Јаков 2 - Свето Писмо (Гаврилова) 1990

Вистинска вера не гледа на тоа кој е што и се покажува во делата.

¹ Браќа мои, држете ја верата во Исуса Христа, нашиот Господ на славата, и не гледајте кој е што.

² Ако во собрание ваше влезе човек со златен прстен, во светли алишта, а влезе и сиромав со проста облека,

³ па погледате на облечениот во светли алишта и му речете: »Ти седни овде убаво!«, а на сиромашниот му речете: »Ти стој таму!« или »Седни овде, при подножјето мое!«

⁴ И не размисливте во себе, туку станавте судии на лоши помисли.

⁵ Послушајте, возљубени браќа мои, не ги избра ли Бог сиромасите од овој свет да бидат богати во верата и наследници на царството, ветено од Него на оние, кои Го сакаат?

⁶ А вие го посрамивте сиромавиот. Не се ли тоа богатите што ве мачат и влечат по судови?

⁷ Не го хулат ли тие вашето добро име, со кое сте се нарекле?

⁸ Ако, пак, го извршувате царскиот Закон според Писмото: »Возљуби го ближниот како самиот себе« – добро правите.

⁹ Но, ако гледате на лице, грев правите; и Законот ве изобличува како престапници.

¹⁰ Оти, кој го пази целиот Закон, а згреши само во едно, виновен ќе биде за сѐ.

¹¹ Зашто Оној, Кој рекол: »Не прави прељуба«, рекол и: »Не убивај!« Па затоа, ако не вршиш прељуба, а убиеш, ти ќе станеш престапник на Законот.

¹² Зборувајте и постапувајте како оние, што ќе бидат судени според Законот на слободата.

¹³ Оти судот ќе биде безмилосен спрема оној, кој не покажал милост; милоста во судот се пофалува.

¹⁴ Каква е ползата, браќа мои, ако некој рече дека има вера, а дела нема? Може ли верата да го спаси?

¹⁵ Ако некој брат или сестра се голи и немаат што да јадат,

¹⁶ па некој од вас им рече: »Одете си со мир, грејте се и наситете се!«, а не им даде што им е потребно за телото – каква полза?

¹⁷ И така, верата, ако нема дела, сама по себе е мртва.

¹⁸ Но може некој да рече: »ти имаш вера, а јас имам дела.« Покажи ми ја верата своја без дела, а јас ќе ти ја покажам верата своја од моите дела.

¹⁹ Ти веруваш дека Бог е еден; добро правиш; но и бесовите веруваат, а треперат.

²⁰ Не сакаш ли да разбереш, о суетни човеку, дека верата без дела е мртва?

²¹ Нели со дела се оправда Авраам, нашиот татко, откако врз жртвеникот го положи синот свој Исака?

²² Гледаш ли дека верата им помогна на делата негови, и дека преку делата верата стана совршена?

²³ И се изврши Писмото, кое вели: »Му поверува Авраам на Бога, и тоа му се прими како оправдание«, и тој се нарече – пријател Божји.

²⁴ Гледате ли дека човекот се оправдува со дела, а не само со вера?

²⁵ А така не се оправда ли со дела и блудницата Раав, откако ги прими извидувачите и ги изведе по друг пат.

²⁶ Оти, како што е телото без дух мртво, така и верата без дела е мртва.