиња.

¹³ И јадете го тоа на свето место, бидејќи тоа е законски дел твој и законски дел на синовите твои од приносите пред Господа; зашто така ми заповеда Господ.

¹⁴ А градите од жртвата што се принесува и плешките да ги јадете на свето место, ти и синовите твои, и домот твој со тебе, зашто со закон ти се даде тебе и на синовите твои дел од жртвите за спасение, што ги принесуваат синовите Изралеви.

¹⁵ Плешките од жртвите што се принесуваат и градите од жртвите вознесувани да се донесуваат заедно со лојот што се вознесува пред Господа, и тоа да биде твое, и на синовите твои, и на ќерките твои со тебе, како дел со вечен закон, како што му заповеда Господ на Мојсеја.«

¹⁶ Потоа Мојсеј побара козел како жртва поради грев; но, ете, тој беше изгорел; затоа се разгневи Мојсеј на Елеазара и на Итамара, синовите Аронови и рече:

¹⁷ »Зошто не јадевте на свето место, бидејќи тоа е жртва поради грев што е најголема светиња; таа ви ја дава Господ вам да ја јадете, за да го ослободи целиот народ од грев и да се помолите за нив пред Господа;

¹⁸ и ете крвта негова не е внесена во светилиштето; зашто требаше да ја јадете на свето место, внатре, како што ми заповеда Господ.«

¹⁹ Тогаш му рече Арон на Мојсеја, велејќи: »Еве, тие денес принесоа жртва поради својот грев и жртва сепаленица пред Господа; и ми се случи ова. А да бев јал денес од жртвата за грев, ќе Му беше ли тоа угодно на Господа?«

²⁰ Го чу тоа Мојсеј и му беше угодно.